Vistos os informes e estudios previos elaborados pola Xerencia de Promoción do Camiño de Santiago.
Vista a Lei 3/1996, de 10 de maio, de protección dos camiños de Santiago.
A Consellería de Cultura, Comunicación Social e Turismo, a través da Xerencia de Promición do Camiño de Santiago, no uso das competencias atribuídas polo Decreto 8/1998, do 8 de xaneiro, polo que se desenvolve a estructura orgánica da devandita consellería, e, baseándose no artigo 86 da Lei 30/1992, de 26 de novembro, de réxime xurídico das administracións públicas e do procedemento administrativo común (BOE nº 285 do 27 de novembro de 1992) e no artigo 5 da Lei 3/1996, do 10 de maio, de protección dos camiños de Santiago (DOG nº 101 do 23 de maio de 1996),
ACORDO:
Primeiro.-Incoa-lo expediente de delimitación e deslindamento da Ruta do Mar de Arousa e Ulla.
Segundo.-O trazado inicial obxecto de delimitación axustarase ás bases que figuran no apartado 5º do presente acordo.
Terceiro.-De acordo co art. 5.2º da Lei 3/1996, de 10 de maio, de protección dos camiños de Santiago, a incoación deste expediente seralles notificada ós concellos polos que discorre esta Ruta Xacobea.
Cuarto.-Proceder á delimitación e deslindamento desta ruta a través dunha proposta que, trala información previa que determina a disposición transitoria segunda da devandita Lei de protección dos
camiños de Santiago, será sometida á información pública.
Quinto.-A proposta a que se refire o apartado anterior, na súa fase inicial, debe incluír, basicamente:
a) A definición como camiño físico, no tramo marítimo-fluvial desta ruta, a canle navegable entre os peiraos de Pontecesures e Padrón e a entrada da ría por calquera das bandas da Illa de Sálvora.
b) A descrición do trazado terrestre Padrón-Santiago, en todo coincidente co mesmo tramo do Camiño Portugués sometido xa á información pública no DOG nº 3 do 7-12-97.
c) O índice de concellos e parroquias bañadas polo tramo marítimo-fluvial e os percorridos polo tramo terrestre, da mesma forma en que se levou a cabo nas restantes propostas de delimitación dos camiños de Santiago.
Sexto.-O presente acordo será publicado no Diario Oficial de Galicia.
Santiago de Compostela, 19 de febreiro de 1998.
Andrés González Murga
Secretario xeral da Consellería de Cultura,
Comunicación Social e Turismo