O Consello da Xunta de Galicia, na sua reunión do día tres de febreiro de dous mil, adoptou o seguinte acordo:

Aprobar definitivamente como proxecto sectorial de incidencia supramunicipal o ramal de gas do complexo ambiental de Cerceda.

O órgano competente, por razón da materia, para a tramitación do expediente é a Consellería de Medio Ambiente.

As determinacións contidas no proxecto vincularán o planeamento dos municipios nos que se asentan as súas instalacións, que terán que adaptarse a elas nos termos establecidos no proxecto, nun prazo máximo de catro anos.

De conformidade co disposto na disposición adicional quinta da Lei 1/1997, do 24 de marzo, do Solo de Galicia, para os efectos previstos na disposición adicional primeira da Lei 10/1995, do 23 de novembro, de ordenación do territorio de Galicia, quedan expresamente cualificados como de marcado carácter territorial as obras necesarias para a execución do proxecto e, consecuentemente, non estarán sometidas ós actos de control preventivo municipal a que se refire o artigo 84.1º b da Lei 7/1985, do 2 de abril, reguladora das bases de réxime local.

Visto o antedito acordo do Consello da Xunta de Galicia, adoptado na súa reunión do día tres de febreiro de dous mil, e coa finalidade de cumprilo, dispoño que se publique no Diario Oficial de Galicia.

Santiago de Compostela, 15 de febreiro de 2000.

José Carlos del Álamo Jiménez

Conselleiro de Medio Ambiente