O maxistrado xuíz do Xulgado de Primeira Instancia e Instrucción número dous de Santiago de Compostela, nos autos do expediente de suspensión de pagamentos da entidade Ibergaliza, S.A., número 297/1991, dictou o seguinte auto.

En Santiago de Compostela, o trinta e un de xullo de mil novecentos noventa e cinco.

Javier Míguez Poza, maxistrado xuíz do Xulgado de Primeira Instancia e Instrucción número dous dos de Santiago de Compostela e o seu partido, nos autos do expediente de suspensión de pagamentos da entidade Ibergaliza, S.A., representada polo procurador Narciso Caamaño Queijo e baixo a dirección técnica

do letrado González-Grano de Oro y Guiradoy, rexistrada baixo o número 297/1991, dictou a presente resolución que basea nos seguintes feitos.

Primeiro.-Declarada a entidade Ibergaliza, S.A. en estado legal de suspensión de pagamentos, foron convocados os acredores a xunta xeral, que se celebrou o 19 de xuño de 1995, coa concorrencia dos acredores daquela, dos que os créditos sumaron a cantidade de seiscentos corenta e un millóns trescentas noventa e tres mil setecentas setenta pesetas (641.393.770 pesetas), declarándose validamente constituída a xunta por importa-la dita suma máis dos tres quintos do total pasivo debedor, con exclusión dos créditos dos acredores con dereito a abstención; na xunta foi sometida a votación a proposición de convenio que no dito acto presenta a suspensa e como a dita votación non superarou a metade máis un dos presentes, nin os votos favorables emitidos chegaron ás tres cuartas partes do pasivo excluídos os privilexiados, a S.Sª. acorda convocar nova xunta de conformidade co que establece o artigo 14 da Lei de suspensión de pagamentos. Celebrada a nova xunta o día 19 de xullo de 1995, e

asistindo a ela os acredores da suspensa que representan o 76% dos créditos ordinarios, a S.Sª. decláraa validamente constituída e, sometida a votación a proposición de convenio, votan a favor del tódolos comparecentes con excepción do acredor Manuel García López e a representación do Banco de Crédito Agrícola que se absteñen, representando os acredores que votan a favor do convenio a porcentaxe de 73,73 por cento dos créditos comúns, polo que sendo superior ós dous tercios esixidos na segunda votación o que resolve tivo que proclama-lo acordo favorable á aprobación do expresado convenio.

Segundo.-A proposición de convenio votada é do teor literal seguinte:

«1. Ámbito de aplicación.

O presente convenio obriga a Ibergaliza S.A., así como ós acredores desta, comprendidos na lista definitiva aprobada polo Xulgado de Primeira Instancia e Instrucción número dous de Santiago de Compostela, autos 297/1991, mediante resolución do 14 de xuño de 1995, en canto ós créditos que teñan a condición de ordinarios e a todos aqueles que deban ser incluídos en virtude de sentencia firme ou dos que a omisión na lista definitiva emende a Comisión Liquidadora de acordo coa estipulación cuarta, punto tres deste convenio, e sen prexuízo do diposto na lei respecto ós créditos de natureza privilexiada ou preferente. Os acredores ós que por virtude da natureza do seu crédito se lles recoñecese o dereito de abstención, non quedarán vinculados polo presente convenio.

2. Cesión de activos para pagamento dos acredores. Ibergaliza, S.A. cede a tódolos seus acredores a totalidade dos bens, dereitos e accións de calquera clase que integren o patrimonio da dita sociedade.

A cesión dos ditos activos efectúase co fin de que o importe que se obteña pola súa realización se adxudique a tódolos acredores de Ibergaliza, S.A. para pagamento dos créditos que ostentan contra a citada compañía, na contía que resulte posible e a pro rata dos seus respectivos créditos.

3. Comisión liquidadora.

Para a efectividade do presente convenio e da cesión de activos, créase unha comisión liquidadora composta

por tres membros, quedando esta legalmente constituída na data de se dicta-la resolución de aprobación xudicial do convenio, e integrada polas seguintes persoas como titulares:

1. Representante legal da Caixa de Aforros de Galicia.

2. Representante legal da entidade Royal Club Golf Sant-iago, S.A.

3. Luis Reboredo Arca, en representación da entidade Redalux, S.L.

As persoas xurídicas designadas membros da Comisión Liquidadora actuarán a través dos seus órganos de administración ou das persoas que designen especificamente para iso, as cales poderán ser substituídas libremente por tales persoas xurídicas.

Como suplentes desígnanse por orde sucesiva os acredores ordinarios que non estean designados como titulares, dos cales os créditos figuren recoñecidos na lista definitiva de acredores formada pola Intervención Xudicial, pola orde da contía dos seus créditos de maior a menor.

