Tanto a Lei 3/1983, de normalización lingüística, coma o Decreto 247/1995, que a desenvolve no tocante ó ensino non universitario, buscan, por unha
parte, que os alumnos vaian acabando cada unha das etapas do ensino cun dominio semellante do galego e do castelán, e, por outra, que o galego sexa a lingua de uso habitual non só da Administración educativa, senón tamén das actividades relacionais, organizativas e culturais dos centros educativos.
Para axudar a isto cómpre contar cun profesorado que coñeza e domine o galego dun xeito suficiente non só para imparti-las clases no idioma propio de Galicia, senón tamén para facelo coa calidade que axude a mellora-lo dominio que desa lingua teñen os alumnos.
A promoción e o ensino da lingua galega correspóndenlle á Consellería de Educación e Ordenación Unversitaria, tal e como o determinan os decretos 213/1998, polo que se establece a estructura orgánica da propia consellería, e 247/1995, antes citado. Consecuentemente, é labor desa consellería a organización dos cursos e das actividades formativas precisas para que o persoal ó seu servicio acade o necesario dominio oral e escrito do idioma galego.
Por todo isto, a Consellería de Educación e Ordenación Universitaria
DISPÓN:
Artigo 1º
1. Convócanse cursos de iniciación e de perfeccionamento de lingua galega para mestres e profesores de primaria, secundaria, de ensinanzas especiais e de formación profesional, dos centros públicos, privados e privados concertados da Comunidade Autónoma de Galicia, que se celebrarán naquelas localidades que determine a Consellería de Educación e Ordenación Universitaria, a través da Dirección Xeral de Política Lingüística, segundo as solicitudes e a súa distribución xeográfica.
2. O gasto ocasionado pola celebración destes cursos financiarase con cargo á partida 07.06.353F.640.2 dos orzamentos xerais da Comunidade Autónoma de Galicia para 1999, aprobados pola Lei 6/1998, do 29 de decembro, por unha contía máxima de 12.000.000 (doce millóns) de pesetas.
Artigo 2º
1. Os cursos impartiranse durante o ano 1999. A data de comezo, o lugar de celebración e o horario determinaraos a Consellería de Educación e Ordenación Universitaria, a través da Dirección Xeral de Política Lingüística.
2. Os cursos terán unha duración de 75 horas e responderán ós contidos sinalados na orde do 1 de marzo de 1989, pola que se regulan os cursos de iniciación e de perfeccionamento.
3. A asistencia ás clases é obrigatoria. A ausencia de cada un dos asistentes non poderá ser superior ó 10% da duración total do curso.
4. A avaliación que se realice nestes cursos deberá responder ós principios de formativa e continua e terá en conta o dominio oral e escrito do idioma, efectuándose as probas necesarias. Ó remate de cada curso, ós asistentes que teñan superadas as distintas fases da avaliación outorgaráselles un certificado coa cualificación de apto.
Artigo 3º
1. As solicitudes presentaranse, utilizando o modelo de formulario que figura como anexo a esta orde, no rexistro das respectivas delegacións provinciais da Consellería de Educación e Ordenación Universitaria, ou ben por calquera dos medios que recolle o artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común.
2. O prazo de presentación será o dos vinte días hábiles seguintes ó da publicación desta orde no Diario Oficial de Galicia.
Artigo 4º
1. O número de asistentes a cada curso será de 30 como máximo e de 15 como mínimo.
2. Admitiranse tódolos mestres e profesores solicitantes, segundo os datos debidamente acreditados que fagan constar na súa solicitude, asignándolles praza nunha localidade determinada en función das necesidades organizativas.
3. Para acceder ó curso de perfeccionamento será requisito indispensable ter aprobado o curso de iniciación (ou telo validado segundo o establecen as respectivas ordes da Consellería de Educación e Ordenación Universitaria). Ó formulario de solicitude unirase unha copia compulsada da correspondente certificación ou validación.
Artigo 5º
Tódalas actividades que se realicen nos cursos faranse en galego e ateranse, no tocante á normativa e ó uso correcto do idioma (tal e como determina a disposición adicional da Lei 3/1983, de normalización lingüística), ó establecido pola Real Academia Galega.
Disposición derradeira
1. Autorízase o director xeral de Política Lingüística para dictar, no ámbito das súas competencias, as resolucións que sexan necesarias para o desenvolvemento desta orde.
2. Esta orde entrará en vigor o día seguinte ó da súa publicación no Diario Oficial de Galicia.
Santiago de Compostela, 8 de febreiro de 1999.
Celso Currás Fernández
Conselleiro de Educación e Ordenación
Universitaria