Mediante Orde do 27 de abril do 1998 (DOG do 30 de abril), a Consellería de Familia e Promoción do Emprego, Muller e Xuventude regulou as axudas e subvencións para o fomento do emprego polas entidades locais a través dos denominados programas de cooperación.
O orzamento adicional para o financiamento do Plan de Acción para o Emprego do Reino de España 1998, que supón un incremento dos fondos finalistas asignados á Comunidade Autónoma de Galicia para subvencionar programas de cooperación con entidades locais, aconsella abrir un novo prazo de presentación de solicitudes e orienta-las actuacións para desenvolver cara á prestación de servicios de especial interese para a comunidade e con maior potencialidade de xeración de novos empregos, respectando a regulación prevista na antedita orde que, en todo caso, ten carácter de dereito supletorio.
Consecuentemente co que antecede, consultado o Consello Galego de Relacións Laborais e no exercicio das facultades que teño atribuídas polo artigo 34 da Lei 1/1983, do 22 de febreiro, reguladora da Xunta e do seu presidente
DISPOÑO:
Artigo único.-As entidades locais que reúnan os requisitos establecidos no artigo 9 da Orde do 27 de abril de 1998, pola que se regulan as axudas e subvencións para o fomento do emprego polas enti
dades locais a través dos programas de cooperación poderán, no prazo de 20 días hábiles contados desde o seguinte ó da publicación da presente orde no Diario Oficial de Galicia, solicita-las subvencións previstas no capítulo II da referida orde, sempre que a contratación de desempregados teña por obxecto a realización dalgunha das seguintes accións:
a) Prestación de servicios de ocio, culturais ou de promoción do deporte, en especial os dirixidos a facilita-lo acceso e uso das instalacións deportivas dos centros educativos durante as fins de semana, períodos vacacionais e horarios de inactividade docente.
b) Prestación de servicios personalizados de carácter cotián, tales como o coidado de nenos, a prestación de axuda a domicilio a persoas maiores ou incapacitadas e o apoio e axudas a xoves en dificultade e/ou con desarraigo social.
c) Contratación de parados de longa duración maiores de 40 anos para a realización de obras ou servicios de interese xeral ou social.
Disposicións adicionais
Primeira.-Por petición da entidade local interesada, as delegacións provinciais poderán autoriza-la prórroga da prestación de servicios aprobados en virtude das solicitudes formuladas no prazo establecido na Orde do 27 de abril do 1998, cando a súa continuidade resulte de especial interese para a comunidade, sen superar, en ningún caso, a data límite establecida no artigo 11.1º e) da citada orde. Neste suposto, a subvención correspondente á prórroga calcularase en función da súa duración e das contías aprobadas para o período inicial. A antedita petición deberá realizarse cunha antelación mínima de trinta días naturais á data inicialmente prevista para a finalización do servicio.
Segunda.-En todo o non previsto nesta orde, observarase o disposto na do 27 de abril do 1998, da
Consellería de Familia e Promoción do Emprego, Muller e Xuventude, pola que se regulan as axudas e subvencións para o fomento do emprego polas entidades locais, a través dos programas de cooperación.
Disposicións derradeiras
Primeira.-Autorízase o director xeral de Fomento do Emprego para dictar, no ámbito das súas competencias, as resolucións e instruccións necesarias para o desenvolvemento e execución da presente norma.
Segunda.-Esta orde entrará en vigor o día seguinte ó da súa publicación no Diario Oficial de Galicia.
Santiago de Compostela, 7 de agosto do 1998.
Manuela López Besteiro
Conselleira de Familia e Promoción do Emprego,
Muller e Xuventude
7648
