O Decreto 307/1989, polo que se regula o sistema de arquivos e o patrimonio documental de Galicia, atribúelle á Consellería de Cultura, Comunicación Social e Turismo a competencia de velar pola conservación, organización e difusión do patrimonio documental de Galicia, así como a responsabilidade de fomenta-la adecuada formación do persoal técnico de arquivos. Coñecendo, por outra banda, as necesidades de organización e descrición de fondos documentais de moitos arquivos galegos pola importancia que teñen para garanti-los dereitos e obrigas dos cidadáns e as actividades da propia Administración, esta consellería convoca bolsas de formación e colaboración co fin de proceder á organización deses fondos documentais. Pero é preciso poñer un límite de desfrute destas bolsas, xa que se trata de bolsas de formación e colaboración que intentan da-la posibilidade de completar unha determinada formación académica ó maior número posible de persoas.
Por todo isto,
DISPOÑO:
Artigo 1º
Convócanse 21 bolsas de colaboración para:
a) Elaboración do censo-guía de arquivos da provincia de Ourense.
b) Organización e descrición de fondos de arquivos de interese galego, con cargo á aplicación orzamentaria 10.03.352B.481.0 dos orzamentos xerais da Comunidade Autónoma de Galicia para 1999. O importe total das bolsas non excederá en ningún caso de 15.061.110 pesetas.
2. As bolsas irán destinadas á elaboración do censo-guía dos arquivos da provincia de Ourense e a tarefas de organización e descrición de arquivos municipais de Galicia, e outros arquivos de interese galego.
Os bolseiros realizarán os seus traballos en diversos municipios de Galicia, ou outros centros nos que sexan destinados e serán coordinados e dirixidos pola Dirección Xeral de Patrimonio Cultural da Consellería de Cultura, Comunicación Social e Turismo e por persoal técnico facultativo debidamente cualificado, designado para o efecto por aquela.
3. Os traballos terán unha duración de 6 meses, a partir da data de incorporación que estableza a Dirección Xeral de Patrimonio Cultural da Consellería de Cultura, Comunicación Social e Turismo.
4. Os bolseiros seleccionados quedarán obrigados a:
-Asistir diariamente durante un mínimo de cinco horas ós centros onde resulten destinados. O horario será o establecido polos Servicios Técnicos da Dirección Xeral de Patrimonio Cultural de acordo co centro de destino.
-A segui-las indicacións técnicas dos coordinadores.
-A entregarlles ós coordinadores mensualmente informe dos traballos realizados e ó finaliza-la bolsa informe técnico ou memoria correspondente ça totalidade do traballo, así como copia dos instrumentos de descrición documental resultado deste.
Ó remata-la actividade, os coordinadores dos bolseiros depositarán na Dirección Xeral de Patrimonio Cultural da Consellería de Cultura, Comunicación Social e Turismo os informes e copia dos instrumentos de descrición documental realizados por cada bolseiro. O orixinal destes instrumentos descritivos quedará depositado no mesmo lugar no que se realice o traballo.
Artigo 2º
1. Requisitos dos solicitantes:
-Ser licenciados con formación en historia, con coñecementos de arquivística e/ou experiencia de traballo en arquivos.
-Non ter desfrutado con anterioridade de tres ou máis bolsas completas das convocadas por esta Dirección Xeral de Patrimonio Cultural para a organización e descrición de arquivos galegos.
2. Presentación de solicitudes:
As solicitudes presentaranse conforme o modelo oficial, que figura como anexo I desta orde, no rexistro xeral da Consellería de Cultura, Comunicación Social e Turismo ou nas súas delegacións provinciais. O prazo de presentación será de 15 días naturais contados a partir do día seguinte ó da publicación no Diario Oficial de Galicia.
Sen prexuízo do establecido no parágrafo anterior, as solicitudes poderán así mesmo presentarse en calquera das formas previstas no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común.
3. Documentación que hai que presentar:
Os solicitantes deberán xunta-la seguinte documentación:
-Fotocopia do DNI.
