Dentro dos obxectivos da normalización lingüística no ámbito da Administración local comprendidos na Lei 5/1988, do 21 de xuño, de uso do galego como lingua oficial de Galicia polas entidades locais, están os mencionados nos seus artigos:
Artigo 1º
«As convocatorias de sesións, ordes do día, votos particulares, propostas de acordo, dictames das comisións informativas e actas das entidades locais de Galicia, redactaranse en lingua galega».
Artigo 2º
1.«Correspóndelle á Xunta de Galicia o pulo do proceso de incorporación da lingua galega na Administración local, moi especialmente a través de programas de formación de funcionarios en lingua galega»; e no punto 2.2. «Sen prexuízo do anterior, a Xunta de Galicia adoptará as medidas oportunas para que nos concursos de acceso de funcionarios á Administración local se garante o coñecemento da lingua galega».
A Lei 5/1997, do 22 de xullo, de Administración local de Galicia, nos seus apartados 1º e 3º do artigo 7 dispón, respectivamente: «O galego, como lingua propia de Galicia éo tamén da súa Administración local.
As convocatorias de sesións, ordes do día, mocións, votos particulares, propostas de acordo, dictames das comisións informativas, actas, notificacións, recursos, escrituras públicas, comparecencias xudiciais e tódolos actos de carácter público ou administrativo que se realicen por escrito en nome das corporacións locais redactaranse en lingua galega».
«A Xunta de Galicia impulsará o proceso de incorporación da lingua galega na Administración local, especialmente a través de programas de formación de funcionarios das entidades locais en lingua galega».
Co fin de acadar estes obxectivos, a Xunta de Galicia elaborou un plan integral de estudios dedicado ós funcionarios que presten os seus servicios nas corporacións locais galegas, do que forman parte os cursos
básicos, medio e de especialización, obténdose, ó remate destes, o título de traductor oficial de linguaxe administrativa galega, título que habilita os que o obteñan para encargarse da traducción da documentación á que se refire o artigo 1 da Lei 5/1988, do 21 de xuño.
Os funcionarios que se formen nos devanditos cursos serán a base duns gabinetes de traducción para o idioma galego que deberán estar implantados en tódolos municipios de Galicia co fin de cumpri-los mandados contidos nas Leis 5/1988, do 21 de xuño, e 3/1983, de 15 de xuño, de normalización lingüística. Mentres os devanditos gabinetes de traducción non poidan estar integrados por funcionarios en activo da correspondente corporación local e co fin de acelera-lo cumprimento, por parte dos municipios, da legalidade vixente,
DISPOÑO:
Artigo 1º
A Consellería de Xustiza, Interior e Relacións Laborais convoca axudas destinadas a sufraga-los custos de contratación de persoal alleo polos concellos, mentres estes non dispoñan do persoal funcionario -preciso e suficientemente formado-, para encargarse da traducción para o galego dos documentos ós que se refire o artigo 1.1º da Lei 5/1988, do 21 de xuño, así como os derivados das actividades destinadas a fomenta-lo uso do galego.
Artigo 2º
As axudas ás que se refire o artigo anterior faranse efectivas, no seu día, con cargo á aplicación orzamentaria 13.02.760.0, programa 353.F, dos vixentes orzamentos xerais da Comunidade Autónoma galega, ata un límite de vintecinco millóns de pesetas (25.000.000 de pesetas).
Artigo 3º
As subvencións serán solicitadas polo alcalde de cada concello, utilizando o modelo que figura como anexo I desta orde, e concederanse para as modalidades que a continuación se relacionan:
1. Mantemento dos servicios municipais de normalización lingüística xa existentes.
2. Creación de novos servicios municipais de normalización lingüística, debidamente xustificados e sempre que exista crédito suficiente.
3. Fomento da lingua galega mediante o seu uso en actividades tales como publicacións de actos culturais, deportivos, turísticos, etc., promovidos polo concello.
Artigo 4º
Os servicios municipais de normalización lingüística contarán, polo menos, cun especialista titulado en lingua galega (licenciado en filoloxía galego-portuguesa, en filoloxía galega ou mestre de EXB co diploma de especialista en lingua galega).