Os suplentes entrarán a exerce-lo seu cargo no caso de que non aceptasen o nomeamento, ou renunciasen a el despois de aceptados, calquera dos designados en primeiro lugar. A subrogación na titularidade dos créditos por calquera título xurídico producirá o cesamento como membro da comisión do anterior titular, o cal será substituído polo que en definitiva resulte titular do crédito.

Os acredores designados membros da Comisión Liquidadora que non voten este convenio, enténdese que non aceptan formar parte da citada comisión, e enténdense substituídos polo acredor ou acredores ordinarios que ostentando o crédito de maior contía votasen este convenio.

4. Facultades da Comisión Liquidadora.

A Comisión Liquidadora terá as seguintes facultades:

1. Executa-lo presente convenio.

2. Exercer en nome dos acredores tódolos dereitos e accións que correspondan a eles como consecuencia deste convenio, toda vez que a comisión, polo só feito do seu nomeamento, queda lexitimada para actuar en nome da masa.

3. Rectifica-la relación de acredores de Ibergaliza, S.A. incluíndo nela acredores que fosen indebidamente omitidos, sempre que a existencia e lexitimidade do crédito omitido se acredite suficientemente. Igualmente poderá modifica-la relación de acredores no sentido de substituí-la persoa do titular cando, por cesión do crédito ou por pagamento efectuado por unha terceira persoa, se producise unha subrogación no acredor, así como reduci-la contía do crédito polas cantidades percibidas de calquera dos obrigados ó pagamento cando existan varios.

4. Realizar tódolos actos de disposición, administración e conservación dos bens, dereitos e accións que integran o activo de Ibergaliza, S.A., podendo contrata-lo persoal necesario para iso. Igualmente,

poderá realizar aqueles convenios que coide convenientes ou necesarios para a mellor conservación ou aproveitamento de calquera partida do activo, podendo transixir en calquera cuestión en que estea interesada a sociedade.

5. Paga-las custas e gastos do procedemento de suspensión, e ós acredores preferentes, privilexiados e con dereito a abstención, satisfacéndose co remanente os créditos ordinarios a pro rata dos seus importes.

6. Exercer como representante da masa de acredores de Ibergaliza, S.A. tódalas accións e dereitos contra terceiros, que correspondan ó conxunto dos acredores, incluso tercerías de dominio ou de mellor dereito, así como calquera transacción respecto deles.

7. Calquera outra facultade que sexan necesarias ou simplemente convenientes para o mellor cumprimento do presente convenio.

5. Réxime interno da Comisión Liquidadora.

1. A Comisión Liquidadora adoptará as fórmulas de funcionamento interior que coide convenientes, podendo nomear entre os seus membros un presidente e un secretario, así como un vicepresidente, coas facultades que considere oportunas.

2. A comisión constituirase validamente coa asistencia da maioría simple dos seus membros, adoptando as súas decisións e acordos igualmente por maioría simple. Poderá levar, se o considera necesario, un libro de actas das súas sesións, que se celebrarán coa periodicidade que se acorde.

3. A remuneración da Comisión Liquidadora polos traballos de alleamento de activos e pagamento ós acredores non poderá exceder do un por cento (1%) do producto dos mencionados alleamentos de activos.

6. Réxime da liquidación.

1. No prazo de quince días hábiles contados desde a data da resolución de aprobación do presente convenio, a entidade suspensa porá á plena disposición da Comisión Liquidadora tódolos documentos e papeis de comercio existentes nos seus arquivos, que sexan necesarios para a realización, conservación ou defensa dos bens que se ceden ós acredores.

2. No prazo de quince días hábiles contados desde a data da resolución de aprobación do presente convenio Ibergaliza, S.A. outorgará un poder notarial irrevogable a favor dos membros da Comisión Liquidadora coas máis amplas facultades de disposición, administración e representación que poderán exercer tres calquera dos seus membros mancomunadamente.

Ademais, tendo en conta a finalidade con que se outorga o poder, a entidade suspensa queda obrigada a amplialo nos termos que lle fosen solicitados pola Comisión Liquidadora, no suposto de que para algún acto concreto fose necesario contar con algunha facultade que por calquera razón se omitise no poder que se lle outorgue á comisión.

En todo caso, farase constar no poder que o mesmo outorga con carácter irrevogable ata que a comisión de acredores cumprisen as misións que neste convenio se lle encomendan e fose este último totalmente executado.

O non outorgamento dos poderes a favor da Comisión Liquidadora no prazo indicado, a non ampliación deles

cando sexa solicitada ou a súa revogación antes da execución total do convenio serán considerados como incumprimentos del para tódolos efectos legais.

Non obstante iso, se por causas obxectivas se producise un atraso no outorgamento ou ampliación dos poderes, a Comisión Liquidadora concederá un prazo que non poderá exceder de trinta días para que se outorguen ou emenden os poderes antes de que se teña por incumprido o convenio.

