Portos de Galicia, convoca probas de selección para cubri-la seguinte praza de persoal laboral fixo.

1 Xefatura do Departamento de Xestión Xurídica e Administrativa.

1. Requisitos xerais.

a) Ter nacionalidade española e ter cumpridos os 18 anos de idade.

b) Estar en posesión dos requisitos esixidos e da titulación académica (homologada polo Ministerio de Educación, no caso de títulos expedidos por un país que non sexa membro da Unión Europea), ou da experiencia profesional que se require para a praza.

c) Posuí-la capacidade funcional física e psíquica para o desempeño das tarefas habituais de cada praza.

d) Non ter sido separado do servicio de ningunha Administración pública en virtude de expediente disciplinario, nin atoparse inhabilitado por sentencia firme para o exercicio de funcións públicas.

2. Requisitos específicos da praza.

Os requisitos mínimos esixidos que deberán acreditarse para a praza son:

-Título mínimo esixido: licenciatura en dereito.

-Curso de perfeccionamento en lingua galega.

-Experiencia mínima dun ano en funcións de dirección de departamento xurídico ou departamento legal.

Coñecementos necesarios para cubrir este posto:

Coñecementos sobre: regulación e ámbito normativo do ente público Portos de Galicia, dereito administrativo xeral (Constitución española e Administración do Estado, Estatuto de autonomía de Galicia e Administración autonómica, procedemento administrativo) especial (contratación, expropiación, dominio público, xurisdicción contencioso-administrativa) dereito orzamentario e tributario, dereito civil patrimonial, mercantil (sociedades, contratos, títulos valores, concursos e quebras) e laboral (relación laboral, contrato de traballo, negociación colectiva).

Valorarase:

Capacidade de integración en grupo de traballo, coñecementos sobre operacións societarias, formación e experiencia complementaria, informática en contorno Windows como usuario.

Tódolos requisitos xerais e específicos deberán posuírse no día do remate do prazo de presentación de solicitudes, e mantelos ata o asinamento do correspondente contrato.

3. Solicitudes.

Para tomar parte nas probas de selección deberase presentar solicitude de acordo co modelo de instancia que figura no anexo I achegará ademais a seguinte documentación:

3.1. Forma.

-Fotocopia do DNI.

-Fotografía tamaño carné.

-Documentación orixinal ou fotocopia compulsada que acredite os requisitos mínimos xerais e específicos.

-Documentación acreditativa dos méritos que se aleguen para a súa valoración, ben orixinal ou fotocopia compulsada. Acreditarase a experiencia con historial completo da Seguridade Social ou con certificado de empresa.

3.2. Lugar e prazo de presentación.

O prazo de presentación de solicitudes será de 10 días naturais, contados a partir do día seguinte

ó da publicación desta convocatoria no Diario Oficial de Galicia.

As solicitudes dirixidas ó presidente do ente público Portos de Galicia presentaranse no rexistro xeral do ente público, na Praza de Europa, 5A-6B, 15.707, Santiago de Compostela.

4. Procedemento de admisión e selección.

1. Esgotado o prazo de presentación de solicitudes, a comisión de selección, publicará as listas previas de admitidos e excluídos ó proceso de selección, coa motivación da exclusión, se é o caso, establecéndose un prazo de 5 días naturais para a petición do interesado emendar calquera erro que sexa emendable. Esgotado este prazo, publicaranse as listas definitivas de admitidos e excluídos ó proceso de selección, incluíndo lugar e data en que comezarán as probas, ás que deberán asisti-los candidatos provistos do DNI. Estas listas serán publicadas nos taboleiros de anuncios de Portos de Galicia.

2. As probas de selección consistirán nunha proba teórico práctica e entrevista persoal.

A) Proba teórico-práctica.

-Proba teórico-práctica: versará sobre os coñecementos e demais requisitos esixidos na convocatoria para cubrir este posto, a que haberá que superar para pasar á entrevista persoal.

A proba teórico-práctica poderá realizarse nunha ou dúas fases a criterio da comisión de selección; en calquera caso, soamente pasarán á entrevista persoal aqueles candidatos que superen a dita proba.

Unha vez corrixida a proba teórico-práctica, a Comisión de Selección publicará no taboleiro de anuncios de Portos de Galicia, a lista de aprobados e suspensos e incluirá o lugar e a data de realización das entrevistas persoais.

B) Entrevista persoal: valorándose os coñecementos do candidato, ademais da súa adecuación ó posto de traballo. Para tal efecto, a comisión poderá comentar co aspirante cuestións relacionadas co programa e coas funcións que vaia realizar.

C) Finalizado todo o proceso anterior, a comisión de selección publicará o nome das persoas seleccionadas no taboleiro de anuncios de Portos de Galicia, facendo consta-la data de ingreso, así como a documentación complementaria que deberán achegar para formaliza-lo contrato.

Santiago de Compostela, 29 de setembro de 1997.

Emilio García Gallego

Presidente de Portos de Galicia

97-7589