Seguindo na liña de actuación xa reflectida nos plans de inspección sanitaria dos últimos anos, e tendo en conta as análises e conclusións recollidas no informe da Subcomisión para a Consolidación e Modernización do Sistema Nacional de Saúde, elaborouse o plan de inspección sanitaria para o presente ano, que ten como obxectivo a avaliación da calidade e da garantía das prestacións sanitarias.
Así mesmo, e como actividades complementarias, inclúense nel determinadas actuacións relacionadas coas prestacións en materia de saúde laboral e coa actividade dos establecementos farmacéuticos na Comunidade Autónoma.
En consecuencia, de acordo co establecido no Decreto 126/1992, do 14 de maio, sobre ordenación das funcións da Inspección de Servicios Sanitarios, por proposta do secretario xeral,
DISPOÑO:
Artigo 1º
Apróbase o plan de inspección sanitaria para 1998, que figura como anexo da presente orde.
Artigo 2º
A memoria anual de actividades de inspección sanitaria correspondente a 1998 elaborarase tendo en conta os resultados dos programas incluídos no presente plan.
Os servicios provinciais da inspección sanitaria deberán remiti-la memoria de actividades correspondente á súa provincia antes do 30 de xaneiro de 1999.
Santiago de Compostela, 27 de febreiro de 1998.
José María Hernández Cochón
Conselleiro de Sanidade e Servicios Sociais
ANEXO
I. Saúde laboral.
1º. Inspecciona-lo 100% dos centros sanitarios propios das MATEPS existentes en Galicia e promove-lo rexistro sanitario daqueles que reúnan as condicións de adecuación e suficiencia.
2º. Inspecciona-los recursos e instalacións do 100% dos servicios de prevención con carácter previo á súa acreditación na Comunidade Autónoma de Galicia.
3º. Revisar antes do 30 de xuño o 100% dos procesos de incapacidade temporal cunha duración superior a 3 meses.
4º. Reducir nun 0,5% a taxa global de absentismo por incapacidade temporal en Galicia.
5º. Elaborar e implantar en tódalas áreas de inspección, en colaboración con outras unidades da consellería e Sergas, o novo programa informático de xestión e seguimento da incapacidade temporal.
II. Preatacións complementarias e calidade asistencial.
Análise de calidade das historias clínicas en atención primaria.
Avalia-lo grao de información facilitada e o plan de acollida a pacientes ingresados en hospitais do SERGAS.
Reducir nun 15% o gasto por transporte sanitario en Ourense e nun 5% en Lugo en relación a 1997.
Implanta-lo programa de descentralización administrativa de prestacións nos servicios de atención primaria de Ourense.
Implanta-lo protocolo de derivación de pacientes no 100% dos centros concertados para rehabilitación en Lugo, Sarria, Burela e Ribadeo.
Revisión do 50% dos pacientes en osixenoterapia con concentrador nas áreas de Lugo, Santiago de Compostela e Ferrol.
Avalia-lo nivel de satisfacción de pacientes derivados a centros concertados para cirurxía en Lugo e Pontevedra.
Reduci-la demora máxima na resolución de expedientes de reintegro de gastos de transporte e ortoprótese a 40 días nas provincias de Lugo e A Coruña.
Implanta-lo sistema de transporte sanitario colectivo para tratamentos crónicos na provincia da Coruña.
Estudio do grao de implantación do consentimento informado nos centros concertados polo Sergas na Coruña, Lugo, Ourense e Pontevedra.
Valoración do 100% das altas voluntarias de pacientes asistidos en centros concertados na provincia de Pontevedra.
Avalia-lo impacto da normativa da Comunidade Autónoma para a prestación ortoprotésica no seu primeiro ano de aplicación na Coruña, Lugo e Pontevedra.
Análise das reclamacións por asistencia sanitaria na provincia de Pontevedra.
Avalia-la actividade e custo do transporte sanitario, urxente e programado, na Coruña e Pontevedra.
III. Farmacia.
Programa de verificación da presencia e actuación profesional do farmacéutico na dispensación de medicamentos ó público e da correcta identificación do persoal facultativo e auxiliar nas oficinas de farmacia, nas catro provincias da Comunidade Autónoma.
Inspección do 100% dos depósitos de medicamentos en establecementos hospitalarios que carezan de servicios farmacéuticos autorizados.
Seguimento do cumprimento da normativa reguladora do uso de receitas oficiais por facultativos que non teñan a condición de estatutarios ou funcionarios pero que presten servicios a pacientes do Sergas.
Incrementa-la revisión das receitas facturadas ó Sergas ata un 8% na provincia de Lugo.
IV. Asistencia sanitaria prestada en centros privados.
Inspección dos centros de reproducción asistida humana.
Realiza-la segunda fase do programa iniciado no ano 1997 relativo á adecuación normativa e condicións técnico-sanitarias das clínicas odontolóxicas.
1947
