Visto o expediente do convenio colectivo para a empresa Frigodís, S.A., que tivo entrada nesta delegación provincial o día 22-7-1998, subscrito en representación da parte económica por unha representación da empresa, e da parte social, polo comité de empresa, en data 24-6-1998. De conformidade co disposto no artigo 90.2º e 3º, do Real decreto lexislativo 1/1995, do 24 de marzo, polo que se aproba o texto refundido da Lei do Estatuto dos traballadores, Real decreto 1040/1981, do 22 de maio, sobre rexistro e depósito de convenios colectivos de traballo e Real decreto 2412/1982, do 24 de xullo, sobre traspaso de funcións e servicios da Administración do Estado á Comunidade Autónoma de Galicia, en materia de traballo, esta delegación da Consellería de Xustiza, Interior e Relacións Laborais da provincia de Pontevedra

ACORDA:

Primeiro.-Ordena-la súa inscrición no libro de rexistro de convenios colectivos de traballo, obrante nesta delegación provincial, e a notificación ás representacións económica e social da comisión negociadora.

Segundo.-Ordena-lo seu depósito no Servicio de Relacións Laborais, Sección de Mediación, Arbitraxe e Conciliación.

Terceiro.-Dispoñe-la súa publicación no Diario Oficial de Galicia.

Vigo, 29 de xullo de 1998.

Antonio Coello Bufill

Delegado provincial de Pontevedra

Convenio colectivo de Frigodís, S.A. 1998

Ámbito de aplicación e disposicións xerais

Artigo 1º.-Ámbito territorial.

O presente convenio colectivo establece as bases para as relacións laborais entre a empresa Frigodís, S.A. e os seus traballadores adscritos ós centros de traballo seguintes:

Sede central (r/ Jacinto Benavente-Vigo).

Cámara de Vigo (r/ Jacinto Benavente-Vigo).

Cámara de Chapela.

Artigo 2º.-Ámbito persoal.

O presente convenio colectivo comprende todo o cadro de persoal nas súas distintas categorías profesionais existente no momento da sinatura, nos centros de traballo aludidos no artigo anterior, así como os que posteriormente se incorporen ós respectivos cadros de persoal.

Exclúese o persoal de descarga de buques.

Artigo 3º.-Vixencia.

O convenio entrará en vigor o 1 de xaneiro de 1998 e terá vixencia ata o 31 de decembro do mesmo ano, e será denunciado por escrito polo menos cun mes de antelación á data do seu vencemento; en caso contrario prorrogarase por períodos anuais sucesivos.

Artigo 4º.-Determinación das partes que o concertan.

As partes asinantes deste convenio foron, pola parte empresarial, Fernando Ilarri Junquera e Josefa Vilaboa Rodríguez e pola parte social os membros do comité de empresa que asinan abaixo.

Artigo 5º.-Condicións máis beneficiosas.

A empresa respectará as condicións máis beneficiosas de que viña desfrutando o persoal, incorporadas no seu contrato individual.

O conxunto das condicións pactadas neste convenio absorberá e compensará aquelas melloras que puidesen establece-las disposicións legais vixentes en cada momento.

Tódalas condicións económicas establecidas neste convenio teñen o carácter de mínimas e son as que figuran nas táboas salariais anexas.

Artigo 6º.-Comisión paritaria.

Para a interpretación e vixilancia das condicións xerais pactadas neste convenio, crearase unha comisión paritaria composta por:

Parte social: o presidente do comité de empresa, secretario do comité de empresa e un representante de cada un dos sindicatos.

Parte empresarial: cinco membros designados pola empresa.

En caso de que existan discrepancias entre as partes e que non se logre chegar a un acordo, someteranse á xurisdicción laboral competente.

Artigo 7º.-Vinculación á totalidade.

As condicións pactadas neste convenio colectivo forman un todo orgánico e indivisible e, para efectos da súa aplicación práctica, serán consideradas globalmente en cómputo anual.

No suposto de que a autoridade ou xurisdicción competente, no exercicio das súas facultades, non

aprobase ou modificase algunha das súas cláusulas, as partes deberán reunirse para revisa-lo convenio.

Organización do traballo

Artigo 8º.-Principios xerais.

A organización práctica do traballo, respectando a lexislación vixente en cada momento, é facultade da dirección da empresa e, por delegación, dos seus mandos ou representantes legais.

Todo sen mingua das funcións de información que as mesmas disposicións legais lles atribúan ós representantes dos traballadores, comité de empresa e seccións sindicais, se for o caso.

É política común dos traballadores e da dirección o mantemento de actitudes de información, diálogo e negociación que conduzan a esquemas participativos.

A empresa manterá e fomentará a formación e promoción profesional dos seus traballadores. Anualmente comunicaráselle ó comité de empresa o plan de formación.

Artigo 9º.-Clasificación do persoal.

O persoal ó servicio da empresa, incluído no ámbito de aplicación deste convenio, queda encadrado nalgún dos seguintes grupos profesionais:

I. Persoal técnico.

II. Persoal administrativo.

III. Persoal obreiro e actividades auxiliares.

Artigo 10º.-Definición de grupos profesionais.

I. Técnicos: clasifícanse neste grupo os que realicen traballos que esixan, con titulación ou sen ela, unha adecuada competencia ou práctica, e exercen funcións de tipo facultativo, técnico ou dirección especializada.

