Mediante os decretos 179/1995, do 16 de xuño (DOG nº 125, do 30 de xuño) e 85/1997, do 10 de abril (DOG nº 7, do 24 de abril), o Consello da Xunta de Galicia acordou as afectacións secundarias de 4.000 m para heliporto e 750 m para depósito de útiles de pesca e marisqueo incautados e almacenamento do equipamento das embarcacións de vixilancia adscritos á Consellería de Pesca, Marisqueo e Acuicultura.

A antedita consellería solicituo unha modificación das superficies das parcelas obxecto de afectación secundaria co fin de amplia-la zona de seguridade do heliporto.

Logo da solicitude da Secretaría Xeral e do Patrimonio, con data 19 de decembro de 1997, o ente publico Portos de Galicia informou favorablemente a modificación solicitada pola Consellería de Pesca, Marisqueo e Acuicultura.

Á vista do establecido nos artigos 12 da Lei 3/1985, do 12 de abril, do patrimonio da Comunidade Autónoma de Galicia e 31 do Decreto 50/1989, do 9 de marzo, polo que se aproba o regulamento para a execución da antedita lei, as afectacións secundarias dos bens de dominio público requiren acordo do Consello da Xunta de Galicia baixo a forma de decreto, logo da instrucción do correspondente expediente pola Consellería de Economía e Facenda.

Na súa virtude, por proposta do conselleiro de Economía e Facenda e logo de deliberación do Consello da Xunta de Galicia, na súa reunión do día trinta de xaneiro de mil novecentos noventa e oito,

DISPOÑO:

Artigo 1º

Co obxecto de amplia-la zona de seguridade do heliporto situado no recinto do porto de Celeiro, termo municipal de Viveiro (Lugo), modifícanse as superficies das parcelas obxecto de afectación secundaria a favor da Consellería de Pesca, Marisqueo e Acuicultura que figuran nos artigos 1 e 3 do Decreto 85/1997, do 10 de abril (DOG nº 78, do 24 de abril).

No artigo 1 a superficie da parcela obxecto de afectación secundaria para heliporto amplíase a 5.137,5 m e no artigo 3 a superficie da parcela obxecto de afectación secundaria para depósito dos útiles de pesca e marisqueo incautados e do almacenamento do equipamento das embarcacións de vixilancia adscritos á antedita consellería amplíase a 1.180 m.

Artigo 2º

A Consellería de Economía e Facenda, a través da Secretaría Xeral e do Patrimonio, levará a cabo tódolos trámites necesarios para a efectividade do disposto no presente decreto.

Santiago de Compostela, trinta de xaneiro de mil novecentos noventa e oito.

Manuel Fraga Iribarne

Presidente

José Antonio Orza Fernández

Conselleiro de Economía e Facenda