O artigo 28.2º da Constitución española recoñece como dereito fundamental da persoa o dereito á folga.
O exercicio deste dereito na Administración e nas empresas, entidades e institucións públicas ou privadas, que presten servicios públicos ou de recoñecida e inaprazable necesidade, no ámbito e competencias da Comunidade Autónoma de Galicia, está condicionado ó mantemento dos servicios esenciais fixados no artigo 2 do Decreto 155/1988, do 9 de xuño (Diario Oficial de Galicia nº 116, do 20 de xuño), entre os que se atopa a sanidade.
O exercicio público da prestación da asistencia sanitaria non se pode ver afectado gravemente polo lexítimo dereito do exercicio de folga, xa que aquel é considerado e recoñecido prioritariamente en relación a este.
O artigo 3 do citado decreto faculta os conselleiros competentes, por razón dos servicios esenciais afectados, para que, mediante orde, e ante cada situación de folga, decidan o mínimo de actividade necesaria para asegura-lo mantemento de tales servicios, así como para determina-lo persoal necesario para a súa prestación.
Convocada folga que afecta ós traballadores do servicio de cociña do Hospital Comarcal de Valdeorras, que se levará a efecto os días 3, 4, 5, 6 e 7 de xaneiro do ano 2000, das 12 ás 13 horas, logo de audiencia ó comité de folga
DISPÓN:
Artigo 1º.
A folga convocada que se levará a efecto os días 3, 4, 5, 6 e 7 de xaneiro do ano 2000, das 12 ás 13 horas de cada un dos días sinalados, que afecta ós traballadores do servicio de cociña do Hospital Comarcal de Valderras, enténdese condicionada ó mantemento dos servicios mínimos necesarios en adecuada correspondencia cos criterios rectores que se explicitan neste artigo.
Os servicios mínimos que se fixan resultan totalmente imprescindibles para mante-la adecuada cobertura do servicio de cociña do dito hospital, para evitar que se produzan graves prexuízos ós usuarios.
Tales mínimos responden á necesidade de compatibiliza-lo respecto ineludible ó exercicio do dereito á folga coa atención ós usuarios que, baixo ningún concepto, poden quedar desasistidos, polas características do servicio dispensado
Dado que a convocatoria de folga está prevista desde as 12 ás 13, período de tempo de emplantado e distribución de comida no centro hospitalario, é necesario garanti-los servicios mínimos que corresponden, cando menos, a unha quenda normal de domingos e festivos. De non asegurar tales mínimos, produciríanse de seguro alteracións na distribución das dietas e organización de cociña que causarían prexuízos ós pacientes internados no centro.
Establécense os seguintes servicios mínimos:
-1 cociñeiro.
-4 pinches.
Artigo 2º.
A designación nominal, con carácter rotatorio, do persoal que deberá cubri-lo servicio será determinada polo director-xerente, procedéndose á súa publicación nos taboleiros de anuncios do centro de traballo.
Artigo 3º.
Os prazos e alteracións no traballo por parte do persoal necesario para o mantemento dos servicios mínimos serán considerados ilegais para os efectos do establecido no artigo 16.1º do Real decreto lei 17/1977, do 4 de marzo (BOE nº 58, do 9 de marzo).
Artigo 4º.
O disposto nos artigos anteriores non significará ningún tipo de limitación dos dereitos que a normativa reguladora da folga recoñece ó persoal nesta situación, nin tampouco sobre a tramitación e efectos das peticións que a motiven.
Artigo 5º.
Sen prexuízo do que establecen os artigos anteriores, deberanse observa-las normas legais e regulamentarias vixentes en materia de garantías dos usuarios dos centros sanitarios.
Disposición derradeira
Esta orde entrará en vigor o mesmo día ó da súa publicación no Diario Oficial de Galicia.
Santiago de Compostela, 28 de decembro de 1999.
José Mª Hernández Cochón
Conselleiro de Sanidade e Servicios Sociais