A Administración do Estado pola Orde do 26 de febreiro de 1999, do Ministerio de Economía e Facenda, cedeu gratuitamente á Comunidade Autónoma de Galicia, Xunta de Galicia, o inmoble situado na rúa do Vilar, nº 7-9, de Santiago de Compostela (A Coruña), para destinalo á sede da Fundación Torrente Ballester.
Conforme ós artigos 17.1º da Lei 3/1985, do 12 de abril, do patrimonio da Comunidade Autónoma galega, e 34 do seu regulamento aprobado polo Decreto 50/1989, do 9 de marzo, a adquisición pura e simple de bens a título gratuíto ou lucrativo requirirá decreto do Consello da Xunta de Galicia, por proposta da Consellería de Economía e Facenda. Así mesmo, os artigos 23.1º da mesma lei e 38.1º do regulamento establecen que non se poderán adquirir bens ou dereitos a título lucrativo cando o valor global dos gravames, cargas ou afeccións impostos sobre eles supere o seu valor intrínseco, aínda que non se consideran carga, gravame ou afección os investimentos que teña que realiza-la Comunidade Autónoma para da-lo destino de uso xeral ou servicio público da súa competencia que fixe o cedente ou doador.
Na súa virtude, por proposta do conselleiro de Economía e Facenda, feita nos termos que a Administración do Estado acordou para esta cesión e logo de deliberación do Consello da Xunta de Galicia na súa reunión do día vinte de maio de mil novecentos noventa e nove,
DISPOÑO:
Artigo 1º
Acéptase a cesión gratuíta do inmoble situado na rúa do Vilar, de Santiago de Compostela (A Coruña), que, segundo o artigo primeiro da Orde do 26 de febreiro de 1999, do Ministerio de Economía e Facenda, se describe como segue:
Predio urbano consistente nun edificio con xardín na súa parte posterior, planta baixa e alta, con outra de faiado, situado na rúa do Vilar, nº 7-9, de Santiago
de Compostela (A Coruña). Ten unha superficie de 1.187 m segundo o rexistro. Estrema: fronte, rúa do Vilar; fondo, parcelas de Esperanza e Teresa García Buado e Consuelo Barreiro Iglesias; dereita, parcela de Eugenio Girón Rodríguez; esquerda, parcela de Alfonso Ponte Varela. Inscrito no Rexistro da Propiedade nº 2 de Santiago de Compostela, no tomo 1.143, libro 185, folio 219, predio nº 7452.
Artigo 2º
O inmoble cedido destinarase á sede da Fundación Torrente Ballester.
Artigo 3º
A Consellería de Economía e Facenda, a través da Secretaría Xeral e do Patrimonio, procederá á formalización da cesión no correspondente documento público e á inscrición do ben no Rexistro da Propiedade a nome da Comunidade Autónoma.
Disposición derradeira
A Consellería de Economía e Facenda, a través da Secretaría Xeral e do Patrimonio, levará a cabo tódolos trámites necesarios para a efectividade deste decreto.
Santiago de Compostela, vinte de maio de mil novecentos noventa e nove.
Manuel Fraga Iribarne
Presidente
José Antonio Orza Fernández
Conselleiro de Economía e Facenda