A Consellería de Medio Ambiente é o órgano da Administración da Comunidade Autónoma de Galicia que ten atribuídas as competencias e funcións que en materia de ambiente e conservación da natureza se establecen nos artigos 27.10º, 11º, 15º e 30º e 29.4º do Estatuto de autonomía de Galicia e demais normativa de aplicación. Ademais, de conformidade co disposto no Decreto 482/1997, do 26 de decembro, no artigo 7, punto 2.1, realizará as funcións relativas á formación dunha conciencia social para a defensa e mellora do contorno e a formación permanente en materia ambiental. Estas funcións desenvólvense mediante diversos plans, entre os que destaca o Plan de Difusión Ambiental.
Os Premios Medio Ambiente de Galicia teñen como finalidade dar pulo á cultura ambiental na Comunidade Autónoma, mediante o recoñecemento de persoas, colectivos, empresas e institucións que destacasen na defensa dos valores ambientais no ámbito territorial de Galicia, Así como promove-la difusión de tales valores pola repercusión que estes premios teñen nos medios de comunicación e sobre a opinión pública.
Para tal efecto, no uso das atribucións que me confire o artigo 34 da Lei 1/1983, do 22 de febreiro, modificada pola Lei 11/1998, do 20 de outubro, en relación cos artigos 27.11º e 30 do Estatuto de autonomía para Galicia e o Decreto 482/1997, do 26 de decembro,
DISPOÑO:
Artigo 1º
Convoca-los premios Medio Ambiente de Galicia 1999.
Artigo 2º.-Premios.
1. Convócanse os seguintes premios:
a) Premio Medio Ambiente de Galicia ó labor de profesionais dos medios de comunicación por accións meritorias no ámbito da difusión e divulgación ambiental.
b) Premio Medio Ambiente de Galicia ó traballo de investigación científica sobre temática ambiental.
c) Premio Medio Ambiente de Galicia pola acción ou campaña escolar de temática ambiental levada a cabo por alumnos e profesores de centros de ensino dos niveis non universitarios.
d) Mencións honoríficas, que poderán ser outorgadas con carácter extraordinario, xustificando a súa concesión.
2. A dotación de cada un dos premios será de 1.000.000 de pesetas (6.010,12 euros). O pagamento dos premios farase con cargo ó concepto 15.04.342A.6401 do orzamento vixente.
3. As mencións honoríficas non terán dotación económica.
4. As actividades propostas para premio deberon ser desenvolvidas no ano 1998.
Artigo 3º.-Participación.
1. As candidaturas poderán ser presentadas polos propios candidatos ou por outras persoas, entidades ou institucións.
2. Cada candidatura soamente poderá ser presentada a unha das modalidades.
3. As propostas de candidaturas acompañaranse dunha memoria na que se xustifiquen as razóns polas que se opta ó premio. En caso de que a solicitude non sexa presentada pola candidata/o deberá acompañarse dun documento que exprese a aceptación por parte da candidata/o da nominación e, de ser concedido, do premio correspondente.
Artigo 4º.-Presentación e prazos.
1. As propostas realizaranse mediante instancia dirixida ó conselleiro de Medio Ambiente e serán presentadas en sobre pechado no Centro de Información e Tecnoloxía Ambiental da Consellería de Medio Ambiente. Rúa Os Basquiños nº 2, 15071 Santiago de Compostela, ou en calquera dos lugares establecidos no Art. 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común.
2. O prazo de presentación das candidaturas será de 60 días naturais contados a partir do seguinte ó da publicación desta convocatoria no Diario Oficial de Galicia.
Artigo 5º.-Xurado e concesión dos premios.
1. O xurado estará constituído polos seguintes membros:
Presidente: o conselleiro de Medio Ambiente ou persoa en que delegue.
Vicepresidente: o secretario xeral da Consellería de Medio Ambiente ou persoa en que delegue.
Vocais: o director xeral do Centro de Información e Tecnoloxía Ambiental ou persoa en que delegue. Un representante dos colectivos ecoloxistas. Un representante do sistema universitario de Galicia. Un representante dos medios de comunicación.
Secretario: con voz e sen voto, o xefe de Área de Información, Formación e Educación Ambiental.
2. O xurado actuará segundo o disposto no título II, capítulo II da Lei 30/1992, do 26 de novembro, de réxime xurídico das administracións públicas e do procedemento administrativo común.
3. O xurado acordará a concesión dos premios; este acordo porá fin á vía administrativa e poderá declarar deserta total ou parcialmente a súa concesión.
4. O acordo será publicado no Diario Oficial de Galicia e notificado persoalmente ós adxudicatarios polos medios previstos no artigo 59 da Lei 30/1992, do 26 de novembro, de réxime xurídico das administracións públicas e do procedemento administrativo común.
Santiago de Compostela, 5 de maio de 1999.
José Carlos del Álamo Jiménez
Conselleiro de Medio Ambiente