A disposición adicional sétima da Lei 11/1995, do 30 de decembro, de presupostos xerais da Comunidade Autónoma de Galicia para 1996, no seu apartado tres establece que o Consello da Xunta de Galicia, na forma prevista na Lei 3/1985, do 12 de abril, poderá desafectar e cedérlle-lo uso dos bens inmobles das extintas cámaras agrarias ós concellos, organizacións profesionais agrarias ou outras entidades públicas ou privadas sen fin de lucro, sempre que quede garantida a conservación e aplicación deles para os fins e servicios de interese xeral agrario.

Os concellos de Abegondo, Barro, Bergondo, Camariñas, Láncara, Porto do Son, Rodeiro, Silleda, Sobrado, Touro, Valga e Zas solicitaron a cesión de uso dos inmobles sitos nos seus respectivos termos municipais e que pertenceron ás extintas cámaras agrarias locais.

Mediante Decreto 328/1996, do 26 de xullo (DOG nº 157, do 12 de agosto), desafectáronse do dominio público, entre outros, varios inmobles que integraban o patrimonio das extintas cámaras agrarias locais de Abegondo, Barro, Bergondo, Camariñas, Láncara, Porto do Son, Rodeiro, Silleda, Sobrado, Touro, Valga e Zas.

Polas ordes da Consellería de Economía e Facenda do 31 de outubro e do 25 de novembro de 1996 (DOG nº 234, do 29 de novembro e nº 243, do 13 de decembro) declarouse a alienabilidade dos anteditos inmobles.

A Secretaría Xeral e do Patrimonio, dependente da antedita consellería, tramitou o expediente de cesión do uso de acordo co previsto nos artigos 83 e seguintes do regulamento que desenvolve a Lei 3/1985, do 12 de abril, do patrimonio da Comunidade Autónoma de Galicia.

Na súa virtude, de conformidade coa proposta da Consellería de Economía e Facenda e logo de deliberación do Consello da Xunta de Galicia, na súa reunión do día vinte de decembro de mil novecentos noventa e seis,

DISPOÑO:

Artigo 1º

Acórdanse as cesións a título gratuíto que a continuación se relacionan:

1) A favor do Concello de Abegondo, do dereito de uso do edificio sito no lugar de San Marcos, termo municipal de Abegondo (A Coruña), composto de planta baixa e un piso alto, distribuído en arquivo, secretaría, sala de xuntas e oficinas, dunha superficie construída aproximada de setenta e dous metros cadrados por planta, rodeado por tódolos seus ventos por terreo destinado a labradío de tres áreas, trinta e nove centiáreas. Forma todo un só predio da superficie de catro áreas dezanove centiáreas e linda ó norte, máis de Manuel Barros Otero; ó sur, inculto propiedade do Concello de Abegondo; ó leste, a estrada de Herves a Fontán e ó oeste, camiño público de San Marcos a Peneda.

O dito ben inmoble atópase inscrito no Rexistro da Propiedade de Betanzos, no tomo 1.457 xeral, libro 191 de Abegondo, folio 72, predio nº 11.798, inscrición 4ª.

2) A favor do Concello de Barro, do dereito de uso do predio urbano sito no lugar de Santo Antoniño, parroquia de Perdecanai, termo municipal de Barro (Pontevedra), composto de planta baixa e un piso alto, dunha superficie aproximada de oitenta metros cadrados por planta. Linda a fronte, estrada xeral de Vigo á Coruña; á dereita, entrando no predio, terreos de Antonia Campos Ferreiro; á esquerda,terreos baldíos do Concello de Barro e ó fondo, campo ou carballeira de Santo Antoniño, propiedade do Concello de Barro.

O dito inmoble atópase inscrito no Rexistro da Propiedade de Caldas de Reis, no tomo 535, libro 44 de Barro, folio 249, predio nº 6481, inscrición 2ª.

3) A favor do Concello de Bergondo, do dereito de uso da casa sinalada co número dez do lugar de Sobre da Igrexa, parroquia de Guísamo, termo municipal de Bergondo (A Coruña), composta de planta baixa, dividida en varios compartimentos destinados a oficinas, que ocupa unha superficie de 180 m. Rodéaa por tódolos seus ventos un terreo destinado a labradío de 3 áreas 77 centiáreas, formando todo un só predio de 5 áreas, 57 centiáreas, que linda: ó norte, herdeiros de Carmen Galán; ó sur, predio que se reserva Manuel Fafián Babío; ó leste, estrada de Guísamo á Ponte do Pedrido; e ó oeste, termina en punta por ser triangular.

O dito ben inmoble atópase inscrito no Rexistro da Propiedade de Betanzos no tomo 1.474, libro 192 de Bergondo, folio 33, predio nº 11.307, inscrición 4ª.

