O exercicio do dereito de folga na Administración da Comunidade Autónoma de Galicia está condicionado ó mantemento dos servicios esenciais, de acordo co Decreto 155/1988, do 9 de xuño, o que significa, tal como declarou o Tribunal Constitucional, que o dereito da comunidade a estas prestacións vitais é prioritario respecto do dereito á folga, se ben esta prioridade necesita ser contrastada en cada situación de folga e sometida ó principio de proporcionalidade dos sacrificios impostos ós folguistas e ós beneficiados polo servicio, no que atinxe ós dereitos fundamentais, as liberdades públicas e os bens constitucionais protexidos.
A central sindical Converxencia Intersindical Galega (CIG), mediante escrito de data 8 de marzo de 2000, comunica a convocatoria de folga nos Servicios de Defensa contra Incendios Forestais, Medio Ambiente Natural e Montes e Industrias Forestais da Consellería de Medio Ambiente, no ámbito de toda a Comunidade Autónoma, precisando que afectará a tódolos traballadores dos ditos servicios e que se levará a cabo entre as 00 e e as 24 horas dos días sinalados.
O mencionado Decreto 155/1988, do 9 de xuño, polo que se dictan normas para garanti-la prestación dos servicios esenciais no ámbito da Comunidade Autónoma, por unha parte establece que terán a consideración de servicios esenciais, entre outros polo que respecta ós prestados por esta consellería en
relación coa sinalada convocatoria de folga, os de vixilancia e extinción de incendios; mantemento de edificios, bens e instalacións públicas (artigo 2º); e por outra, faculta o conselleiro competente por razón dos ditos servicios esenciais afectados para que, mediante orde, determine, oído o comité de folga, o mínimo de actividade necesaria para asegura-lo mantemento de tales servicios, así como para a fixación do persoal preciso para a súa prestación (artigo 3º).
A motivación da concreta determinación do mínimo de actividade e da fixación do persoal preciso para asegura-lo mantemento dos servicios esenciais prestados por esta consellería afectados pola presente convocatoria de folga, e que se contén nesta orde, é, respecto a cada un de eles, atendendo ás funcións que establece o Decreto 293/1997, do 1 de outubro, polo que se aproba o Regulamento da escala de axentes forestais, é a seguinte:
-Nos distritos forestais, nos que se reflicten, entre outras, as competencias encomendadas ós Servicios de Defensa contra Incendios Forestais, a imprevisibilidade do feito causante da prestación do servicio esencial de defensa contra incendios e a indeterminabilidade das súas consecuencias en canto a vidas e facendas, ante o que sería de aplicación plenamente e sen posibilidade de restricción ningunha o principio de que salus populi maxima lex esto se sucedera que fora mester, obviamente a xuízo dos responsables do servicio, a utilización do total dos efectivos de que se dispón.
-Nos Servicios de Montes e Industrias Forestais, a realización de funcións de vixilancia de bens e instalacións públicas dependentes dos ditos Servicios.
-Nos Servicios de Medio Ambiente Natural, a realización de funcións de vixilancia e mantemento de edificios, bens e instalacións públicas, entre os que deben considerarse incluídos aqueles bens de dominio público ós que a Lei 7/1992, de pesca fluvial de Galicia, define como augas continentais da Comunidade Autónoma de Galicia.
Por todo iso, de conformidade e en uso das atribucións que me confire o Decreto 155/1988, de 9 de xuño, e oído o comité de folga,
DISPOÑO:
Artigo 1º
O mínimo de actividade e o persoal preciso para asegura-lo mantemento dos servicios esenciais prestados por esta consellería afectados pola folga convocada para os días 6 de abril, 4 de maio e 1 de xuño de 2000 é o seguinte:
Distritos forestais.
-Na cabeceira de cada un dos distritos:
Un axente forestal con funcións no ámbito da defensa contra incendios forestais.
-En cada unha das comarcas forestais:
Un axente forestal con funcións no ámbito da defensa contra incendios forestais.
No caso de que durante os días de folga se producisen incendios que, a xuízo dos responsables do servicio, obrigasen a adoptar medidas complementarias ás adoptadas co persoal previsto como mínimo, este poderá elevarse ata o cen por cento.
Servicios de montes e industrias forestais.
-Viveiros forestais e instalacións afíns:
Un axente forestal responsable de cada instalación, de se-lo caso.
Distritos dos servicios de medio ambiente natural.
-En cada unha das súas comarcas:
Un axente forestal con funcións no ámbito da vixilancia das augas continentais da Comunidade Autónoma e do seu uso sociorecreativo, espacios naturais protexidos e instalacións.
Artigo 2º
A designación nominal, con carácter rotatorio se é o caso, do persoal que deberá cubri-los distintos servicios será feita polos respectivos delegados provinciais da Consellería de Medio Ambiente e publicada nos taboleiros de anuncios de cada centro de traballo.
Disposición derradeira
A presente orde entrará en vigor o mesmo día da súa publicación no Diario Oficial de Galicia.
Santiago de Compostela, 30 de marzo de 2000.
José Carlos del Álamo Jiménez
Conselleiro de Medio Ambiente