O Real decreto 2434/1982, do 24 de xullo, sobre traspaso de funcións e servicios do Estado á Comunidade Autónoma de Galicia en materia de cultura, especifica no seu anexo I.B.3.h que aquela asume as competencias de promoción e organización de actividades de animación sociocultural no ámbito artístico, artesanal, turístico e de aire libre, dirixidas ós sectores da xuventude, infancia, terceira idade e sectores marxinados.
Neste marco competencial, o ámbito cultural e artístico no que respecta á xuventude é compartido conxuntamente polas consellerías de Familia, Muller e Xuventude, que a través da Dirección Xeral de Xuventude desenvolve o programa Fomento da Actividade Xuvenil, que ten entre os seus obxectivos básicos promociona-la actividade cultural e artística entre a nosa xuventude, e a Consellería de Cultura e Comunicación Social, a través da súa Dirección Xeral de Promoción Cultural, que ten, entre outras funcións, a de colaborar no desenvolvemento do teatro, a danza, as artes líricas e a imaxe, así como a promoción das artes plásticas e populares, de acordo co Decreto 2/1994, do 13 de xaneiro, e o Decreto 256/1996, do 20 de xuño, polos que, respectivamente, se establece a estructura orgánica de cada unha das ditas consellerías.
Polo exposto, a Consellería de Familia, Muller e Xuventude, consciente da importancia que ten facilitar vías polas que poida manifestarse a actividade e inquedanza artística individual e colectiva da xuventude galega, e contando coa colaboración da Consellería de Cultura e Comunicación Social, dada a natureza das actividades que se van realizar, convoca unha serie de certames, concursos e mostras que abranguen un amplo abano de manifestacións de carácter artístico e artesanal e que constitúen o programa Certames e Mostras Xuventude 97.
Por todo isto,
DISPOÑO:
Artigo 1º
A Consellería de Familia, Muller e Xuventude convoca o VIII Certame Galego da Canción Xuventude 97, segundo as bases que se establecen no anexo I desta orde, onde se regulan os aspectos relativos á participación, condicións xerais que van rexer na respectiva convocatoria, inscricións, desenvolvemento, premios e xurado.
Artigo 2º
O certame obxecto da presente convocatoria desenvolverase a través das delegacións provinciais da Consellería de Familia, Muller e Xuventude coa colaboración das delegacións provinciais da Consellería de Cultura e Comunicación Social.
Artígo 3º
As actividades que impliquen o desenvolvemento deste certame serán custeadas con cargo á partida orzamentaria 14.03.355B.640.1 dos orzamentos xerais da Comunidade Autónoma de Galicia para 1997.
Disposicións derradeiras
Primera.-Facúltase o director xeral de Xuventude para dictar, no ámbito das súas competencias, as resolucións precisas para o desenvolvemento desta orde.
Segunda.-A presente orde entrará en vigor o día seguinte ó da súa publicación no Diario Oficial de Galicia.
Santiago de Compostela, 5 de febreiro de 1997.
Manuela López Besteiro
Conselleira de Familia, Muller e Xuventude
ANEXO I
VIII Certame Galego da Canción Xuventude 97
I. Participantes.
Poderán participar neste certame tódolos mozos galegos ou residentes en Galicia. Establécense as seguintes modalidades:
1. Solistas: xoves de ata 30 anos de idade.
2. Grupos: xoves de ata 30 anos de idade (podendo neste caso suepera-la idade, un de cada catro compoñentes).
Enténdense estas idades cumpridas no ano 1997.
II. Condicións xerais.
1. No caso de grupos, o número máximo de compoñentes sera de oito.
2. En ningún caso poderán intervir neste certame solistas ou grupos profesionais.
3. Cada solista ou grupo poderá presentar un máximo de 3 obras, cunha duración máxima de 4 minutos cada unha. Deberanse gravar por separado en cintas de casete, e é obrigatorio polo menos que unha delas sexa en galego.
4. A temática é libre.
5. Os solistas ou grupos poderán emprega-los instrumentos musicais que precisen, achegándoos eles mesmos, a excepción da batería que a achega a organización.
6. As cintas casete presentaranse cada unha nun sobre pechado, figurando no exterior o lema elixido polo grupo ou solista. Presentarase ademais outro sobre pechado, no exterior do cal figurará o lema, e no interior o boletín de inscrición que se indica
no anexo III, xunto cunha fotocopia do DNI por ámbolos dous lados ou da folla correspondente do libro de familia do/s participante/s, e unha declaración xurada conforme a persoa ou grupo participante non está desenvolvendo actividades profesionais ou remuneradas no campo da música.
7. A Dirección Xeral de Xuventude reserva para si o dereito de editar ou difundi-las obras musicais que sexan seleccionadas para a fase final.
III. Inscricións.
1. Os participantes deberán envia-lo impreso de solicitude que se indica no anexo II xunto cos sobres pechados referidos anteriormente ó Servicio de Xuventude da Delegación Provincial da Consellería de Familia, Muller e Xuventude da provincia na que residan habitualmente que pode ser :
r/ Ronda de Fingoi, s/n - 27002 Lugo
Avda. de La Habana, 81-baixo 32004 Ourense
r/ Durán Loriga, 9-1º 15003 A Coruña
r/ Mª Berdiales 20-entresollado 36203 Vigo e
r/ Benito Corbal 47-2º - 36001 Pontevedra
antes do 6 de xuño de 1997.
IV. Desenvolvemento.
O xurado seleccionará os autores e as obras que considere de máis calidade para actuar na fase final.
A fase final terá lugar na praza da Igrexa en Lalín (Pontevedra), no mes de xuño de 1997.
Pechará o certame un grupo invitado para a ocasión.
V. Premios.
Establécense os premios seguintes:
Modalidade solistas:
1º. premio: 50.000 ptas. e gravación, edición de compact-disc-single de 20 minutos de duración e mantemento durante os días da gravación.
2º. premio: 25.000 ptas.
Modalidade grupos:
1º. premio: 100.000 ptas. e gravación, edición de compact-disc-single de 20 minutos de duración e mantemento durante os días de gravación.
2º. premio: 75.000 ptas.
Accésits: existirán como máximo 3 por cada unha das modalidades, de:
Solistas: 20.000 ptas. cada un.
Grupos: 50.000 ptas. cada un.
Celebrarase un Festival de Música Xove (en lugar e data por determinar), no que se procederá á presentación dos compact-disc e no que actuarán os primeiros clasificados. Para o dito acto establécense as seguintes axudas:
Solistas: 25.000 ptas.
Grupos: 50.000 ptas.
A organización farase cargo dos gastos do equipo de son e luces, así como da cea convivencial do dito día.
Así mesmo, farase entrega a cada un dos participantes seleccionados para a final nas distintas modalidades dun diploma que acredite a súa participación neste Certame Galego da Canción.
VI. Xurado.
O xurado será nomeado polo director xeral de Xuventude e polo director xeral de Promoción Cultural, por proposta da Delegación Provincial da Consellería de Familia, Muller e Xuventude de Pontevedra, e estará composto por persoas cualificadas no campo da canción e da expresión musical. A secretaría recaerá nun funcionario da Delegación Provincial de Familia, Muller e Xuventude de Pontevedra.
O xurado estará facultado para a interpretación destas bases nas eventualidades non previstas, e poderá deixar deserto algún premio se así o considera oportuno.
A sua decisión será inapelable.
97-2435