-Declaración responsable de non ter emprego remunerado nin desfrutar doutra bolsa ou axuda, calquera que fose esta, situacións que producen incompatibilidade co desfrute da bolsa que nesta orde se convoca.
-Fotocopia compulsada do expediente académico.
-Anexos I e II debidamente cubertos e fotocopia dos méritos alegados. Só contabilizarán aqueles méritos dos que se achegue proba documental.
4. Unha vez outorgadas as bolsas, a Dirección Xeral de Patrimonio Cultural poderalles solicitar ós seleccionados a presentación dos orixinais ou fotocopia compulsada dos méritos alegados, que deberán presentarse nun prazo máximo de tres días, contados a partir do momento do seu requirimento público.
5. En caso de renunciar á bolsa, os interesados deberán comunicalo por escrito á Dirección Xeral de Patrimonio Cultural, no prazo de tres días desde a notificación nos taboleiros de anuncios da Consellería de Cultura, Comunicación Social e Turismo, e nos das súas delegacións provinciais. De non presentarse a renuncia no tempo estipulado, o nomeamento quedará sen efecto e será motivo de exclusión na seguinte convocatoria.
Así mesmo, a renuncia durante o período de desfrute da bolsa inhabilitará o seu adxudicatario/a para efectos de presentación na próxima convocatoria.
6. Serán tamén causas de exclusión a demostración de falsidade documental, a non correspondencia cos orixinais ou incorrección na documentación presentada.
Artigo 3º
1. As bolsas serán adxudicadas para a elaboración do censo-guía de arquivos da provincia de Ourense e para a organización de fondos dos arquivos de Galicia que se relacionan no anexo II.
2. Resérvanse 3 bolsas para licenciados de calquera das universidades de Galicia, que obtiveran a licenciatura nos anos 1996, 1997 e 1998 e teñan a especialidade de arquivística.
Artigo 4º
O importe de cada bolsa non excederá da cantidade de oitocentas setenta mil pesetas (870.000 ptas.) para os bolseiros do censo-guía, e seiscentas noventa e unha mil setecentas vinteoito pesetas (691.728 ptas.) para as bolsas destinadas á organización e descrición de arquivos de interese galego.
Artigo 5º
1. Os correspondentes servicios técnicos da Dirección Xeral de Patrimonio Cultural da Consellería de Cultura, Comunicación Social e Turismo poderán
reclamarlles, se fose necesario, ós solicitantes que emenden os defectos administrativos apreciados na documentación esixida, de acordo co artigo 71 da Lei 30/1992, do 26 de novembro, de réxime xurídico das administracións públicas e do procedemento administrativo común, outorgándose un prazo de 10 días desde a recepción do escrito de requirimento.
2. A avaliación dos méritos alegados, que corresponde á Dirección Xeral de Patrimonio Cultural da Consellería de Cultura, Comunicación Social e Turismo, farase segundo o seguinte baremo:
a) Licenciatura nunha universidade da Comunidade Autónoma de Galicia: 1 punto.
b) Experiencia de traballo:
-Traballo remunerado en organización e descrición de arquivos públicos municipais ou na elaboración do censo-guía. Por cada mes traballado: 0,75 puntos ata un máximo de 9 puntos.
-Traballo remunerado en organización e descrición noutro tipo de arquivos públicos. Por cada mes traballado : 0,50 puntos ata un máximo de 6 puntos.
-Traballo remunerado en organización e descrición de arquivos privados. Por cada mes traballado: 0,25 puntos ata un máximo de 3 puntos.
-Traballo non remunerado en organización e descrición de arquivos públicos ou privados con dirección técnica certificada. Por cada mes traballado: 0,10 puntos ata un máximo de 1,20 puntos.
c) Especialización:
-Especialidade universitaria en arquivística: 2 puntos.
-Master en arquivística: 2 puntos.
-Certificado de escola-obradoiro en arquivística: 2 puntos.
d) Cursos de arquivística, diplomática, paleografía e historia das institucións:
-Con acreditación expresa de 100 horas ou máis de duración: 0,70 puntos ata un máximo de 2,40 puntos.
