A Lei 13/1991, do 9 de decembro de taxas, prezos e exacións reguladoras da Comunidade Autónoma de Galicia e o Decreto lexislativo 1/1992, do 11 de abril, polo que se aprobou o texto articulado das bases contidas no capítulo III do título II da dita lei, recollían as taxas aplicables en concepto de inspeccións e controis sanitarios oficiais de carnes frescas, carnes de ave de curral e coellos.

A Lei 11/1996, do 30 de decembro, de presupostos xerais da Comunidade Autónoma de Galicia para 1997, no seu título IV sobre normas tributarias capítulo único sobre tributos propios, no seu artigo 30, de taxas, no punto dous, apartado 20, fai unha modificación da redacción do apartado 08 do artigo 23 Decreto lexislativo 1/1992. O apartado C da nova redacción, no que se fai referencia á liquidación e ingreso das taxas xeradas polas inspeccións e controis sanitarios oficiais de carnes frescas, carnes de aves de curral e coellos, inclúe a posibilidade de deduccións polos conceptos de persoal auxiliar veterinario e axudante e por gastos administrativos.

Na norma citada no parágrafo anterior establécese que, para a aplicación das ditas deduccións, se require o previo recoñecemento da Consellería de Sanidade e Servicios Sociais, que determinará os niveis aplicables.

A figura do persoal auxiliar veterinario e axudante que constitúe un dos tipos de deducción, coas carac

terísticas propias definidas nas normas sectoriais, non se dá na nosa comunidade, polo que no articulado da presente orde só se regula o relativo ó recoñecemento para o caso das deduccións aplicables por gastos administrativos suplidos.

En consecuencia, co fin de aplica-las ditas deduccións, en virtude das facultades que me confire o artigo 34.6º da Lei 1/1981, do 22 de febreiro, reguladora da Xunta e do seu presidente, reformada pola Lei 11/1988, do 20 de outubro,

DISPOÑO:

Artigo 1º

Os suxeitos pasivos das taxas por inspeccións e controis sanitarios oficiais, ante e pos-mortem dos animais sacrificados, selado de canais e cabezas, linguas e vísceras, destinadas ó consumo humano, é dicir, os titulares das explotacións de matadoiros ou lugares de sacrificio, cando pretendan aplicar, na liquidación das ditas taxas a deducción por gastos administrativos suplidos, prevista na letra C do artigo 23 do Decreto lexislativo 1/1992, do 11 de abril, na redacción dada ó mesmo na Lei 11/1996, do 30 de decembro, de presupostos xerais da Comunidade Autónoma de Galicia para 1997, no seu título IV sobre normas tributarias capítulo único sobre tributos propios no seu artigo 30, de taxas, no punto dous, apartado 20, deberán obter previamente do delegado provincial da Consellería de Sanidade e Servicios Sociais o correspondente recoñecemento.

Artigo 2º

O recoñecemento a que se fai referencia no artigo anterior seralles facilitado ós suxeitos pasivos que o soliciten cando estes acrediten a realización das seguintes actividades:

-Recompilación e supervisión de toda a documentación de orixe á entrada dos animais no matadoiro.

-Anotación desta no libro de rexistro de entrada.

-Traslado dos datos correspondentes para cubrir toda a documentación dos animais procedentes de campañas de saneamento gandeiro.

-Control dos certificados dos plans de desinfección, desparasitación e desinsectación.

-Traslado de tódolos datos para cubri-los libros de control de sacrificio.

-Traslado de tódolos datos para cubri-los documentos de liquidación de taxas.

-Envío de partes de sacrificio ós órganos de dirección.

-Traslado de tódolos datos para a emisión de certificados de exportación.

-Traslado de datos para a emisión de certificacións de sacrificio, comisos e doutras.

-Arquivos documentais.

Artigo 3º

Para a obtención do recoñecemento das deduccións que se regulan na presente orde, o interesado deberá formular solicitude á Delegación Provincial da Consellería de Sanidade e Servicios Sociais, quen poderá solicitar canta información considere oportuna para a acreditación da realización das actividades que se recollen no artigo anterior.

Artigo 4º

A delegación provincial da Consellería de Sanidade e Servicios Sociais correspondente, unha vez estudiada a solicitude e comprobados os seus termos, emitirá o acordo de recoñecemento.

No caso de que se emita o dito acordo de recoñecemento, o prazo de validez desta será dun ano, contado a partir da data que figure no acordo.

Antes de que finalice o dito prazo, os interesados deberán solicita-la renovación do recoñecemento, seguindo a sistemática establecida no artigo 3º desta orde.

Artigo 5º

Contra as resolucións dos delegados provinciais da Consellería poderase interpor recurso ordinario perante o conselleiro de Sanidade e Servicios Sociais de acordo cos prazos e requisitos establecidos na Lei 30/1992, do 26 de novembro, de réxime xurídico das administracións públicas e do procedemento administrativo común.

Disposición final

A presente orde entrará en vigor ó día seguinte da súa publicación no Diario Oficial de Galicia.

Santiago de Compostela, 4 de abril de 1997.

José María Hernández Cochón

Conselleiro de Sanidade e Servicios Sociais

6833