Vista a solicitude formulada polo alcalde-presidente do Concello de Boimorto de permuta-lo predio nº 179, terra sobexa do proceso de concentración parcelaria de S. Vicente de Arceo, de 1.630 m, pola mesma superficie do predio nº 423 da referida zona, co obxecto da súa posterior cesión ó citado concello para destinala á instalación dunha estación depuradora de augas residuais para saneamento da parroquia de Arceo, e
Vista a conformidade do titular do predio nº 423, así como os informes emitidos pola Secretaría Xeral e do Patrimonio da Consellería de Economía e Facenda, pola Asesoría Xurídica e a Intervención Delegada da Consellería de Agricultura, Gandería e Política Agroalimentaria, así como os artigos 31 e 32 da Lei 10/1985, do 14 de agosto, de concentración parcelaria para Galicia, a Lei 30/1992, do 26 de novembro, de réxime xurídico das administracións públicas e do procedemento administrativo común, modificada pola Lei 4/1999, do 13 de xaneiro, a disposición transitoria cuarta da Lei 13/1988, do 30 de decembro, de presupostos xerais da Comunidade Autónoma de Galicia para 1989, a disposición transitoria terceira da Lei 15/1991, do 28 de decembro, de presupostos xerais da Comunidade Autónoma de Galicia para 1992, ambas modificadoras da Lei 3/1985, do 12 de abril, do patrimonio da Comunidade Autónoma de Galicia, e demais disposicións legais de aplicación ó caso.
Considerando que a permuta do predio nº 179 de 1.630 m pola mesma superficie da nº 423 ten como fin último a instalación, na superficie segregada, dunha estación depuradora de augas residuais para a parroquia de Arceo, o que supón un beneficio para a xeneralidade dos seus veciños, pasando a conta-la superficie segregada como predio nº 423-2 e 1.630 m, e a restante superficie do predio matriz, 27.260 m, co nº 423-1.
Na súa virtude,
DISPOÑO:
Permuta-lo predio nº 179 de 1.630 m procedente do fondo de terras da zona de concentración parcelaria de S. Vicente de Arceo (Boimorto) polo predio nº 423-2 de 1.630 m, segregado do primitivo predio nº 423 que co nº 423-1 e 27.260 m permanece no patrimonio de Eugenio García Peteiro no que se integra, así mesmo, o precitado predio nº 179.
Santiago de Compostela, 15 de xuño de 2000.
Cástor Gago Álvarez
Conselleiro de Agricultura, Gandería e Política
Agroalimentaria