Vistas as peticións de prórroga das concesións que se citan no anexo, resulta:

Antecedentes de feito

1º Por orde do Ministerio de Comercio do 7 de outubro de 1975 (BOE nº 254/75), outórganse 930 concesións administrativas para a instalación doutros tantos parques de cultivo de moluscos na zona do Carril, distrito marítimo de Vilagarcía de Arousa, a precario e por un prazo de 10 anos, prorrogables por petición dos interesados.

Por Orde do 29 de outubro de 1984 (DOG nº 235/84), outórgase concesión administrativa para instalar un parque de cultivo de ameixas e berberechos, no distrito marítimo de Vilagarcía de Arousa, a favor de Dolores Ferreiros Muñiz, en precario e por un prazo de 10 anos, prorrogables por petición da interesada.

Por Orde do 29 de outubro de 1984 (DOG nº 232/84), outórgase un parque de cultivo de ameixas e berberechos no distrito marítimo de Vilagarcía de Arousa, a favor de María González Bures, en precario e por un prazo de 10 anos, prorrogables por petición da interesada.

Por Orde do 17 de setembro de 1984 (DOG nº 204/84), outórgaselle concesión administrativa a Rolando Vidal Dios para instalar un parque de cultivo de moluscos no distrito marítimo de Vilagarcía de Arousa, cunha ocupación de 1552,2 m do dominio público, por un prazo de 10 anos, prorrogables por petición do interesado.

2º Mediante Decreto 158/1991, do 16 de maio, declárase de interese marisqueiro e urxente execución a revisión e reordenación dos citados parques de cultivo, co obxecto de proceder a unha regularización da situación de feito existente, á revisión das circunstancias de titularidade dos parques e á oportuna reordenación que adecúe a súa situación e superficie a unha explotación máis racional dos recursos.

3º Aprobada a fase de revisión do citado proceso por resolución da Dirección Xeral de Marisqueo e Acuicultura do 26 de decembro de 1995, cómpre proceder ó inicio da fase de reordenación, da que xurdirán as novas concesións, para o que resulta inescusable desestimar, neste momento do proceso, tales peticións de prórroga.

Fundamentos xurídicos

1º Este órgano é competente para resoler tales peticións de conformidade co disposto no R.D. 3318/1982, do 24 de xullo, sobre traspaso de funcións e servicios da Administración do Estado á Comunidade Autónoma de Galicia en materia de pesca e na Lei 6/1993, do 11 de maio, de pesca de Galicia.

2º Tendo en conta que o prazo de vixencia das concesións administrativas que amparan os citados parques expirou, e que de conformidade co disposto no apartado C do artigo 72 da Lei 6/1993, do 11 de maio, as concesións se extinguirán polo vencemento do prazo de outorgamento sen que se solicitase e se concedese prórroga.

Por todo o anterior, esta consellería facendo uso das súas atribucións e competencias, acorda denega-las prórrogas solicitadas e proceder de conformidade co artigo 72 da Lei 6/1993, do 11 de maio, de pesca de Galicia, á extinción das concesións relacionadas no anexo á presente orde.

A presente orde esgota a vía administrativa e contra ela os interesados poderán interpor o correspondente recurso contencioso-administrativo perante a orde xurisdiccional competente, no prazo de 2 meses contados desde o seguinte á publicación desta orde tal e como establece a Lei de xurisdicción contencioso-administrativa.

Disposición derradeira

A presente orde entrará en vigor o día seguinte ó da súa publicación no Diario Oficial de Galicia.

Santiago de Compostela, 28 de xaneiro de 1998.

Amancio Landín Jaráiz

Conselleiro de Pesca, Marisqueo e Acuicultura

ANEXO

1) Orde do 7 de outubro de 1975 pola que se outorgan 930 concesión administrativas para a instalación doutros tantos parques de cultivo de moluscos na zona do Carril, distrito marítimo de Vilagarcía de Arousa.

2) Orde do 29 de outubro de 1984 pola que se outorga concesión administrativa para instalar un parque de cultivo de ameixas e berberechos, no distrito marítimo de Vilagarcía de Arousa, a favor de Dolores Ferreiro Muñiz (DOG nº 235, do 7 de decembro de 1984).

3) Orde do 29 de outubro de 1984 pola que se outorga un parque de cultivo de ameixas e berberechos, no distrito marítimo de Vilagarcía de Arousa, a favor de María González Bures (DOG nº 232, do 4 de decembro de 1984).

4) Orde do 17 de setembro de 1984 pola que se outorga concesión administrativa a Rolando Vidal Dios para instalar un parque de cultivo de moluscos no distrito marítimo de Vilagarcía de Arousa, cunha ocupación de 1.552,2 m do dominio público (DOG nº 204, do 24 de outubro de 1984).