A Unión Europea ten establecido un réxime de axudas á constitución e funcionamento administra
tivo das Agrupacións de Productores Agrarios (APAS) como sistema de favorece-la concentración da oferta agraria e a adecuación da producción ás existencias do mercado. O Ministerio de Agricultura, Pesca e Alimentación publicou con data do 21 de xaneiro de 1999 o Real decreto 2722/1998, do 18 de decembro, no que se desenvolve o réxime de axudas destinadas a promove-la constitución de APAS. No seu artigo 4 establécese que, no caso das APAS de ámbito xeográfico non superior ó dunha Comunidade Autónoma, correspóndelles a estes a tramitación, resolución e pagamento das axudas.
Por todo iso, en consonancia co establecido no artigo 30.I.3º do Estatuto de autonomía de Galicia e en uso das facultades que me confire a Lei 1/1983, do 22 de febreiro, reguladora da Xunta e do seu presidente
DISPOÑO:
Artigo 1º.-Obxecto.
Esta orde establece as bases reguladoras da tramitación de axudas para gastos de constitución e funcionamento das agrupacións de productores agrarios e as súas unións que teñan un ámbito xeográfico non superior ó de Galicia.
Artigo 2º.-Beneficiarios.
As agrupacións de productores e as súas unións recoñecidas a través do Regulamento 1360/1978, do Regulamento (CE) 952/1997, do Regulamento (CEE) 1696/1971 ou do Regulamento (CE) 2200/1996, e inscritas no correspondente rexistro.
Artigo 3º.-Solicitudes.
As solicitudes de axuda, dirixidas ó conselleiro de Agricultura, Gandería e Política Agroalimentaria, presentaranse no modelo que figura como anexo, xunto coa documentación adicional seguinte, referida ó período de funcionamento do que se solicita axuda:
-Memoria de actividades.
-Relación e xustificación do valor da producción comercializada.
-Relación e xustificación dos gastos de constitución, se é o caso, e de funcionamento.
-Balance e contas de resultados.
-Relación de socios.
-Declaración sobre outras axudas concedidas para o mesmo fin.
-Fotocopia do NIF e certificación bancaria da existencia da conta na que se solicita o ingreso da subvención.
-Acreditación formal de estar ó día nas obrigas tributarias e fronte á Seguridade Social, así como de non ter débedas pendentes de pagamento coa Administración pública da Comunidade Autónoma.
Artigo 4º.-Tramitación.
As solicitudes de axuda presentaranse prioritariamente nos servicios de Industrialización e Comercialización Agroalimentaria das delegacións provinciais correspondentes da consellería, sen prexuízo do disposto no artigo 38 da Lei 30/1992, do 26 de novembro, de réxime xurídico das administracións públicas e do procedemento administrativo común, modificada pola Lei 4/1999.
A Consellería de Agricultura, Gandería e Política Agroalimentaria resolverá as peticións presentadas seguindo a orde de presentación da documentación completa, e tendo en conta as dispoñibilidades orzamentarias de cada momento.
Artigo 5º
As solicitudes non resoltas no prazo de 6 meses consideraranse desestimadas.
Artigo 6º
A data máxima de presentación de solicitudes de axudas no exercicio orzamentario de 1999 remata o 30 de novembro de 1999.
Artigo 7º
O pagamento das subvencións efectuarase con cargo ó concepto orzamentario 09.04.615 A.470.0 dotado inicialmente cun importe de 77.500.000 ptas., así como con outros remanentes que puidesen existir no mesmo concepto.
Disposición transitoria
As solicitudes presentadas con anterioridade á data de publicación desta normativa ó abeiro dos regulamentos da Unión Europea ou das normas do Ministerio de Agricultura, Pesca e Alimentación e non resoltos seguirán o seu trámite.
Disposicións derradeiras
Primeira.-Facúltase o director xeral de Industrias e Alimentación para dicta-las disposicións necesarias para o desenvolvemento desta orde.
Segunda.-Esta orde entrará en vigor o día seguinte ó da súa publicación no Diario Oficial de Galicia.
Santiago de Compostela, 30 de setembro de 1999.
Cástor Gago Álvarez
Conselleiro de Agricultura, Gandería e Política
Agroalimentaria.
