Por orde do 31 de xullo de 1998 (DOG do 19 de agosto) aprobáronse os concertos educativos cos centros docentes privados, concedéndolle ó centro privado Divino Maestro de Ourense o concerto para 0/6 unidades de educación primaria, 0/2 unidades do 1º ciclo da ESO e 1 unidade de 3º da ESO.
Tendo en conta que dito centro tiña a consideración de centro público de réxime especial, pasando a ser centro privado concertado, e que, con posterioridade á publicación da antedita Orde do 31 de xullo de 1998, se produce tres vacantes ó trasladarse dous profesores estatais con destino definitivo e un con destino provisional.
Vistos a Lei orgánica 8/1985, do 3 de xullo, reguladora do dereito á educación (BOE do 4) e o Real decreto 2377/1985, do 18 de decembro, polo que se aproba o Regulamento de normas básicas sobre concertos educativos (BOE do 27).
Considerando que, ó abeiro do establecido na disposición adicional quinta do devandito Real decreto 2377/1985, as prazas existentes, ocupadas por profesores estatais, amortizaranse no momento en que se produzan vacantes e, polo tanto, procede a súa substitución por profesores que o centro privado concertado Divino Maestro debe contratar aténdose ó establecido na Lei orgánica 8/1985.
Polo anteriormente exposto e por proposta da Dirección Xeral de Centros e Inspección Eucativa, esta consellería
DISPÓN:
Primeiro.-Aproba-la modificación do concerto educativo co centro privado Divino Maestro de Ourense, quedando coa seguinte configuración: 0/6 unidades de educación primaria, 2/2 unidades do 1º ciclo da Eso e 1 unidade de 3º curso da ESO.
Segundo.-O documento administrativo no que se formalizará a dita modificación do concerto educativo será asinado polo titular da Consellería de Educación e Ordenación Universitaria e polo titular do centro privado ou persoa con representación debidamente acreditada.
Se o titular do centro privado non subscribise o documento de formalización na data que se lle notifique, entenderase decaído no seu dereito.
Terceiro.-A modificación que, por esta orde se aproba terá efectos desde o inicio do curso académico 1998-99.
Cuarto.- De acordo co establecido na Lei 30/1992, do 26 de novembro, de réxime xurídico das administracións públicas e do procedemento administrativo común, a presente resolución esgota a vía administrativa polo que, contra ela, poderá interporse recurso contencioso-administrativo perante os órganos competentes para entenderen dos recursos contencioso-administrativos, no prazo de dous meses contados desde o día seguinte ó da súa publicación no Diario Oficial de Galicia.
Santiago de Compostela, 2 de febreiro de 1999.
Celso Currás Fernández
Conselleiro de Educación e Ordenación
Universitaria