3. Así mesmo considerarase como incumprimento do presente convenio o que a partir da data da resolución xudicial da súa aprobación se exerza por calquera apoderado de Ibergaliza, S.A. distinto dos membros da súa Comisión Liquidadora, facultades que afecten directa ou indirectamente a calquera activo da suspensa.

4. A Comisión Liquidadora procederá á inmediata liquidación ordenada dos bens, accións e dereitos de Ibergaliza, S.A. e ó seu alleamento por calquera medio xurídico nos prazos, termos e condicións que considere convenientes, e ó reparto do seu producto entre os acredores ordinarios da suspensa ou pro rata do nominal dos seus respectivos créditos.

7. Cesamento da Comisión Liquidadora.

A Comisión Liquidadora cesará nas súas funcións cando liquidase integramente o activo do comerciante suspenso e distribuíse o resultado da liquidación entre os acredores.

8. Cumprimento do convenio.

Co cumprimento do presente convenio quedarán liquidadas as relacións entre a entidade suspensa e os seus administradores e os acredores dela, pero sen que se extingan os dereitos que estes últimos posúan a título individual ou conxuntamente contra terceiras persoas ou entidades, como consecuencia de avais, garantías ou por calquera título en relación coas obrigacións de Ibergaliza, S.A., conservando os acredores de Ibergaliza, S.A. tódalas accións de calquera clase, que ostenten contra terceiras persoas físicas ou xurídicas, por virtude dos negocios xurídicos en que interviñese Ibergaliza, S.A. e das escrituras públicas, pólizas ou calquera outro documento que o mencionado negocio xurídico.

Os acredores deberán comunicar fidedignamente á suspensa, ós terceiros obrigados e á Comisión Liquidadora designada neste convenio, o todo ou parte que os ditos créditos perciban, co obxecto de realiza-las oportunas deduccións nas cantidades que deberá paga-la suspensa. O que non cumprise esta obrigación dentro do mes seguinte ó recobro perderá o dereito a percibir da suspensa, non só a cantidade recuperada, senón outro tanto en concepto de danos e perdas causados ós demais acredores.

9. Domicilio.

Para tódolos efectos legais, os acredores fixan como domicilio para notificacións, citacións e requirimento, o que para cada un deles estea reflectido na lista definitiva de acredores. Calquera cambio de enderezo deberá ser comunicado de modo fidedigno á Comisión Liquidadora.

Terceiro.-Transcorreu o termo de oito días, dentro do cal se podía formular oposición á aprobación do

convenio, sen que se presentase escrito nin se efectuase comparecencia ningunha para tales fins.

Razoamentos xurídicos.

Único.-En consecuencia, procede aproba-lo convenio mencionado tal como ordena o artigo 17 da Lei de suspensión de pagos do 26 de xullo de 1922.

Vistos os artigos citados e demais de xeral e pertinente aplicación a este caso, a S.Sª. dispón:

Parte dispositiva.

Apróbase o convenio votado favorablemente na Xunta Xeral de Acredores celebrada no procedemento de suspensión de pagamentos de Ibergaliza, S.A., transcrito no feito segundo desta resolución, e ordénase ós interesados a estar e pasar por el; fágase pública esta resolución mediante edictos que se fixen no taboleiro de anuncios deste xulgado e insiran así mesmo no Diario Oficial de Galicia e nos mesmos xornais en que se publicou a convocatoria daquela xunta, así como no Boletín Oficial del Estado, expedíndose tamén mandamento por duplicado con transcrición da parte dispositiva desta resolución para o rexistrador encargado do Rexistro Mercantil desta provincia e diríxase igualmente mandamentos ó rexistrador da Propiedade de Santiago de Compostela, números 1 e 2, de Cambados, de Padrón e de Negreira, para efectos da cancelación das anotacións preventivas causadas en méritos deste expediente sobre os predios propiedade da suspensa, inscritos nos ditos rexistros; particípese así mesmo

mediante oficio a parte dispositiva desta resolución ós demais xulgados de primeira instancia e instrucción desta cidade, así como a todos aqueles xulgados ós que se lles comunicou o auto que declara o debedor en estado de suspensión de pagamentos; e cesen os interventores xudiciais nomeados neste expediente, Juan Feáns Parada, Tomás Ucieda Somoza e José Gómez Blanco.

Así por este seu auto o dispón, manda e asina S.Sª».

E para que así conste e para a súa publicación no diario La Voz de Galicia, expido e asino este auto en Santiago de Compostela, o trinta e un de xullo de mil novecentos noventa e cinco.

O maxistrado xuíz

Rubricado

O secretario xudicial

Rubricado

7242