O dito grupo, pola súa vez, clasifícase nos seguintes subgrupos:

1. Técnicos con título superior.

2. Técnicos con título non superior.

3. Técnicos non titulados.

II. Administrativos: neste concepto quedan comprendidos os que realicen traballos de mecánica administrativa, contable e outros análogos non comprendidos no grupo anterior.

III. Obreiros e actividades auxiliares: inclúe este grupo o persoal que execute fundamentalmente traballo de índole material ou mecánica e engloba o persoal de reparto, cámaras e oficios varios, así como o persoal subalterno.

Artigo 11º.-Regulación.

Os contratos do persoal, calquera que sexa a súa modalidade, adaptaranse ás formas e condicións establecidas polas disposicións legais vixentes.

Artigo 12º.-Contratos en prácticas e de aprendizaxe.

A empresa poderá contratar traballadores en prácticas e aprendices, de acordo coas disposicións legais vixentes.

No caso dos aprendices a súa retribución será non inferior ó 80, 90 ou 100% do salario base durante, respectivamente, o primeiro, segundo e terceiro ano de vixencia do contrato.

Artigo 13º.-Vacantes e postos de nova creación.

Na creación de novos postos de traballo na provisión de vacantes, cando se requira persoal de novo ingreso, a empresa terá en conta en primeiro lugar os traballadores que no momento de iniciarse a selección conten con contratos a tempo parcial, en segundo lugar as peticións dos fillos ou fillas de traballadores en activo, falecidos, xubilados ou pensionistas de tódalas empresas do Grupo Pescanova S.A., concedéndolle-lo emprego en todo caso se superan as probas de aptitude que correspondan. Para os postos de certa responsabilidade que precise a empresa, será necesario que as súas condicións e coñecementos non sexan inferiores ós doutros candidatos.

A empresa está obrigada a informa-lo comité de empresa das vacantes producidas e postos de nova creación. Así mesmo, daráselle difusión nos taboleiros de anuncios.

Artigo 14º.-Período de proba.

O persoal de novo ingreso terá carácter provisional durante un período de proba variable, segundo a índole do labor que se realice, conforme a seguinte escala:

Técnicos titulados: seis meses.

Titulados grao Sup., Contr. prácticas: dous meses.

Titulados grao Med., Contr. prácticas: un mes.

Contratos de aprendizaxe: un mes.

Resto do persoal: un mes.

Durante os períodos que se sinalan, tanto o traballador como a empresa poderán desistir da proba ou proceder á rescisión do contrato, sen previo aviso nin dereito a indemnización. Será nulo o pacto que estableza un período de proba cando o traballador xa desempeñase as mesmas funcións con anterioridade na empresa, e dentro da mesma categoría profesional baixo calquera modalidade de contratación.

O traballador desfrutará durante o período de proba da retribución que corresponda á categoría profesional do traballo no que se clasificase. O período

de proba será computado para efectos de antigüidade.

Superado o período de proba, o traballador pasará a integrarse na empresa coa categoría que corresponda en cada caso.

Artigo 15º.-Postos especiais.

A empresa procurará emprega-lo persoal con capacidade física ou intelectual diminuída pola idade ou outros inconvenientes ocorridos antes da súa xubilación en destinos adecuados ás súas condicións reais, en caso de que existan estes postos. Igual criterio se seguirá cos que se encontren na situación de invalidez permanente parcial para a súa profesión habitual.

Artigo 16º.-Postos ou áreas de traballo.

Enténdese por postos ou áreas de traballo o conxunto de funcións, deberes, atribucións e responsabilidades asignadas a un ou máis traballadores. Os postos de traballo forman a unidade básica organizativa de cada centro de traballo. Cada posto se clasificará no grupo profesional que proceda.

Artigo 17º.-Execución do traballo.

Cada traballador deberá desempeñar basicamente as funcións propias do seu posto de traballo.

Non obstante, se as ditas funcións non ocupasen plenamente a súa xornada laboral, os traballadores realizarán os traballos que se lles asignen, sempre de acordo coa súa experiencia, formación e clasificación profesional.

É deber básico do traballador cumprir coas obrigas completas do seu traballo, de conformidade coas regras de boa fe e dilixencia, así como observa-las medidas de seguridade e hixiene e os procedementos de calidade que se adopten.

Artigo 18º.-Mobilidade funcional.

Regularase polo disposto no artigo 39 do Estatuto dos traballadores.

Cando se produzan cambios de centro de traballo dentro de Frigodís, S.A. e isto significase para o traballador un incremento de gastos debidamente acreditado, a empresa deberá compensalo. Igual criterio se seguirá cando se produza unha modificación de horario, salvo que estea previsto ou pactado no contrato individual, exceptuando os supostos nos que o traballador permanecese no dito horario por máis de tres anos.

A decisión por parte da empresa de cambio de centro de traballo será notificada con quince días de anticipación.

Artigo 19º.-Incorporación a outras empresas do grupo.

Os traballadores da empresa Frigodís S.A. poderán ser destinados a outras empresas do mesmo grupo

cando existan razóns organizativas, técnicas e productivas que o xustifiquen, sempre que se respecten os límites da mobilidade funcional e o traslado non implique cambio de domicilio.