-Con acreditación expresa de 60 horas ou máis de duración: 0,50 puntos ata un máximo de 2 puntos.
-Con acreditación expresa de 40 horas ou máis de duración: 0,30 puntos, ata un máximo de 1,5 puntos.
-Con acreditación expresa entre 25 e 40 horas de duración: 0,20 puntos ata un máximo de 1 punto.
-Con duración entre 10 e 25 horas: 0,10 puntos ata un máximo de 0,80 puntos.
e) Congresos, xornadas e seminarios:
-Asistencia a congresos, xornadas ou seminarios de arquivística, diplomática, paleografía ou historia das institucións: 0,10 puntos ata un máximo de 1 punto.
-Presentación de comunicacións en congresos, xornadas ou seminarios sobre arquivística, diplomática, paleografía ou historia das institucións: 0,50 puntos ata un máximo de 2 puntos.
-Presentación de relatorios en congresos, xornadas ou seminarios sobre arquivística, diplomática, paleo
grafía ou historia das institucións: 1 punto ata un máximo de 3 puntos.
f) Publicacións relacionadas coa arquivística, paleografía, diplomática e historia das institucións, impresas antes do remate do prazo de presentación de solicitudes:
-Por cada libro: 1 punto ata un máximo de 3 puntos.
-Por cada artigo en revista especializada: 0,25 puntos ata un máximo de 2 puntos.
-Pola publicación efectiva de inventarios ou catálogos: 0,25 puntos ata un máximo de 2 puntos.
Os cursos e congresos non específicos que se acrediten, deberán acompañarse do seu correspondente programa.
O mesmo mérito só se valorará unha única vez: como comunicación, publicación ou asistencia a congresos.
g) Cursos de galego:
-Iniciación: 0,5 puntos.
-Iniciación e/ou perfeccionamento: 1 punto.
h) Cursos de informática:
-Informática en xeral: 0,10 puntos por curso ata un máximo de 1 punto.
-Informática aplicada ós arquivos: 0,25 puntos por curso ata un máximo de 1,50 puntos.
3. A selección das bolsas de reserva de praza destinadas a licenciados dos anos 1996, 1997 e 1998 efectuarase de acordo coas cualificacións obtidas na totalidade das materias correspondentes a tódolos cursos da licenciatura e o número de convocatorias, resultando seleccionados aqueles solicitantes que obteñan a puntuación máis alta.
4. As listas provisionais de bolseiros exporanse nos taboleiros de anuncios da Consellería de Cultura, Comunicación Social e Turismo e nos das súas delegacións provinciais. O prazo de exposición será de 10 días naturais contados a partir do día seguinte ó da súa publicación, e durante os cales poderanse face-las alegacións pertinentes.
5. A resolución da convocatoria correspóndelle ó conselleiro de Cultura, Comunicación Social e Turismo, por proposta do director xeral de Patrimonio Cultural. O acordo farase público, para efectos de notificación ós interesados, nos taboleiros de anuncios da Consellería de Cultura, Comunicación Social e Turismo e nos das súas delegacións provinciais.
Calquera notificación ou requirimento ós interesados farase a través dos taboleiros de anuncios da Consellería de Cultura, Comunicación Social e Turismo e nos das súas delegacións provinciais.
6. A resolución de adxudicación pon fin á vía administrativa de acordo co artigo 109 da Lei 30/1992, do 26 de novembro, e contra esta cabe interpoñer recurso contencioso-administrativo perante o Tribunal Superior de Xustiza de Galicia, no prazo de
dous meses contados a partir da súa data de notificación ós interesados.
7. Unha vez rematado o período de desfrute da bolsa, as persoas non seleccionadas poderán solicita-la devolución da documentación presentada. Transcorrido o prazo dun ano, procederase á eliminación da documentación non recollida.
Artigo 6º
O pagamento da bolsa axustarase á normativa orzamentaria de aplicación.
Ós adxudicatarios das bolsas poderáselles requiri-la documentación necesaria para proceder ó pagamento da dita bolsa.
