A Lei 11/1992, do 7 de outubro, de réxime financeiro e presupostario de Galicia, no seu artigo 20.5º, establece a posibilidade de que se poidan aprazar ou fracciona-las cantidades debidas á Facenda da Comunidade Autónoma nos casos e cos procedementos que regulamentariamente se establezan.
Polo tanto, e facendo uso das competencias conferidas polo artigo 7 da citada Lei 11/1992,
DISPOÑO:
Primeiro.-As débedas tributarias e demais de dereito público que teñan a súa xestión recadatoria atribuída ós órganos da Consellería de Economía e Facenda, poderán ser aprazadas ou fraccionadas polo director xeral de Tributos, delegados territoriais, xefes do Servicio de Recadación e xefes do Servicio de Xestión Tributaria, de acordo coas seguintes contías, natureza das débedas e tipos de garantía esixibles:
A) Director xeral de Tributos.
Correspóndelle a resolución das solicitudes de aprazamento e fraccionamento de pagamento cando, non estando expresamente atribuída a outros órganos,
a) A contía da débeda exceda de 50.000.000 de ptas.
b) Se solicite a dispensa total ou parcial de garantías.
B) Delegados territoriais.
Correspóndelles a resolución dos aprazamentos e fraccionamentos de pagamento cando, non estando expresamente atribuída a outros órganos, a débeda non exceda de 50.000.000 de ptas.
C) Xefes do Servicio de Recadación.
Correspóndelle-la resolución dos aprazamentos e fraccionamentos de pagamento cando a contía total da débeda pendente acumulada non exceda de 500.000 ptas. e lles sexa de aplicación a exención de garantías.
D) Xefes do Servicio de Xestión Tributaria.
Correspóndelle-la resolución de aprazamentos e fraccionamentos de pagamento solicitados que, ó abeiro do disposto na normativa reguladora dos impostos sobre sucesións e doazóns e transmisións patrimoniais e actos xurídicos documentados, se atribúen especificamente ós órganos competentes para a xestión e liquidación destes.
Segundo.-O director xeral de Tributos poderá avoca-la competencia para acorda-lo aprazamento ou fraccionamento de pagamento en expedientes nos
que a súa especial transcendencia o aconselle e que a súa xestión lle corresponda ós órganos de recadación.
Terceiro.-As solicitudes de aprazamento e fraccionamento de pagamento, con independencia do órgano competente para a súa resolución, presentaranse perante o Servicio de Recadación da delegación territorial da que proceda o acto que orixina a débeda.
Disposición transitoria
Os procedementos de resolución de solicitudes de aprazamento e fraccionamento iniciados con anterioridade á entrada en vigor desta orde tramitaranse conforme o disposto nela.
Disposición derrogatoria
Queda derrogada a Resolución do 17 de maio de 1988, da Dirección Xeral de Presupostos e do Tesouro, sobre aprazamentos e fraccionamentos de pagamento de débedas tributarias.
Disposición derradeira
Esta orde entrará en vigor o día seguinte ó da súa publicación no Diario Oficial de Galicia.
Santiago de Compostela, 5 de febreiro de 1997.
José Antonio Orza Fernández
Conselleiro de Economía e Facenda
705