A decisión de incorporación á nova empresa deberáselle comunicar ós afectados e ó comité de empresa cunha anticipación de 30 días naturais, salvo acordo noutro sentido.

Os traballadores afectados por esta decisión incorporaranse ó cadro de persoal da empresa do seu novo destino e conservarán a súa categoría profesional, antigüidade e salario anual, a excepción dos complementos vinculados ó posto de traballo.

Se a incorporación prevista neste artigo significase para o traballador un incremento nos seus gastos, debidamente acreditado, a empresa deberá compensalo.

Artigo 20º.-Excedencias.

Terá dereito á situación de excedencia todo o persoal afectado polo presente convenio, de acordo coas normas reguladas no Estatuto dos traballadores.

Xornada, vacacións e licencias

Artigo 21º.-Xornada anual e horario.

A xornada de traballo será de 1.749 horas de traballo efectivo ó ano. Para tal efecto non se computarán como tempo efectivo de traballo os descansos obrigatorios ou pactados.

O tempo de traballo computarase ó inicio e ó final da xornada no posto de traballo.

Dentro da xornada ordinaria de traballo, a dirección da empresa poderá dispor de ata un máximo de 80 horas anuais, que poderá utilizar tanto para atender emerxenicas ou períodos punta, prazos de entrega con marxes moi estrictas o cumprimento das cales poida implica-la perda do pedido do cliente, etc.

En calquera caso, a utilización das horas de dispoñibilidade a que se fai referencia no parágrafo anterior non poderá implicar ningún incremento na xornada anual pactada.

O aumento das horas como consecuencia da utilización das horas de dispoñibilidade mencionadas, poderá afectar á totalidade da empresa, a seccións dela ou a traballadores individualmente.

Para que sexa de obrigado cumprimento a orde dada para atende-lo anteriormente citado, será suficiente e necesario, salvo acordo noutro sentido, que se cumpran os seguintes requisitos:

1. Aviso previo de 72 horas ós afectados, dando traslado da orde ós representantes dos traballadores.

2. A dispoñibilidade horaria efectuarase incrementando ata en dúas horas a xornada diaria habitual.

Estas horas compensaranse en tempo libre dentro do mes natural seguinte ó da súa realización.

Se modificacións horarias derivadas da posta en práctica desta facultade lles orixinasen algún gasto extra en materia de transporte ós traballadores afectados, a empresa deberá compensalos por iso.

A xornada anual desenvolverase nos horarios seguintes:

-Centros de Chapela e Vigo.

De 8 a 16 horas.

De 8 a 13 e de 14 a 17 horas.

De 10 a 18 horas.

De 6.45 a 14.45 horas.

Todos eles de luns a venres.

-Sala de máquinas (quendas continuas).

De 7 a 14 horas.

De 14 a 22 horas.

De 22 a 7 horas.

-Oficinas da primeira quenda.

De 8 a 15 horas de luns a venres, e de 8 a 13 os sábados.

-Oficinas da segunda quenda.

De 8 a 13.30 e de 14.15 a 16.45 horas, de luns a venres.

A xornada intensiva de verán para o persoal de oficinas estenderase desde o 16 de xuño ó 15 de setembro para o ano 1998. Estableceranse as quendas pertinentes para cubri-las necesidades do servicio, fóra do horario fixado.

O horario de traballo, como consecuencia das necesidades do servicio, adaptarase de acordo cos cambios organizativos de cada momento. Previamente a isto, informarase o comité e comunicaránselle as razóns que o xustifiquen.

A comunicación individual destes cambios efectuarase con 30 días de anticipación, salvo pacto noutro sentido.

Os traballadores retribuídos polo sistema de tarefa non se rexerán por este réxime xeral de xornada.

A permanencia nas cámaras que teñan que estar a -18ºC ou temperaturas inferiores, cunha oscilación de máis ou menos 3ºC, será de 6 horas.

Cada 45 minutos de traballo ininterrompido no interior das cámaras ou entrando ou saíndo continuamente (carreteiros), concederase un descanso de recuperación de 15 minutos.

Completarán a xornada normal en traballos que se realicen no exterior das cámaras.

Artigo 22º.-Horas extraordinarias.

É firme a vontade de ámbalas partes de reducir ó mínimo as horas extraordinarias.

Para o suposto de que fosen necesarias, retribuiranse segundo o valor dunha hora ordinaria incrementada nun 75%.

Non se terá en conta para efectos da duración máxima da xornada ordinaria laboral, nin para o cómputo do número máximo das horas extraordinarias autorizadas, o exceso das traballadas para previr ou reparar sinistros ou outros danos extraordinarios e urxentes ou por causa de forza maior, sen prexuízo do seu aboamento como se se tratase de horas extraordinarias.

Consideraranse horas extraordinarias estructurais as realizadas nos seguintes casos:

-Incidencias nas quendas de traballo provocadas por licencias retribuídas ou I.T.

-Ausencia imprevista do relevo no traballo por quendas.

-Reparacións perentorias.

-Peches de exercicio contable e confección de orzamentos.

-Períodos punta de reparto.

Artigo 23º.-Vacacións.

