Creada a Secretaría Xeral para as Relacións cos Medios Informativos mediante Decreto 350/1997, do 10 de decembro, polo que se determinan os centros directivos dependentes da Presidencia da Xunta de Galicia, procede determina-la estructura orgánica e funcional desta secretaría xeral, atendendo ós principios de economía e eficacia.
Na súa virtude, por proposta do conselleiro da Presidencia e Administración Pública, logo do informe das consellerías da Presidencia e Administración Pública e de Economía e Facenda, no uso das atribucións conferidas pola Lei 1/1983, do 22 de febreiro e logo de deliberación do Consello da Xunta de Galicia na súa reunión do día oito de xaneiro de mil novecentos noventa e oito,
DISPOÑO:
Artigo 1º
1.1. A Secretaría Xeral para as Relacións cos Medios Informativos é o centro directivo encargado de executa-la política xeral da Xunta de Galicia en materia das relacións institucionais cos medios informativos e da publicidade e a imaxe institucional da Xunta de Galicia.
1.2. A Secretaría Xeral para as Relacións cos Medios Informativos dependerá funcionalmente da Presidencia da Xunta de Galicia e organicamente da Consellería da Presidencia e Administración Pública.
Artigo 2º
Correspóndelle á Secretaría Xeral para as Relacións cos Medios Informativos o exercicio das seguintes funcións:
a) As competencias da Xunta de Galicia en materia de relación cos medios informativos así como o exercicio das competencias ás que fan referencia os
números 2 e 3 do artigo 34, no relativo á prensa, e número 31 do artigo 27, no que se refire á publicidade, ámbolos dous do Estatuto de autonomía de Galicia.
b) As relacións cos medios informativos e a direccción e coordinación dos gabinetes de comunicación da Xunta de Galicia e da Presidencia desta.
c) O deseño e a realización da publicidade institucional da Xunta de Galicia.
d) A preparación da normativa referente ós medios informativos e á publicidade.
e) A tramitación de expedientes relativos a subvencións, bolsas e axudas ós medios de comunicación.
f) A execución do orzamento da Secretaría Xeral para as Relacións cos Medios Informativos.
g) A realización de estudios e, se é o caso, a súa coordinación sobre materias relativas a tódolos sectores da información.
h) Queda adscrita a esta secretaría a Comisión Coordinadora de Publicidade da Xunta de Galicia, creada polo Decreto 417/1990, do 31 de xullo.
Artigo 3º
A Secretaría Xeral para as Relacións cos Medios Informativos para o exercicio das súas funcións e competencias contará coas seguintes unidades administrativas:
1. Gabinete para as Relacións cos Medios Informativos:
O Gabinete para as Relacións cos Medios Informativos proverase por persoal eventual. As súas funcións serán as seguintes:
a) Tódalas derivadas da relación cos medios informativos en tódalas materias que afecten á Presidencia da Xunta de Galicia.
b) A coordinación da comunicación interdepartamental da Xunta de Galicia.
c) Xestionar e dirixi-las actividades que ten encomendadas o Club Internacional de Prensa de Galicia.
d) Deseñar e planifica-la política de imaxe e publicidade da Xunta de Galicia, dirixindo e coordinando as campañas institucionais.
2. Servicio de Coordinación Administrativa e Xestión Orzamentaria.
Exercerá as funcións de execución do orzamento da secretaría, réxime interior, xestión e tramitación dos expedientes relacionados coas competencias dela.
Disposicións derradeiras
Primeira.-Facúltase o conselleiro da Presidencia e Administración Pública para dicta-las normas complementarias para o desenvolvemento deste decreto.
Segunda.-Este decreto entrará en vigor o día seguinte ó da súa publicación no Diario Oficial de Galicia.
Santiago de Compostela, oito de xaneiro de mil novecentos noventa e oito.
Manuel Fraga Iribarne
Presidente
Dositeo Rodríguez Rodríguez
Conselleiro da Presidencia e Administración Pública