En virtude da Orde do 19 de agosto de 1997 (DOG nº 166, do 29 de agosto) delegáronse determinadas atribucións en materia de urbanismo nos delegados provinciais desta consellería, ó abeiro do disposto polo artigo 189.3º da Lei 1/1997, do 24 de marzo, do solo de Galicia.
A experiencia acumulada durante os anos de exercicio das competencias urbanísticas desde a entrada en vigor do novo réxime competencial establecido pola Lei 7/1995, do 29 de xuño, de delegación e distribución de competencias en materia de urbanismo, as innovacións introducidas no ordenamento xurídico urbanístico -e moi especialmente a aprobación do Regulamento de disciplina urbanística para o desenvolvemento e aplicación da Lei do solo de Galicia-, a incidencia do novo réxime de recursos administrativos como consecuencia da Lei 4/1999, do 13 de xaneiro, de modificación da Lei 30/1992, do 26 de novembro, de réxime xurídico das administracións públicas e do procedemento administrativo común, así como a recente aprobación do decreto polo que se establece a estructura orgánica desta consellería, que reorganiza a estructura e funcións da Dirección Xeral de Urbanismo son algunhas das razóns que aconsellan a aprobación dunha nova orde de delegación de competencias en materia de urbanismo,
adecuada coa complexidade das novas competencias e coa nova estructura organizativa.
Na súa virtude, e no uso das facultades conferidas polo artigo 43.3º da Lei 1/1983, do 22 de febreiro, reguladora da Xunta e do seu presidente, e polo artigo 13 da Lei 30/1992, do 26 de novembro, de réxime xurídico das administracións públicas e do procedemento administrativo común,
DISPOÑO:
Artigo 1º
Delégase no director xeral de Urbanismo o exercicio das competencias que a Lei 1/1997, do 24 de marzo, do solo de Galicia, lle atribúe ó conselleiro de Política Territorial, Obras Públicas e Vivenda, nos seguintes supostos:
a) Emisión de informes sobre instrumentos de planeamento de desenvolvemento (plans parciais e especiais) previstos polos artigos 41 e 42 da Lei 1/1997, do 24 de marzo, do solo de Galicia.
b) Outorgamento da autorización autonómica para construccións e instalacións no medio rural, segundo o disposto polo artigo 77.4º da Lei 1/1997, do 24 de marzo, do solo de Galicia.
c) Outorgamento da autorización autonómica prevista pola disposición adicional terceira, punto 2, da Lei 1/1997, do 24 de marzo, do solo de Galicia, para edificacións en núcleos rurais.
d) Aprobación definitiva do expediente de expropiación forzosa polo procedemento de taxación conxunta, previsto polo artigo 145 da Lei 1/1997, do 24 de marzo, do solo de Galicia.
e) Inscricións e exercicio das funcións que corresponden ó Rexistro de Entidades Urbanísticas Colaboradoras, previsto polo Regulamento de xestión urbanística, aprobado polo Real decreto 3288/1978, do 25 de agosto.
f) Exercicio das competencias autonómicas previstas en relación cos instrumentos de xestión urbanística regulados polos títulos III e IV da Lei 1/1997, do 24 de marzo, do solo de Galicia.
Artigo 2º
Os actos dictados por delegación farán constar expresamente esta circunstancia e consideraranse como propios do órgano delegante que, en calquera momento, poderá revogar total ou parcialmente a delegación outorgada.
Disposición derrogatoria
Queda derrogada a Orde do 19 de agosto de 1997 pola que se delegan atribucións en materia de urbanismo, (DOG nº 166, do 29 de agosto) e cantas disposicións de igual ou inferior rango se opoñan ó establecido nesta orde.
Disposición derradeira
Esta orde entrará en vigor o mesmo día da súa publicación no Diario Oficial de Galicia.
Santiago de Compostela, 30 de decembro de 1999.
José Cuíña Crespo
Conselleiro de Política Territorial, Obras Públicas e Vivenda