Todo o persoal afectado polo presente convenio terá trinta días naturais de vacacións, que se aboarán coa retribución do salario da táboa anexa máis antigüidade e complemento persoal.

No ano de comezo da relación laboral, o persoal de novo ingreso desfrutará dentro del da parte proporcional que corresponda segundo o número de meses traballados durante o ano; para estes efectos computarase a fracción de mes como mes completo.

As vacacións desfrutaranse de acordo coas datas solicitadas polo traballador, adaptándose ás necesidades do servicio. En cada servicio confeccionarase un plan de vacacións.

Cando por falta de acordo entre os traballadores sexa necesario establecer unha orde, esta determinarase por sorteo; ó ano seguinte os desfavorecidos no sorteo terán prioridade.

As vacacións non comezarán en día festivo ou véspera, salvo petición do interesado.

Se, durante o desfrute das vacacións, o traballador xustificase ter sufrido internamento clínico, non se computarán para efectos de vacacións os días que durase o dito internamento.

Neste suposto os días de vacacións pendentes desfrutaranse cando as necesidades do servicio o permitan.

Anualmente elaborarase un calendario laboral que comprenderá o período de vacacións.

Artigo 24º.-Licencias retribuídas.

O persoal afectado polo presente convenio terá dereito a solicitar licencias retribuídas nos seguintes casos:

a) Matrimonio: 15 días naturais.

b) Parto da esposa: 3 días naturais.

c) Enfermidade con internamento ou intervención cirúrxica, tamén co internamento, do cónxuxe, pais, fillos: cinco días naturais. Pais políticos: tres días naturais. Débese presentar certificado médico.

d) Falecemento do cónxuxe, pais, fillos e irmáns: 3 días retribuídos e 2 sen retribuír se residen na provincia de Pontevedra; 4 días retribuídos e 1 sen retribuír se é no resto de Galicia e 5 días retribuídos no resto de España.

e) Falecemento de avós, netos e pais políticos: 2 días

f) Falecemento de irmáns políticos e avós políticos: 2 días, tíos e tíos políticos: 1 día.

g) Pola intervención cirúrxica sen internamento ou recoñecemento médico de pais, cónxuxe e fillos: 1 día.

h) Por cambio de domicilio: 1 día.

i) Cando haxa que acudir a probas ou recoñecementos médicos en centros sanitarios, con xustificante médico: 1 día.

Nos casos en que se teña que acompaña-lo cónxuxe e fillos a recoñecemento médico a Santiago de Compostela por enfermidade: 1 día; a Madrid ou outras cidades fóra da rexión: 3 días, e cando esta saída fose a Madrid a consecuencia de operación ou intervención cirúrxica con internamento: 5 días, acreditándose, en todo caso, con certificado médico.

Consulta médica: tres horas, e, se esta consulta se realiza en Moaña, Pontevedra, Ponteareas, Salvaterra, Salceda, Domaio ou Cangas, o tempo total da consulta así como o tempo de regreso, debidamente acreditados. Igual criterio se seguirá con respecto ó persoal destinado no Porriño que teña que desprazarse a Vigo.

Concédenselle os mesmos dereitos á compañeira ou compañeiro que á esposa ou esposo.

Tódolos días naturais indicados anteriormente se consideran días naturais.

Réxime económico

Artigo 25º.-Crecemento salarial.

A partir do primeiro de xaneiro de 1998 rexerán para tódolos efectos os salarios que figuran na táboa anexa ó convenio, na que se inclúen tódolos con

ceptos salariais, pluses e demais e que supuxo un incremento do 2%.

Artigo 26º.-Principios xerais sobre retribución.

Tódolos conceptos salariais que figuran no presente convenio teñen a consideración de retribucións brutas, e sobre elas efectuaranse as correspondentes deduccións por Seguridade Social, IRPF e calquera outra que puidese corresponder por aplicación legal.

Artigo 27º.-Conceptos retributivos.

-Salario base.

-Plus convenio.

-Plus de asistencia.

-Plus de distancia.

-Plus de noite.

-Antigüidade.

-Plus de traballos penosos, insalubres e perigosos.

-Bolsa de vacacións.

-Axudas de custo.

-Pagas extraordinarias.

Salario base.

Salario base por unidade de tempo ou de obra: o determinado no convenio ou no contrato e que figura na táboa salarial.

Complementos salariais.

Plus convenio: salario de cualificación por categoría profesional, que é o que consta na táboa salarial.

Plus de asistencia: está en relación cos días de asistencia ó traballo e é o que consta na táboa salarial.

Plus de distancia: todo o persoal afectado por este convenio percibirá en concepto de plus de distancia a cantidade que figura na táboa anexa.

Plus de traballos penosos, molestos, insalubres e perigosos: a todo o persoal que polas súas condicións de traballo se lle recoñeza actualmente unha prima polo dito traballo seguiráselle recoñecendo este dereito na contía que figura na táboa salarial anexa. Os ditos traballos pagaranse proporcionalmente ó tempo traballado.

Os demais traballadores que eventualmente teñan que realizar traballos desta natureza percibirán un plus do 20% do salario base, en proporción ó tempo traballado nestas condicións.

O persoal que traballe no interior das cámaras frigoríficas cobrará un plus equivalente ó 25% do salario base.

