A execución das obras do proxecto de gasoducto ramal da Coruña están declaradas de utilidade pública mediante a Lei 10/1987, do 15 de maio, de disposicións básicas para un desenvolvemento coordinado de actuacións en materia de combustibles gasosos.
A Consellería de Agricultura, Gandería e Política Agroalimentaria informou favorablemente a desafectación dunha franxa de terreo de 1.875 m de longo por 4 m de largo que forma parte do Centro de Investigacións Agrarias de Mabegondo, termo municipal de Abegondo (A Coruña) para efectos de constituír sobre esta unha servidume para a conducción do gasoducto ramal da Coruña.
O artigo 10.2º da Lei 3/1985, do 12 de abril, do patrimonio da Comunidade Autónoma de Galicia sinala que a desafectación dos bens de dominio público da Comunidade Autónoma debe facerse mediante acordo do Consello da Xunta de Galicia, logo da instrucción do expediente pola Consellería de Economía e Facenda, e por instancia da consellería interesada.
Na súa virtude por proposta do conselleiro de Economía e Facenda e logo de deliberación do Consello da Xunta de Galicia na súa reunión do día quince de xaneiro de mil novecentos noventa e oito,
DISPOÑO:
Artigo 1º
Desaféctase do dominio público unha franxa de 1.875 m de longo por 4 m de largo aproximadamente, segundo os planos incorporados no expediente, do predio do Centro de Investigacións Agrarias de Mabegondo sita no lugar de Mabegondo, termo municipal de Abegondo (A Coruña).
Artigo 2º
A franxa de terreo anteriormente descrita adquire natureza patrimonial.
Santiago de Compostela, quince de xaneiro de mil novecentos noventa e oito.
Manuel Fraga Iribarne
Presidente
José Antonio Orza Fernández
Conselleiro de Economía e Facenda
475