Polo Decreto 302/1995, do 16 de novembro, foi declarada de utilidade pública e urxente execución a concentración parcelaria da zona de Troáns (Cuntis-Pontevedra), resultando afectadas pola concentración aproximadamente 660 hectáreas, susceptibles de modificacións ó abeiro dos artigos 23 e seguintes da Lei 10/1985, do 14 de agosto, de concentración parcelaria para Galicia.
Paralelamente ó proceso concentrador desta zona, estivéronse a desenvolve-los trámites administrativos necesarios para a construcción dunha presa que vai afectar a distintos terreos e propietarios da zona de concentración parcelaria de Troáns (Cuntis-Pontevedra), o que fai aconsellable a execución en distintas etapas da concentración parcelaria nesta zona, mediante a división en sectores dos terreos afectados, co que se acadaría a necesaria axilización do proceso de concentración co fin de proceder á nova reestructuración da propiedade.
Na súa virtude, por proposta do conselleiro de Agricultura, Gandería e Política Agroalimentaria, formulada conforme o establecido na Lei 10/1985, do 14 de agosto, de concentración parcelaria para Galicia e logo de deliberación do Consello da Xunta de Galicia na súa reunión do día dez de setembro de mil novecentos noventa e oito,
DISPOÑO:
Artigo 1º.
Divídese en dous sectores a zona de concentración parcelaria de Troáns (Cuntis-Pontevedra), que quedarán conformados do xeito seguinte:
-Sector Troáns I, que comprenderá a totalidade dos terreos dos lugares de Sobrada, Guldrigáns, O Campo, Pena de Arriba, San Ildefonso, Folgar, A Cova e Lornés.
-Sector Troáns II, que comprenderá a totalidade dos terreos afectados polo encoro, incluíndo os lugares de Hervés, Novás, Vilabar de Abaixo e Pena de Vilabar.
Artigo 2º.
A execución e publicación das distintas fases do proceso de concentración poderán realizarse en cada un dos sectores con independencia do outro.
Disposicións derradeiras
Primeira.-Facúltase a Consellería de Agricultura, Gandería e Política Agroalimentaria para dicta-las
disposicións complementarias que requira a execución do presente decreto.
Segunda.-Esta disposición entrará en vigor o día seguinte ó da súa publicación no Diario Oficial de Galicia.
Santiago de Compostela, dez de setembro de mil novecentos noventa e oito.
Manuel Fraga Iribarne
Presidente
Cástor Gago Álvarez
Conselleiro de Agricultura, Gandería e Política Agroalimentaria
8540