O artigo 8 da Lei 9/1988, do 19 de xullo, de estatística de Galicia, modificada pola Lei 7/1993, do 24 de maio, establece que a Xunta de Galicia, con carácter excepcional, poderá dispoñer por decreto a elaboración de estatísticas non incluídas no Plan Galego de Estatística se apreciase a súa conveniencia e despois de transcorrido un ano desde a aprobación do Plan Galego de Estatística.
Para proceder á planificación de novos servicios sociais e darlles resposta ás novas demandas sociais que están producindo os cambios demográficos co progresivo avellentamento da poboación, considérase conveniente a elaboración dunha estatística sobre os perfís e as necesidades de servicios sociais dos maiores de 65 anos da Comunidade Autónoma de Galicia.
A información que se obterá desta estatística axudará a cumpri-lo obxectivo central do Plan Galego de Estatística 1998-2001, aprobado pola Lei 6/1997, do 31 de xullo, de conseguir un conxunto coherente, fiable e actualizado de datos estatísticos que permita o coñecemento da realidade económica, demográfica e social de Galicia. Así mesmo, axudará a cumpri-lo obxectivo operativo de información na área de estatísticas sociolaborais, culturais e ambientais do artigo 8 do citado plan, no punto de indicadores sociais e condicións de vida.
En virtude de todo o anterior, de acordo co disposto no artigo 8 da Lei 9/1988, do 19 de xullo, por iniciativa da Consellería de Sanidade e Servicios Sociais e por proposta do conselleiro de Economía e Facenda, de acordo co Consello Galego de Estatística e logo de deliberación do Consello da Xunta de Galicia na súa reunión do día vintedous de xuño de dous mil,
DISPOÑO:
Artigo 1º
Apróbase a elaboración dunha estatística sobre as persoas maiores en Galicia: perfís e necesidades coas características recollidas no anexo deste decreto.
Artigo 2º
A estatística que aproba este decreto estará sometida ás regras xerais e específicas establecidas no Decreto 319/1999, do 3 de decembro, polo que se aproba o Programa Estatístico Anual da Comunidade Autónoma de Galicia para 2000, e axustarase á legalidade e á normativa técnica vixente en materia estatística.
Disposicións derradeiras
Primeira.-Facúltase o conselleiro de Economía e Facenda para dictar cantas disposicións sexan nece
sarias para o desenvolvemento e a execución desta norma.
Segunda.-Esta disposición entrará en vigor o día da súa publicación no Diario Oficial de Galicia.
Santiago de Compostela, vintedous de xuño de dous mil.
Manuel Fraga Iribarne
Presidente
José Antonio Orza Fernández
Conselleiro de Economía e Facenda
ANEXO
Obxectivo operativo de información.
Área de estatísticas sociolaborais, culturais e ambientais-indicadores sociais e condicións de vida.
Nome: estatística sobre as persoas maiores en Galicia: perfís e necesidades.
Organismo responsable: Consellería de Sanidade e Servicios Sociais, Consellería de Familia e Promoción do Emprego, Muller e Xuventude e a Universidade de Vigo.
Obxectivo: coñecemento da situación actual das persoas maiores no ámbito da Comunidade Autónoma de Galicia.
Grao de dificultade: complexo.
Custo estimado: moi baixo.
Dispoñibilidade: prazo curto.