O persoal que realice o seu traballo a temperaturas entre 0ºC e 10ºC cobrará un plus equivalente ó 10% do salario base.

Plus de noite.

Regularase de acordo co artigo 36 do Estatuto dos traballadores. En canto á súa retribución, será un plus do 25% do salario base.

Bolsa de vacacións.

Recoñéceselle a todo o persoal afectado polo convenio unha bolsa de vacacións de 115.000 ptas. que se fará efectiva coa paga de xullo.

Axudas de custo.

A empresa aboaralle a cada un dos traballadores procedentes de Sofitransa que viñan desfrutando de axuda de comida a cantidade de 605 ptas. por día efectivo de traballo, sempre que non perciban axudas de custo.

Cando por necesidades da actividade da empresa se considere precisa a continuidade da xornada laboral habitual de traballo en tres ou máis horas, a empresa facilitará unha axuda de custo de 1.800 ptas., que comprende 1.450 ptas. en concepto de axuda de comida e 350 ptas. como compensación por gastos de transporte urbano.

Pagas extraordinarias.

Todo o persoal afectado por este convenio desfrutará de catro pagas extraordinarias aboadas a razón dunha mensualidade composta por salario base, plus convenio, plus de distancia, plus de traballos especiais e plus de traballos penosos, máis antigüidade, como se vén facendo ata a data. As ditas pagas corresponden a:

a) O día 15 de marzo.

b) O día 15 de xullo.

c) O día 15 de outubro.

d) O día 15 de decembro.

As ditas pagas faranse efectivas o día laboral inmediatamente anterior á data sinalada neste artigo.

As pagas correspondentes ós días 15 de xullo e 15 de decembro serán aboadas por semestres. A paga correspondente ó 15 de marzo, para o persoal que ingrese durante o ano, farase efectiva o día 31 de decembro, aboándoselle na súa parte proporcional. A paga correspondente ó 15 de outubro seguirase devengando de acordo coa normativa da empresa, de considerala como paga de asistencia ó traballo e proporcionalmente ó tempo traballado; terá tal consideración a situación de incapacidade temporal derivada de accidente laboral, maternidade e cando se produza a consecuencia de intervención cirúrxica ou de hospitalización.

Antigüidade.

Tódolos traballadores afectados por este convenio, cunha antigüidade anterior a 1985, desfrutarán de bienios ó 5% do salario mínimo interprofesional ata o máximo de 16 bienios, segundo o cálculo seguinte:

a) Bienios cumpridos ata o 1 de novembro de 1985, calculados a razón do 5% do salario mínimo interprofesional de 37.170 ptas.

b) Bienios que se cumprirán a partir do 1 de xaneiro de 1985, calculados a razón do 5% do salario mínimo interprofesional vixente no momento de cumprir tal bienio.

A cantidade resultante de suma-lo calculado nas alíneas a e b configurará o importe da antigüidade adquirida.

Todo o persoal con antigüidade na empresa posterior ó 1 de novembro de 1985 terá trienios ó 5%.

A antigüidade computarase desde o 1 de xaneiro do ano en que se cumpra.

Os traballadores afectados por este convenio procedentes de Sofitransa, desfrutarán de aumentos por anos de servicio, como premio á súa vinculación á empresa. A aplicación desta norma regularase do xeito seguinte:

-Primeiro trienio ó 10%.

-Restantes ó 5% ata un máximo do 75%.

O importe de cada trienio calcularase tomando como base a táboa de cálculo de antigüidade anexa, a cal se incrementará cada ano no mesmo índice de incremento do IPC.

Os aumentos por anos de servicio comezarán a devengarse a partir do día 1 do mes en que se cumpra cada trienio.

A antigüidade calcularase como salario para tódolos efectos.

Beneficios sociais

Artigo 28º.-Idade de xubilación.

Queda establecida a xubilación, con carácter obrigatorio, ós 65 anos de idade para todo o persoal da empresa, sempre que reúnan os requisitos necesarios para ter dereito á pensión de xubilación do sistema de Seguridade Social española.

Ó producirse a xubilación conforme o disposto no parágrafo anterior, recoñeceráselle ó traballador un premio segundo a seguinte escala:

a) Traballadores cunha antigüidade de 30 anos: tres mensualidades.

b) Traballadores cunha antigüidade de 20 anos: dúas mensualidades.

c) Traballadores cunha antigüidade de 15 anos: unha mensualidade.

Se a xubilación se anticipa á idade de 65 anos, gratificarase con quince días máis por ano de anticipación.

Artigo 29º.-Seguro.

Con independencia das indemnizacións obrigatorias da Seguridade Social, a empresa, mediante a concertación de póliza de cobertura cunha entidade aseguradora, garantiralles ós seus traballadores ou, se for o caso, ós seus herdeiros, e nos supostos que se especifican, as seguintes indemnizacións, cubrindo a póliza as 24 horas do día.

1.1. Por accidente non laboral.

1.1.1. Morte do traballador.

Os herdeiros do traballador ou, no seu defecto, a persoa que el mesmo designase, percibirán a cantidade de sete millóns catrocentas sesenta e dúas mil duascentas quince pesetas.

