Visto o texto do convenio colectivo para o sector de industrias vinícolas da provincia de Lugo (código 2700045), asinado o día 5 de xuño de 1998, pola representación da Asociación de Empresarios Mayoristas de Vinos de la provincia de Lugo e da central sindical CSI-CSIF (100%), e de conformidade co disposto no artigo 90.2º y 3º do Real decreto lexislativo 1/1995, do 24 de marzo, polo que se aproba o texto refundido da Lei do Estatuto dos traballadores, e no Real decreto 1040/1981, do 22 de maio, sobre rexistro e depósito de convenios colectivos de traballo, esta delegación provincial
ACORDA:
Primeiro.-Ordena-la inscrición do citado convenio colectivo no rexistro de convenios desta delegación, así como o seu depósito.
Segundo.-Remitirlle o texto do dito convenio á Dirección Xeral de Relacións Laborais da Xunta de Galicia.
Terceiro.-Dispoñe-la súa publicación no Diario Oficial de Galicia.
Lugo, 30 de xuño de 1998.
José María Fernández Olea
Delegado provincial de Lugo
Convenio colectivo de industrias vinícolas da provincia de Lugo
Artigo 1º.-Ámbito funcional.
As estipulacións do presente convenio colectivo obrigan a tódalas empresas e traballadores da actividade de industrias vinícolas, alcoleiras e sidreiras, así como da actividade de almacenamento de viños e licores.
Artigo 2º.-Ámbito persoal.
Quedan comprendidos neste convenio tódolos traballadores das empresas incluídas no seu ámbito funcional, coa excepción dos menores de 16 anos, dos que queda prohibida a súa contratación.
Artigo 3º.-Ámbito temporal.
A duración do presente convenio será desde o 1 de maio de 1998 ata o 30 de abril do ano 2000, con independencia da súa data de publicación no BOP ou Diario Oficial de Galicia.
Artigo 4º.-Ámbito territorial.
O ámbito territorial será a provincia de Lugo.
Artigo 5º.-Denuncia.
O convenio prorrogarase por períodos anuais, ó non denunciarse por calquera das partes con antelación dun mes respecto da data de remate.
Artigo 6º.-Salario.
Inclúese anexa a este texto a táboa salarial vixente desde o 1 de maio de 1998 ata o 30 de abril de 1999.
Para o período que vai desde o 1 de maio de 1999 ata o 30 de abril do ano 2000, o incremento salarial será o IPC previsto para o Goberno para o ano 1999.
Artigo 7º.-Antigüidade.
Quinquenios ó 5% sobre o salario base de convenio que lle corresponda á categoría do traballador; o seu importe variará de acordo co ascenso de categoría e da correspondente escala salarial. Para efectos de antigüidade, esta comezarase a contar desde o día en que o traballador comezou a presta-los seus servicios na empresa. Todo iso sen prexuízo do establecido no artigo 25 do Real decreto lexislativo 1/1995, do 24 de marzo, polo que se aproba o texto refundido da Lei do Estatuto dos traballadores.
Artigo 8º.-Comité paritario.
Conforme o establecido no artigo 85 do Estatuto dos traballadores, constituirase unha comisión mixta paritaria para a interpretación, aplicación e desenvolvemento das cláusulas deste convenio, así como a incorporación ou adaptación das modificacións da normativa laboral xeral ó seu ámbito funcional.
A comisión paritaria estará integrada por dous representantes de cada unha das partes asinantes do presente acordo.
Os acordos da comisión paritaria son vinculantes para ámbalas partes e, se é o caso, pasarán a integra-lo contido do convenio colectivo. Para a súa validez requiren o voto favorable maioritario de cada unha das dúas partes consideradas individualmente.
Será preceptiva a presentación de reclamación previa perante a comisión paritaria por conflictos, tanto individuais como colectivos, naquelas reclamacións que se pretenda interpor ante a xurisdicción social cando o seu fundamento legal se derive da aplicación ou interpretación das cláusulas do presente convenio.
Artigo 9º.-Pagas extraordinarias.
As gratificacións extraordinarias do Nadal e do 25 de xullo serán equivalentes cada unha delas ó importe dunha mensualidade e aboaranse os días 22 de decembro e 22 de xullo, respectivamente.
Artigo 10º.-Vacacións.
Tódolos traballadores sometidos a este convenio colectivo desfrutarán dun período anual de vacacións de trinta días naturais.
Artigo 11º.-Xornada laboral.
Establécese unha xornada laboral consistente en 40 horas semanais que se distribuirán de luns a venres, ambos inclusive, salvo nos casos nos que entre empresa e traballadores se tome acordo en contra con respecto dos traballos en sábados.
Artigo 12º.-Roupa de traballo.
As empresas cada ano distribuirán dúas fundas para cada un dos seus traballadores. Así mesmo, entregarán traxes de auga ó requirilo as condicións climáticas e os productores que presten servicio no exterior.
Artigo 13º.-Premio de xubilación.
Establécese para tódolos traballadores que se xubilen con polo menos dez anos de antigüidade na empresa e consistirá nunha gratificación equivalente ó salario base do convenio dun mes, maila antigüidade.
Así mesmo, e compatible co premio ou gratificación anterior, establécese que aqueles traballadores con polo menos dez anos de antigüidade na empresa que soliciten a súa xubilación antes dos 65 anos, e que reúnan as condicións legalmente establecidas, percibirán como premio de xubilación as seguintes cantidades:
* Ós 60 anos: 175.000 pesetas.
* Ós 61 anos: 150.000 pesetas.
* Ós 62 anos: 125.000 pesetas.
* Ós 63 anos: 100.000 pesetas.
Os premios de xubilación contidos no presente artigo terán carácter extrasalarial.
Artigo 14º.-Licencias retribuídas.
