A Comunidade Benedictina de Samos acordou a cesión do dereito real de uso, a título gratuíto e por tempo indefinido, á Xunta de Galicia do mosteiro de San Clodio e os terreos que o circundan, para a instalación de diversos servicios dependentes da Xunta de Galicia, en virtude do convenio mixto de cooperación e colaboración subscrito entre a Xunta de Galicia, Bispado de Ourense, Comunidade Benedictina de Samos e Concello de Leiro, con data do 14 de decembro de 1994, e addendas asinadas os días 8 de novembro de 1998 e 23 de agosto de 1999.

Conforme os artigos 17.1º da Lei 3/1985, do 12 de abril, do patrimonio da Comunidade Autónoma de Galicia, e 34 do seu regulamento, aprobado polo Decreto 50/1989, do 9 de marzo, a adquisición pura e simple de bens a título gratuíto ou lucrativo requirirá decreto do Consello da Xunta de Galicia, por proposta da Consellería de Economía e Facenda. Así mesmo, os artigos 23.1º da mesma lei e 38.1º do regulamento establecen que non se poderán adquirir bens ou dereitos a título lucrativo cando o valor dos gravames, cargas ou afeccións impostos sobre eles supere o seu valor intrínseco, ben que non se considera carga, gravame ou afección os investimentos que teña que realiza-la Comunidade Autónoma para da-lo destino de uso xeral ou servicio público da súa competencia que fixe o cedente ou doador.

Na súa virtude, por proposta do conselleiro de Economía e Facenda, feita nos termos acordados pola Comunidade Benedictina no convenio mixto de cooperación e colaboración e as súas addendas e logo de deliberación do Consello da Xunta de Galicia na súa reunión do día tres de decembro de mil novecentos noventa e nove,

DISPOÑO:

Artigo 1º

Acéptase a cesión do dereito real de uso, a título gratuíto, do inmoble que conforma o mosteiro de San Clodio e do terreo que o circunda, situado no termo municipal de Leiro (Ourense).

Artigo 2º

A Consellería de Cultura, Comunicación Social e Turismo destinará o inmoble á instalación de servicios dependentes da Xunta de Galicia.

Artigo 3º

A Consellería de Economía e Facenda, a través da Secretaría Xeral e do Patrimonio, procederá á formalización da cesión no correspondente documento público e á inscrición do ben no Rexistro da Propiedade a nome da Comunidade Autónoma.

Disposición derradeira

A Consellería de Economía e Facenda, a través da Secretaría Xeral e do Patrimonio, levará a cabo tódolos trámites necesarios para a efectividade do presente decreto.

Santiago de Compostela, tres de decembro de mil novecentos noventa e nove.

Manuel Fraga Iribarne

Presidente

José Antonio Orza Fernández

Conselleiro de Economía e Facenda