Artigo 5º
Os gabinetes municipais de normalización lingüística deberán cumpri-la seguinte misión:
a) Velar porque sexa aplicada a Lei de normalización lingüística de Galicia no ámbito de actuación do concello correspondente, así como a Lei do uso do galego como lingua oficial de Galicia polas entidades locais. As accións máis importantes serán: confección en galego das actas, edictos, convocatorias de sesións, ordes do día, dictames das comisións informativas, mocións e traduccións de tódolos impresos oficiais en lingua galega.
b) Ofrecerlle ó público asesoramento lingüístico para a corrección de textos galegos e para a súa traducción, se fose posible.
c) Impulsa-la normalización do galego nos diferentes ámbitos da vida pública.
Artigo 6º
Xunto coa petición remitirase a seguinte documentación. En tódolos casos,
a) Breve memoria descritiva da modalidade para a que se solicita a subvención, na que consten tódolos datos referidos a ela.
b) Orzamento de gastos, total e desagregado por capítulos, para a realización da actividade para a que se solicita a axuda.
c) Certificación do secretario da corporación de que para o dito cometido non gozan de ningunha outra subvención.
d) Transcrición certificada do acordo municipal, en pleno ou comisión de goberno, da solicitude de subvención.
e) Certificación bancaria (orixinal) da conta corrente na que desexen que se lles ingrese o importe da subvención.
f) Fotocopia do NIF do concello.
Artigo 7º
1. O prazo de presentación de solicitudes será dun mes, contado a partir do seguinte ó da publicación desta orde no Diario Oficial de Galicia.
2. Para o lugar de presentación de solicitudes será de aplicación o previsto no artigo 38 da Lei 30/1992, do 26 de novembro, de réxime xurídico das administracións públicas e do procedemento administrativo común.
3. O defecto na solicitude seralles notificado ós interesados e daráselles un prazo de 10 días para emendaren erros ou omisións. Transcorrido o dito prazo, se non se producise a dita emenda, as peticións serán arquivadas sen máis trámite.
Artigo 8º
Recibidas as solicitudes de subvención e a súa documentación, serán analizadas polos servicios competentes da Dirección Xeral de Xustiza e Administración Local, e o director xeral elevará a correspondente pro
posta ó conselleiro de Xustiza, Interior e Relacións Laborais, quen resolverá no prazo máximo dun mes.
Artigo 9º
Na valoración das solicitudes teranse en conta os seguintes aspectos:
a) Relación de necesidades municipais reflectidas na petición.
b) A situación económica do concello considerada pola contía do seu orzamento.
c) A poboación do municipio.
Artigo 10º
Os beneficiarios da subvención, unha vez concedida esta, quedarán obrigados a destina-los fondos percibidos ó obxecto concreto para o que foron concedidos. A Dirección Xeral de Xustiza e Administración Local poderá comprobar, cando o considere conveniente, a execución dos proxectos subvencionados.
Artigo 11º
Para recibi-la subvención, os concellos seleccionados deberán remitir á Dirección Xeral de Xustiza e Administración Local (Consellería de Xustiza, Interior e Relacións Laborais), antes do día 30 de novembro de 1998 os seguintes xustificantes dos gastos realizados:
1. No caso de que a subvención se concedese para o mantemento dos servicios de normalización lingüística xa existentes ou para a creación de novos servicios municipais de normalización lingüística:
a) Copia compulsada do contrato vixente, ou, se é o caso, prorrogado que o concello formalice co/os especialista/as con ulterioridade á concesión da subvención e para o cumprimento dela e,
b) Mandamento de pagamento ou certificación do pagamento das retribucións especificadas no contrato sinalado conformada polo interventor do concello.
2. No caso de que a subvención se concedese para a organización de campañas co obxecto de logra-la normalización lingüística no concello: facturas orixinais do gasto realizado ou copias compulsadas, xunto coa de certificación expedida polo secretario xeral da corporación relativa ó acordo da súa aprobación.
Artigo 12º
No caso de que no prazo de tres meses non se comunique a concesión da subvención, entenderase desestimada.
Disposicións derradeiras
Primeira.-Facúltase o director xeral de Xustiza e Administración Local para dicta-las resolucións necesarias para o desenvolvemento desta orde.
Segunda.-A presente orde entrará en vigor o día seguinte ó da súa publicación no Diario Oficial de Galicia.
Santiago de Compostela, 31 de xullo de 1998.
Jesús C. Palmou Lorenzo
Conselleiro de Xustiza, Interior e Relacións Laborais
6603