Artigo 7º
1. No caso de que os beneficiarios das bolsas incumprisen algunha das condicións ou obrigas estipuladas na presente orde, a Consellería de Cultura, Comunicación Social e Turismo, instruirá expediente sancionador conforme o previsto na Lei 30/1992, do 26 de novembro, e poderá mesmo anula-los beneficios concedidos e solicita-la devolución das cantidades percibidas, se as houbese, nos prazos que establece o Regulamento xeral de recadación.
2. O persoal técnico e facultativo que en cada provincia coordine e dirixa os bolseiros poderá propoñerlle á Dirección xeral de Patrimonio Cultural da Consellería de Cultura, Comunicación Social e Turismo, a extinción da bolsa por falta de dedicación ou incumprimento das condicións sinaladas.
3. A Dirección xeral de Patrimonio Cultural da Consellería de Cultura, Comunicación Social e Turismo, expedirá, logo do informe favorable dos coordinadores, ó remata-los traballos, certificación acreditativa da prestación de servicios.
4. As bolsas non implicarán relación funcionarial nin laboral coa Consellería de Cultura, Comunicación Social e Turismo, nin compromiso que se estenda máis alá do seu ámbito de duración.
Artigo 8º
A Consellería de Cultura, Comunicación Social e Turismo poderá facer pública unha nova convocatoria en iguais ou diferentes termos, no caso de que as adxudicacións acordadas non cubrisen a totalidade do crédito asignado.
Disposicións derradeiras
Primeira.-Autorízase o director xeral de Patrimonio Cultural para dictar, no ámbito das súas competencias, as resolucións precisas para o desenvolvemento desta orde.
Segunda.-Esta orde entrará en vigor o día seguinte ó da súa publicación no Diario Oficial de Galicia.
Santiago de Compostela, 11 de febreiro de 1999.
Jesús Pérez Varela
Conselleiro de Cultura, Comunicación
Social e Turismo
ANEXO II
1. Os que optaren ás bolsas de elaboración do censo-guía de arquivos de Galicia ou ás bolsas de organización e descrición de arquivos de interese galego adxudicadas polo baremo xeral, sinalen por orde de preferencia do 1 ó 16 os destinos elixidos:
Bolsas para a elaboración do censo-guía de arquivos de Galicia:
Provincia de Ourense: 3 bolsas.
Bolsas de colaboración en arquivos de interese galego: baremo xeral.
-Provincia da Coruña.
Instituto Xelmírez (Santiago de Compostela)/ A. municipal de Lousame: 1 bolsa.
Arquivos municipais de Val do Dubra e Trazo: 1 bolsa.
Arquivos municipais de Valdoviño e San Sadurniño: 1 bolsa.
Arquivo municipal das Somozas: 1 bolsa.
Arquivo municipal de Monfero: 1 bolsa.
Arquivo municipal de Narón: 1 bolsa.
-Provincia de Lugo.
Arquivos municipais do Incio e Sarria: 1 bolsa.
Arquivos municipais do Valadouro e Alfoz: 1 bolsa.
Arquivo municipal de Guntín: 1 bolsa.
Arquivo municipal de Portomarín: 1 bolsa.
-Provincia de Ourense.
Arquivo municipal de Ribadavia: 1 bolsa.
Arquivo municipal de Baños de Molgas: 1 bolsa.
Arquivos municipais do Irixo e Boborás: 1 bolsa.
Arquivos municipais do Bolo e A Veiga: 1 bolsa.
-Provincia de Pontevedra.
Arquivo municipal de Agolada: 1 bolsa.
2. Os que optasen pola modalidade de reserva de praza, sinalen por orde de preferencia do 1 ó 3 os destinos para elixir:
Arquivo municipal de Lugo: 1 bolsa.
Arquivo municipal de Pontevedra: 1 bolsa.
Arquivo municipal de Covelo: 1 bolsa.
Os destinos non sinalados entenderanse como non elixidos e polo tanto como expresamente renunciados.