1.1.2. Invalidez permanente total ou invalidez absoluta do traballador e gran invalidez.

O traballador percibirá a cantidade de sete millóns catrocentas sesenta e dúas mil duascentas quince pesetas para os primeiros casos, catorce millóns novecentas vintecatro mil catrocentas trinta e unha pesetas para os segundos e vintenove millóns oitocentas corenta e oito mil oitocentas sesenta e catro pesetas para os terceiros.

1.2. Por accidente laboral.

1.2.1. Morte do traballador.

Os herdeiros do traballador ou, no seu defecto, a persoa que el mesmo designase percibirán a cantidade de sete millóns catrocentas sesenta e dúas mil duascentas quince pesetas.

1.2.2. Invalidez permanente total, invalidez permanente absoluta e gran invalidez.

O traballador percibirá a cantidade de sete millóns catrocentas sesenta e dúas mil duascentas quince pesetas para os primeiros casos, catorce millóns novecentas vintecatro mil catrocentas trinta e unha pesetas para os segundos e vintenove millóns oitocentas corenta e oito mil oitocentas sesenta e catro pesetas para os terceiros.

Entenderase por invalidez permanente total a incapacidade que inhabilite o traballador, de modo permanente, para realizar todas ou as fundamentais tarefas da súa profesión habitual, aínda que se poida dedicar a outra distinta.

Entenderase por invalidez permanente absoluta a incapacidade que inhabilite o traballador de modo permanente para toda profesión ou oficio.

Entenderase por gran invalidez a situación do traballador para efectos de incapacidade permanente absoluta e que como consecuencia de perdas anatómicas ou funcionais necesite a asistencia doutra persoa para realiza-los actos máis esenciais da vida, como son vestirse, desprazarse, comer ou análogos.

As condicións quedan establecidas na póliza de seguros e a súa copia oficial entregaráselle ó comité de empresa.

Artigo 30º.-Complemento de I.T.

Cando o persoal da empresa sufra un accidente de traballo terá un complemento da ata o 100% do salario real, é dicir, percibirá a totalidade do salario como se estivese traballando.

Para o suposto de incapacidade como consecuencia de enfermidade, a empresa aboará o 100%, condicionado a que no mes anterior á súa baixa o absentismo da empresa non supere o 5% do total dos traballadores; as horas que utilicen os cargos sindicais para o desempeño das súas funcións non se terán en conta para o referido cálculo, e o resto do persoal da empresa continuará percibíndoo como ata a data.

Artigo 31º.-Tenda de peixe.

Todo o persoal pertencente ó cadro de Frigodís, S.A. ou pensionistas dela terá dereito á adquisición de productos comercializados por Pescanova, na tenda establecida para isto, nas condicións de pagamento seguintes:

a) Pagamento a crédito.

1. Productos elaborados/precociñados/vexetais: prezo de lista oficial de Pescanova cun desconto do 5%.

2. Marisco: prezo de lista oficial de Pescanova cun desconto de 20 ptas./kg.

3. Peixe enteiro/filetes/por solto: prezo de lista oficial de Pescanova.

Sobre os prezos anteriores incrementarase o IVE sobre prezo de lista.

b) Pagamento de contado.

1. Productos elaborados/precociñados/vexetais, prezo de lista oficial de Pescanova cun desconto do 7,5%.

2. Marisco: prezo de lista oficial de Pescanova cun desconto de 30 ptas./kg.

3. Peixe enteiro/filetes/por solto: prezo de lista oficial de Pescanova cun desconto de 3 ptas./kg.

Sobre os prezos anteriores incrementarase o IVE sobre prezo de tarifa.

Cando a empresa faga unha promoción dos seus productos nas grandes áreas de alimentación da zona, esta farase igualmente na tenda da factoría.

Dentro de cada mes natural cada empregado ten un tope de compras equivalente a unha mensualidade do seu salario (a crédito ou de contado).

Seguridade e saúde laboral

Artigo 32º.-Principio xeral.

As partes que asinan este convenio comprométense a adopta-las medidas necesarias para asegura-la eficaz prevención dos riscos para a saúde e integridade física dos traballadores, actuando sobre os métodos e as condicións de traballo, así como sobre a actitude das persoas.

Artigo 33º.-Recoñecementos médicos.

Será obrigatoria a realización dun recoñecemento médico con carácter previo á incorporación ó traballo, que será efectuada polo servicio médico da empresa ou por unha entidade coa que se concerte tal prestación.

Anualmente, e en todo caso sempre que así proceda, efectuaráselles un recoñecemento médico a tódolos traballadores.

A empresa, a través do seu servicio médico ou por medio de entidades especializadas, poderá comproba-lo estado de saúde dos traballadores en situación de I.T., respectando en todo caso o dereito á intimidade persoal.

Artigo 34º.-Roupa e outros medios de protección persoal.

A empresa proporcionaralles ós traballadores os medios e roupa de protección persoal que resulten esixibles para cada situación de risco.

Artigo 35º.-Vestiario.

Polas circunstancias do traballo será preciso que certo persoal utilice vestiario adecuado ó traballo que efectúa. En tal caso, a empresa proverá o vestiario correspondente. A definición de tal vestiario e a súa calidade, así como os prazos de entrega, será consecuencia das disposicións vixentes, dos requirimentos especiais de traballo e do estudio técnico-sanitario deste, oído o comité de seguridade e hixiene da empresa. O vestiario renovarase cando sexa necesario.

