Mediante os decretos 211/1998, do 25 de xuño, e 229/1998, do 24 de xullo, créanse os complexos hospitalarios de Ourense e Pontevedra respectivamente, e establécese a súa estructura organizativa.
Os complexos hospitalarios nacen como estructuras que organizan e coordinan os diferentes centros sanitarios que os conforman. Esta nova organización, constituída por uns órganos comúns para todo o complexo, necesita ser habilitada para o exercicio das funcións executivas e de coordinación que lle son propias, en interese de facer operativas os seus obxectivos fundacionais.
Na súa virtude, facendo uso das facultades que me confire o artigo 34 da Lei 1/1983, do 22 de febreiro, reguladora da Xunta e do seu presidente, reformada pola Lei 11/1988, do 20 de outubro, o artigo 3.2º do Decreto 49/1998, do 5 de febreiro, polo que se establece a estructura orgánica dos servicios centrais do Servicio Galego de Saúde, e o artigo 72.4º da Lei 11/1992, do 7 de outubro, de réxime financeiro e presupostario de Galicia, e tendo en conta o disposto no artigo 13 da Lei 30/1992, do 26 de novembro, de réxime xurídico das administracións públicas e do procedemento administrativo común,
DISPOÑO:
Artigo único.
Délegase nos xerentes xerais dos complexos hospitalarios de Ourense e Pontevedra, en relación cos respectivos centros de gasto que os conforman, as seguintes facultades:
a) En relación co persoal non directivo dependente do complexo, a autorización das comisións de servicios con dereito a indemnización e a autorización para a asistencia a cursos, xornadas e, en xeral, actos de capacitación ou perfeccionamento.
b) En relación co persoal funcionario e laboral dependente do complexo, que ocupe postos de traballo incluídos nas relacións de posto de traballo, a concesión de permisos e licencias que non teñan repercusión na súa nómina.
c) En relación co persoal estatutario e co persoal funcionario e laboral dependente do complexo, non incluído nas relacións de postos de traballo, a concesión de permisos e licencias que non excedan dun mes de duración e as súas prórrogas.
d) A autorización das comisións de servicio con dereito á indemnización que se ralicen dentro da Comunidade Autónoma por eles mesmos ou polo persoal directivo do complexo.
e) A autorización, para o persoal estatutario, dos permisos sen soldo regulamentarios ou as súas prórrogas cando sexan iguais ou inferiores a un mes en cada ano natural.
f) A expedición das dilixencias de posesión, incorporación ou cesamento que, se é o caso, se produzan.
Tales dilixencias deberán ser notificadas á respectiva dirección provincial.
g) O nomeamento ou contratación de persoal temporal das institucións ou servicios deles dependentes, logo da autorización da correspondente dirección provincial, así como a selección e nomeamento de persoal temporal na categoría de facultativo especialista.
Os acordos que se adopten no ámbito sinalado nesta alínea deberán ser notificados á División de Recursos Humanos e á respectiva dirección provincial.
h) O control do horario e de asistencia e presencia física do persoal do complexo.
i) A autorización dos gastos e a proposta dos pagamentos con cargo ós orzamentos dos respectivos centros que forman o complexo hospitalario integrados no orzamento do organismo autónomo, así como a actuación como órgano de contratación nos contratos de obras, subministracións, consultoría e asistencia, de servicios e para a realización de traballos específicos e concretos non habituais, imputables ós créditos orzados ou habilitados a estes centros de gastos ata un importe de 200.000.000 de ptas. aínda que, cando a contía exceda de 50.000.000 de ptas., se requirirá autorización expresa da División de Recursos Económicos.
Esta delegación entenderase para a autorización de gastos, propostas de pagamento e celebración de contratacións consideradas, tanto de forma individual coma conxunta, nun mesmo expediente para os diferentes centros de gastos que conforman o complexo.
j) A celebración dos contratos administrativos especiais logo de autorización expresa da División de Recursos Económicos.
Disposición derradeira
Esta orde entrará en vigor o día seguinte ó da súa publicación no Diario Oficial de Galicia.
Santiago de Compostela, 18 de marzo de 1999.
José María Hernández Cochón
Conselleiro de Sanidade e Servicios Sociais
e Presidente do Servicio Galego de Saude