A Asociación Provincial de Talleres de Reparación de Vehículos de Ourense (Atave) solicitou, perante a Consellería de Industria e Comercio, a cesión do uso das instalacións da antiga estación de inspección técnica de vehículos de Ourense, co fin de impartir nelas cursos de formación.
A Consellería de Industria e Comercio informou favorablemente a cesión solicitada, o que comporta, segundo o disposto no artigo 24 do Decreto 50/1989, do 9 de marzo, polo que se aproba o Regulamento para a execución da Lei do patrimonio da Comunidade Autónoma de Galicia, a conformidade coa desafectación do dominio público do devandito inmoble, de acordo coa non utilización das anteditas instalacións e a previsión de non ser necesarias nun futuro próximo.
O artigo 10.1º da Lei 3/1985, do 12 de abril, do patrimonio da Comunidade Autónoma de Galicia sinala que cando os bens e dereitos non fosen nece
sarios para o cumprimento dos fins determinantes da súa afectación, cesará a súa natureza demanial e adquirirán a condición de patrimoniais, sen prexuízo, se é o caso, do dereito de reversión nos termos da lexislación de expropiación forzosa respecto daqueles bens adquiridos por este título.
O apartado segundo do antedito artigo establece que a desafectación dos bens de dominio público da Comunidade Autónoma de Galicia deberá facerse mediante acordo do Consello da Xunta de Galicia, logo da instrucción do expediente pola Consellería de Economía e Facenda, por instancia da Consellería interesada, e sempre que se acredite a desaparición das causas xustificativas da afectación.
Por todo isto, de conformidade coa proposta do conselleiro de Economía e Facenda e logo de deliberación do Consello da Xunta de Galicia na súa reunión do día cinco de xuño de mil novecentos noventa e sete,
DISPOÑO:
Artigo 1º
A desafectación do dominio público do ben inmoble que a continuación se describe:
«Parcela de terreo denominada Serra, en termos de Cumial, concello de Ourense, dunha extensión superficial de catro mil setecentos oitenta e cinco metros, con sesenta e cinco decímetros cadrados, que linda ó norte, co camiño veciñal de Ourense ó Cumial; ó sur, terreos de Gonzalo Arias Canelas; ó leste, terreos de Clementina Maseda e ó oeste, terreo de Ignacio Delgado. Sobre a dita parcela, edificouse unha nave de cincocentos cincuenta metros cadrados construídos nunha soa planta, composta de dous corpos: o principal que é completamente diáfano, sen divisións, e un anexo que ten unha menor altura, onde se sitúan as oficinas, os aseos e a sala de caldeiras.»
Artigo 2º
O inmoble anteriormente descrito adquire natureza patrimonial, sen prexuízo do cumprimento da recepción formal por parte da Consellería de Economía e Facenda dos bens desafectados, de conformidade co disposto no artigo 27 do Decreto 50/1989, do 9 de marzo, polo que se aproba o Regulamento para a execución da Lei 3/1985, do patrimonio da Comunidade Autónoma galega.
Santiago de Compostela, cinco de xuño de mil novecentos noventa e sete.
Manuel Fraga Iribarne
Presidente
José Antonio Orza Fernández
Conselleiro de Economía e Facenda
4673