Dereitos sindicais

Artigo 36º.-Garantías sindicais.

A empresa garantirá o correcto exercicio de tódolos dereitos dos representantes legais dos traballadores recoñecidos no Estatuto dos traballadores, texto refundido (R.D. lei 1/1995, do 24 de marzo).

Non entrarán no cómputo de horas sindicais as destinadas a reunións coa empresa.

O crédito horario poderase acumular nun ou varios traballadores trimestralmente, logo de aviso e negociación coa empresa.

O crédito horario non se computará para efectos do cálculo do índice de absentismo.

Infraccións e sancións

Artigo 37º.-Facultade disciplinaria.

Os traballadores poderán ser sancionados pola dirección da empresa en virtude de incumprimentos laborais, de acordo coa graduación de faltas e sancións establecidas no presente capítulo.

Artigo 38º.-Graduación de faltas.

As faltas cometidas polo traballador serán cualificadas, segundo a súa importancia, transcendencia e intención, en leves, graves e moi graves.

Artigo 39º.-Faltas leves.

Consideraranse faltas leves as accións ou omisións seguintes:

a) Ata tres faltas de puntualidade en trinta días na asistencia ó traballo con atraso superior a dez minutos e inferior a trinta no horario de entrada.

b) Faltar ó traballo un día sen xustificación.

c) Non cursar en tempo oportuno o documento correspondente, cando se falte ó traballo por motivo xustificado, a non ser que se probe a imposibilidade de facelo.

d) Non lle comunicar á dirección da empresa a residencia e domicilio, así como os cambios neste.

e) As discusións sobre asuntos estraños ó traballo dentro das dependencias da compañía. Se tales discusións producisen escándalo notorio, poderase considerar falta grave ou moi grave.

f) Pequenos descoidos na conservación do material e utensilios.

g) O abandono do posto de traballo sen causa xustificada e sen notificación ó inmediato superior, aínda cando sexa por breve tempo. Se o dito abandono implicase risco de prexuízo de consideración á empresa ou de accidente ou constituíse un quebranto da disciplina, poderá ser considerada a falta como grave ou moi grave.

h) Non asistir ós recoñecementos médicos anuais ou a aqueloutros para os que fose requirido polo servicio médico como consecuencia de procesos de incapacidade temporal.

Artigo 40º.-Faltas graves.

Consideraranse faltas graves as accións ou omisións seguintes:

a) Máis de tres faltas inxustificadas de puntualidade na asistencia ó traballo, superiores en máis de dez minutos e inferiores a trinta, durante un período de trinta días.

b) Ausencia ou atrasos superiores a trinta minutos, sen causa xustificada, por dous días durante un período de trinta.

c) Falta ó traballo dous días nun período de trinta sen xustificación.

d) Non comunicar coa puntualidade debida os cambios experimentados na familia que poidan afectar á Seguridade Social, á Facenda pública ou ter calquera repercusión económica. A falta maliciosa nestes datos considerarase como falta moi grave.

e) Entregarse a xogos, distraccións ou durmir durante a xornada de traballo. Se a falta se cometese nun posto de responsabilidade, poderase cualificar de moi grave.

f) A simulación de enfermidade ou accidente.

g) A desobediencia ós superiores en materia de traballo. Se implicase quebranto da disciplina, ou deles se derivase prexuízo notorio para a empresa, poderase cualificar como falta moi grave.

h) Simula-la presencia doutro traballador, asinar ou fichar por el.

i) A neglixencia ou desidia no traballo que afecte a súa boa marcha.

j) A imprudencia no traballo. Se implicase risco de accidente para as persoas ou as instalacións poderase cualificar como moi grave.

k) Realizar, sen o oportuno permiso, traballos particulares durante a xornada, así como empregar para usos propios ferramentas ou materiais da empresa.

l) A embriaguez ou toxicomanía ocasional durante o traballo. Se disto derivase perigo para as persoas ou instalacións, poderase cualificar de falta moi grave.

m) A reincidencia en faltas leves, excluída a de puntualidade, aínda que sexa de distinta natureza, dentro dos tres meses seguintes á sanción anterior.

Artigo 41º.-Faltas moi graves.

Consideraranse faltas moi graves as accións ou omisións seguintes:

a) Máis de dez faltas non xustificadas de puntualidade superiores a dez minutos cometidas nun período de seis meses ou vinte durante un ano.

b) Faltar tres días ó traballo durante un período de sesenta días sen causa que o xustifique.

c) A fraude, deslealdade ou abuso de confianza nas xestións encomendadas e o furto ou roubo, tanto á empresa como ós seus traballadores ou a calquera outra persoa dentro das dependencias da empresa.

d) Facer desaparecer, inutilizar, esnaquizar ou causar desperfectos en materias primas, vehículos, ferramentas, maquinaria, aparellos, instalacións, edificios, obxectos, vestiario, documentos ou calquera outra propiedade da compañía.

e) A embriaguez habitual ou toxicomanía durante o traballo.

f) Viola-lo segredo de correspondencia ou de documentos reservados ou revelar datos de reserva obrigada.

g) Os malos tratos de palabra ou obra, abuso de autoridade ou faltas graves de respecto ou consideración para cos superiores ou compañeiros, subordinados ou os seus familiares, así como a persoas alleas á empresa con ocasión da actividade laboral.

