Portos de Galicia convoca probas de selección para cubri-las seguintes prazas de persoal laboral fixo.
A) 3 prazas de celador gardapeiraos.
B) 1 praza de administrativo.
1. Requisitos xerais.
a) Ter nacionalidade española e ter cumpridos os 18 anos de idade.
b) Estar en posesión dos requisitos esixidos e da titulación académica (homologada polo Ministerio de Educación, no caso de títulos expedidos por un país que non sexa membro da Unión Europea) que, de se-lo caso, se requira para cada praza.
c) Posui-la capacidade funcional, física e psíquica para o desempeño das tarefas habituais de cada praza.
d) Non ter sido separado do servicio de ningunha Administración pública en virtude de expediente disciplinario, nin atoparse inhabilitado por sentencia firme para o exercicio de funcións públicas.
2. Requisitos específicos de cada praza.
Os requisitos mínimos esixidos que deberán acreditarse para cada praza son:
A) Celador gardapeiraos.
-Requisitos mínimos que deberán acreditarse.
Título mínimo esixido: graduado escolar, FP1 ou equivalente.
-Outros coñecementos necesarios para cubrir este posto:
Coñecementos sobre ámbito normativo do Ente Público Portos de Galicia, planificación e xestión portuaria, xestión e facturación de ingresos portuarios, regulamento de servicio, policía e réxime dos portos.
-Valorarase:
Capacidade de relación e iniciativa, formación complementaria nos coñecementos sinalados, capacidade de integración en grupos de traballo, outras titulacións, informática en contorno Windows como usuario.
B) Administrativo.
-Requisitos mínimos que deberán acreditarse.
Título mínimo esixido: BUP, FP2 ou equivalente.
-Outros coñecementos necesarios para cubrir este posto:
Coñecementos sobre o ámbito normativo do Ente Público Portos de Galicia, procedemento administrativo común e procedementos administrativos especiais, contratación administrativa, expropiación forzosa, principios básicos da contabilidade e xestión económico-contable dos ingresos e dos gastos.
-Valorarase:
Formación complementaria nos coñecementos sinalados, capacidade de integración en grupo de traballo, outras titulacións, informática en contorno Windows como usuario.
Tódolos requisitos xerais e específicos, deberán posuírse no día da remate do prazo de presentación de solicitudes, e mantelos ata o asinamento do correspondente contrato.
3. Solicitudes.
Para tomar parte nas probas de selección deberase presentar solicitude de acordo co modelo de instancia que figura no anexo I xuntando ademais a seguinte documentación:
1. Forma.
-Fotocopia do DNI.
-Fotografía tamaño carné.
-Documentación orixinal ou fotocopia compulsada que acredite os requisitos mínimos xerais e específicos.
-Documentación acreditativa dos méritos que se aleguen para a súa valoración, ben orixinal ou fotocopia compulsada. Acreditaráse a experiencia con historial completo da Seguridade Social ou con certificado de empresa.
2. Lugar e prazo de presentación.
O prazo de presentación de solicitudes será de 10 días naturais, contados a partir do día seguinte ó da publicación desta convocatoria no Diario Oficial de Galicia.
As solicitudes dirixidas ó presidente do Ente Público Portos de Galicia presentaranse no rexistro xeral do ente público, na praza de Europa, 5A-6B, 15.707, Santiago de Compostela.
4. Procedemento de admisión e selección.
1. Esgotado o prazo de presentación de solicitudes, a comisión de selección, publicará as listas previas de admitidos e excluídos ó proceso de selección, coa motivación da exclusión, se é o caso, establecéndose un prazo de 5 días naturais, para, por petición do interesado emendar calquera erro que sexa emendable. Esgotado este prazo, publicaránse as listas definitivas de admitidos e excluídos ó proceso de selección, incluíndo lugar e data en que comezarán as probas, ás que deberán asisti-los candidatos provistos do DNI. Estas listas serán publicadas nos taboleiros de anuncios de Portos de Galicia.
2. As probas de selección consistirán nunha proba teórico-práctica e entrevista persoal.
A) Proba teórico-práctica.
-Proba teórico-práctica: versará sobre os coñecementos e demais requisitos esixidos na convocatoria para cubrir este posto, que haberá que superar para pasar á entrevista persoal.
A proba teórico-práctica poderá realizarse nunha ou dúas fases por criterio da comisión de selección; en calquera caso, soamente pasarán á entrevista persoal aqueles candidatos que superen a dita proba.
Unha vez corrixida a proba teórico-práctica, a comisión de selección publicará no taboleiro de anuncios de Portos de Galicia a lista de aprobados e suspensos, e incluirá o lugar e a data de realización das entrevistas persoais.
B) Entrevista persoal: valoraranse os coñecementos do candidato, ademais da súa adecuación ó posto de traballo. Para tal efecto, a comisión poderá comentar co aspirante, cuestións relacionadas co programa e coas funcións que hai que realizar.
C) Finalizado todo o proceso anterior, a comisión de selección publicará o nome das persoas seleccionadas no taboleiro de anuncios de Portos de Galicia, facendo consta-la data de ingreso, así como a documentación complementaria que deberán achegar para formaliza-lo contrato.
Santiago de Compostela, 25 de setembro de 1997.
Emilio García Gallego
Presidente de Portos de Galicia
7180