O persoal neste convenio colectivo desfrutará das seguintes licencias retribuídas.
-15 días no caso de matrimonio.
-2 días por cambio de domicilio na cidade.
-4 días por cambio de residencia fóra da cidade.
En todo caso e por aplicación do disposto no artigo 37 do Estatuto dos traballadores, os traballadores terán dereito a licencia polos motivos e coa duración prevista no dito artigo, incluído o apartado engadido por medio do establecido na disposición adicional décimo primeira da Lei 31/1995, de prevención de riscos laborais.
Artigo 15º.-Retirada do carné de conducir.
As empresas, con respecto ós choferes repartidores ós que, en cumprimento das súas obrigas laborais se lles retirou o carné de conducir por infracción
cando conducían un vehículo da empresa, comprometeranse a ocupa-lo traballador afectado nas tarefas que requiran unha cualificación profesional equivalente e compatible coa súa, por un máximo de tres meses.
Esta medida non será de aplicación no caso de infracción reiterada ou de retirada definitiva do carné de conducir.
Artigo 16º.-Seguro de invalidez ou morte.
As empresas suxeitas a este convenio colectivo contratarán en favor dos seus traballadores -sempre e cando o traballador figure na relación do TC2 con polo menos sesenta días- un seguro de accidente dunha contía de dous millóns de pesetas nos casos de invalidez permanente ou morte; as indemnizacións que tivesen lugar por estes conceptos aboaranse a través da empresa.
Esta compensación é compatible coa pensión ou indemnización que puidese causa-lo traballador, na Seguridade Social ou mutua patronal, así como con calquera outra que sexa imputable a terceiros.
Artigo 17º.-Plus de transporte.
Establécese un plus de transporte para tódolos traballadores afectados polo presente convenio, na contía mínima de 190 pesetas por día efectivamente traballado.
Artigo 18º.-Paga extrasalarial.
As empresas sometidas ó presente convenio colectivo aboaranlles ós seus traballadores no mes de outubro unha gratificación extrasalarial co nome de Nosa Señora das Viñas.
A súa contía será como mínimo de 71.470 pesetas para tódalas categorías.
Artigo 19º.-Dereitos sindicais.
As empresas afectadas polo presente convenio colectivo poderán deducir a través da nómina as cotas correspondentes ós afiliados das centrais sindicais asinantes do presente convenio. Os interesados deberán solicitarllo por escrito á dirección da empresa.
Os importes retidos seranlle entregados á persoa que designe a central sindical ou ó número de conta que esta lle notifique á empresa.
Artigo 20º
As táboas salariais do presente convenio en ningún caso quedarán por baixo do salario mínimo interprofesional que fixe o Goberno anualmente, senón 100 pesetas por riba deste, e respectarán as diferencias nas categorías.
Disposición derradeira
En todo o non previsto no presente convenio observarase o disposto na lexislación laboral vixente.
Disposicións adicionais
Primeira.-Xubilación voluntaria ós 64 anos.
Os traballadores incluídos no ámbito persoal do presente convenio colectivo de traballo con 64 anos
cumpridos que desexen acollerse á xubilación voluntaria co 100% dos dereitos, poderán facelo. As empresas afectadas veranse obrigadas a concede-la dita xubilación e substituír a cada traballador conforme o previsto no Real decreto 1194/1985 ou a normativa que o substitúa.
Segunda.-Contratación eventual segundo o artigo 15.1.b) do Estatuto dos traballadores.
Estes contratos poderán ter unha duración máxima de 13 meses e medio dentro dun período de 18 meses.
Terceira.-Axudas de custo.
Para efectos de garantir que os traballadores sexan reintegrados dos gastos que realicen como consecuencia do seu traballo, todo traballador con dereito a axuda de custo percibirá unha cantidade fixa por axuda de custo completa e unha cantidade fixa por media axuda de custo, segundo o caso, ou ben gastos para xustificar á elección da empresa.
Cuarta.-Extinción de contratos do artigo 52.c) do Estatuto dos traballadores.
As empresas afectadas polo presente convenio deberán poñer en coñecemento dos representantes legais dos traballadores do centro de traballo ou empresa correspondente calquera situación que puidese dar orixe a extincións de contrato conforme as circunstancias ás que fai referencia a alínea c) do artigo 52 do Estatuto de traballadores, con indicación das posibles causas.
Quinta.-Contrato indefinido de fomento de emprego.
Entendendo as partes asinantes que a modalidade contractual de contrato para o fomento da contratación indefinida é un instrumento adecuado para a consecución de emprego estable, no ámbito de aplicación do presente convenio poderá concertarse esta modalidade contractual con traballadores empregados na empresa mediante un contrato de duración determinada ou temporal, incluídos os contratos formativos, subscrito unha vez transcorrido un ano desde a entrada en vigor do Real decreto lei 8/1997.
Táboa salarial convenio industrias vinícolas
Vixente desde o 1 de maio de 1998 ata o 30 de abril de 1999
Grupo/Categoría profesional Soldo Retribución anual
Grupo A.-Técnicos Encargado 74.917 1.169.081
Grupo B.-Administrativos Auxiliar administrativo, oficial 2ª 73.173 1.144.665
Grupo C.-Comerciais Viaxante, oficial 2ª 73.173 1.144.665
Grupo/Categoría profesional Soldo Retribución anual
Grupo D.-Subalternos Limpador/a 73.073 1.143.265
Grupo E.-Obreiros E.1. Profesionais de oficio: Conductor carnet 1ª, oficial 1ª 74.400 1.161.843 Conductor repartidor, oficial 2ª 73.173 1.144.665
E.2. Outros: Almaceneiro, oficial 2ª 73.173 1.144.665 Mozo especialista 73.073 1.143.265
6853