h) Causar accidente grave por neglixencia ou imprudencia.

i) Abandona-lo traballo en posto de responsabilidade.

j) A diminución voluntaria e continuada no rendemento normal do traballo.

k) Orixinar frecuentes liortas e pendencias cos compañeiros de traballo.

l) A reincidencia en falta grave, aínda que sexa de distinta natureza, sempre que se cometa dentro dos doce meses seguintes, de ter sido sancionado pola anterior.

m) O abuso de autoridade por parte dos superiores será sempre considerado falta moi grave. O que o sufra poderao pór directamente en coñecemento da dirección ou do comité de empresa.

n) Ordenar expresamente a realización de traballos ou tarefas en forma tal que implique a vulneración dos procedementos escritos con risco grave para as persoas ou as instalacións.

ñ) Non atende-lo público coa corrección e dilixencia debidas.

Artigo 42º.-Sancións.

As sancións que poderá impo-la dirección, atendendo á gravidade da falta e segundo as circunstancias que concorran en cada caso, serán as seguintes:

Por faltas leves:

-Amoestación verbal.

-Amoestación por escrito.

-Suspensión de emprego e soldo por tempo non superior a dous días.

Por faltas graves:

-Suspensión de emprego e soldo por tempo non superior a vinte días.

Por faltas moi graves:

-Suspensión de emprego e soldo por tempo non superior a 60 días.

-Despedimento disciplinario nos supostos en que a falta se cualifique en grao máximo.

Artigo 43º.-Procedemento.

1. A sanción de faltas requirirá a comunicación escrita e motivada ó traballador.

2. A sanción de faltas moi graves requirirá a instrucción previa dun procedemento contradictorio sumario, con audiencia do traballador afectado e do comité de empresa, tendo este último quince días naturais para emitir informe previo á imposición da sanción.

3. Durante a substanciación do expediente disciplinario aludido no apartado anterior, a dirección da empresa poderá acorda-la medida cautelar de suspensión de emprego.

4. A dirección da empresa informará o comité de empresa sobre as sancións impostas por faltas graves ou moi graves.

5. Cando o traballador estea afiliado a un sindicato informará ou oirá o delegado sindical nos casos e cos procedementos previstos nos puntos 2 e 4 do presente artigo.

6. Tratándose de delegado sindical ou membro do comité de empresa/delegado de persoal aplicarase o disposto no artigo 68 do Estatuto dos traballadores.

Artigo 44º.-Prescrición.

As faltas leves prescribirán ós dez días; as graves ós vinte días e as moi graves ós sesenta días, contados a partir da data na que a dirección da empresa tivo coñecemento da súa comisión e, en todo caso, ós seis meses de terse cometido.

Asínase en Chapela, 24 de xuño de 1998.

Pola empresaPolo comité

Táboa salarial 1996

Salario base	Plus asistencia	Plus convenio	Plus distancia	Traballos penosos	Total mes	Total ano

1. Titulados
Superior e asimilados	75.781	0	118.400	0	0	194.183	3.106.920
Superior en prácticas	75.781	0	60.475	0	0	136.259	2.180.140
Medio en prácticas	75.781	0	38.719	0	0	114.503	1.832.050
2. Administrativos
Xefe de 1ª	75.781	7.959	86.723	10.643	0	181.110	2.865.931
Xefe de 2ª	75.781	7.614	65.856	9.777	0	159.030	2.514.023
Oficial 1ª	75.781	5.811	53.164	11.726	0	146.485	2.320.508
Oficial 2ª	75.781	5.210	45.677	8.009	0	134.679	2.134.010
Auxiliar Admón.	75.781	4.061	23.512	9.777	0	113.133	1.793.884
Auxiliar entrada	75.781	3.002	11.093	9.777	0	99.656	1.582.498
3. Profesionais de oficio e persoal obreiro
Encargado maior	75.781	7.042	52.883	19.312	15.158	170.178	2.694.684
Xefe de equipo	75.781	7.255	25.963	9.291	15.158	133.452	2.102.179
Especialista	75.781	6.898	14.110	9.030	15.158	120.980	1.908.074
Mozo de cámaras	75.781	6.898	11.776	9.404	15.158	113.354	1.854.068
Operaria	75.781	7.472	13.084	8.250	3.087(1)	107.675	1.692.917
Operario cámaras	75.781	0	19.542	10.216	15.158	120.699	1.931.183
Encargado peirao	75.781	0	32.565	10.216	15.158	133.931	2.139.548
Mozo picking	75.781	3.349	3.304	4.916	15.158	102.511	1.626.790
Persoal procedente de Sofitransa
	(2)	Cálculo antigüidade
Maquinista	123.600	0	19.637	13.529	1.843.530	156.768	2.470.523
Axte. maquinista	111.298	0	9.795	13.529	1.658.819	134.624	2.060.692
Capataz	116.584	0	17.726	13.529	1.736.262	147.732	2.361.961
Peón especialista	102.348	0	12.988	13.529	1.528.156	128.536	1.951.862
Operaria	86.169	0	11.830	13.529	1.273.288	111.527	1.682.993
(1) Traballos especiais (2) Plus transporte

8375