No artigo 3 do Decreto 272/1986, do 31 de xullo, estableceuse en corenta mil pesetas por persoa e reunión o límite máximo das axudas de custo de asistencia e desprazamento que as caixas de aforros galegas poidan satisfacer ós membros dos seus órganos de goberno.
Posteriormente, e motivado polo tempo transcorrido, o Decreto 97/1991, do 20 de marzo, eleva este límite máximo a sesenta mil pesetas.
Debido ó tempo transcorrido desde esta acualización e a especial complexidade e responsabilidade que para os órganos de goberno supoñen as modificacións lexislativas introducidas pola Lei 4/1996, do 31 de maio, de caixas de aforros galegas, resulta necesario proceder novamente a actualiza-la devandita contía.
Na súa virtude, por proposta do conselleiro de Economía e Facenda, e logo da deliberación do Consello da Xunta de Galicia, na súa reunión do día vinte de febreiro de mil novecentos noventa e sete,
DISPOÑO:
Artigo único.
Increméntase a cen mil pesetas o límite máximo establecido no artigo 3º do Decreto 272/1986, do 31 de xullo, sobre axudas de custo por asistencia e desprazamento ós membros dos órganos de goberno das caixas de aforros galegas.
Santiago de Compostela, vinte de febreiro de mil novecentos noventa e sete.
Manuel Fraga Iribarne
Presidente
José Antonio Orza Fernández
Conselleiro de Economía e Facenda
97-1403