4) A favor do Concello de Camariñas, do dereito de uso do predio rústico, labradío, ó sitio dos Ventos, de dúas áreas e setenta e nove centiáreas no Allo, parroquia de Ponte do Porto, Concello de Camariñas (A Coruña), que linda ó norte, Manuel Allones Cibrán; ó sur, Manuela Suárez Álvarez; ó leste e oeste, estrada de Vimianzo a Camariñas, sobre a que se atopa construída unha casa, composta de planta e piso alto, de oitenta metros cadrados. Ten a súa fronte ó oeste. A planta baixa destínase a almacén. A planta alta destínase a oficinas. Linda por tódalas súas partes co predio na que se atopa localizada.

O dito ben inmoble atópase inscrito no Rexistro da Propiedade de Corcubión no folio 182 do tomo 530, libro 47 do Concello de Camariñas, predio nº 5.663, inscrición 2ª.

5) A favor do Concello de Láncara, do dereito de uso do edificio sito na parroquia de San Vicente de Carracedo, termo municipal de Láncara (Lugo), composto de planta baixa onde está o portal e as escaleiras que comunican coa planta alta e o resto destinado a almacén, cunha superficie útil de 94 m e 29 dm e planta baixa cunha superficie útil de 92 m e 45 dm, destinada a oficinas, despacho, salas de xuntas, arquivo e servicios, ocupando a superficie do soar sobre o que está construído, que linda: ó norte, con resto do predio matriz; ó sur, con outra parcela denominada Candedo; ó leste, co resto do predio matriz; e ó oeste, con Ángel Rivera.

O dito inmoble atópase inscrito no Rexistro da Propiedade de Sarria, no tomo 341, libro 57, folio 176, predio nº 5.360, inscrición 2ª.

6) A favor do Concello de Porto do Son, do dereito de uso do soar sito no Campo da Feira, da vila de Porto do Son (A Coruña) cunha superficie de 104,50 m que linda ó norte, con herdeiros de Rosa Vinagre Ares; ó sur, herdeiros de Manuel Tomé Tomé; ó leste, rúa sen nome e ó oeste, Campo da Feira, nº 13 do inventario de propios do Concello de Porto do Son. Sobre o dito predio construíuse, ocupando a súa total superficie, un edificio composto de planta baixa, dedicada a almacén celeiro e un piso destinado a oficinas dela, da situación e lindeiros antes expresados, coa súa fronte ó oeste, por onde está sinalada co número 9; e ten outra entrada para planta baixa polo lindeiro leste, por onde está sinalada co número 3, se ben, accédese tamén ó baixo pola fronte ou entrada principal.

O dito ben inmoble atópase inscrito no Rexistro da Propiedade de Noia no tomo 889, libro 121 de Porto do Son, folio 194, predio nº 6.034 duplicado, inscrición 4ª.

7) A favor do Concello de Rodeiro, do dereito de uso do edificio sito na vila de Rodeiro, composto de planta baixa e dous pisos altos con destino á sede social da Cámara Agraria de Rodeiro que ocupa unha superficie duns 159 m. Da súa fronte á estrada que conduce ó cuartel e linda: fronte ou sur, estrada ó cuartel; dereita entrando, terreo sobrante de edificación; esquerda, soar nº 10 e en parte nº 9 de propiedade do Concello de Rodeiro.

O dito inmoble atópase inscrito no Rexistro da propiedade de Lalín no tomo 603, libro 91 de Rodeiro, folio 9, predio 10.399, inscrición 4ª.

8) A favor do concello de Silleda, do dereito de uso do edificio sito na Vila de Silleda, rúa Pontevedra, nº 6 mide 250 m, que ten o seu acceso directamente desde a rúa da súa situación. Componse de planta baixa, destinada a oficinas e a almacén ou celeiro e dunha planta alta, destinada tamén a oficinas da Cámara Agraria, linda: fronte; coa rúa da súa situación; dereita entrando, herdeiros de Ramón Campa; esquerda e fondo, terreo non edificado.

O dito inmoble atópase inscrito no Rexistro da Propiedade de Lalín no tomo 494, libro 111 de Silleda, folio 237, predio 15.328.

9) A favor do Concello de Sobrado, do dereito de uso dos terreos denominados Santiago do Campo, sito no termo municipal de Sobrado, dunha superficie aproximada de noventa e unha áreas. Linda ó norte, parcela segregada e camiño de Vilanova; ó sur, estrada de Teixeiro a Corredoiras; ó leste e ó oeste, parcela segregada e Cámara Agraria Local de Sobrado e Granxa do Mosteiro de Sobrado, da parte destinada a monte baixo e titulada Santiago do Campo, sita no termo municipal de Sobrado, dunha superficie aproximada de trescentos sesenta e dous metros e corenta decímetros cadrados que linda ó norte, camiño de Vilanova; ó sur e ó oeste, resto do predio do que se segrega.

Os ditos inmobles atópanse inscritos no Rexistro da propiedade de Arzúa no tomo 549, libro 39 de Sobrado, folio 87, predio nº 870, inscrición 3ª e no tomo 549, libro 39 de Sobrado, folio 88, predio nº 871, inscrición 2ª, respectivamente.

10) A favor do Concello de Touro, do dereito de uso do predio sito na parroquia de Loxo, no Concello de Touro (A Coruña), dunha superficie de 279 m. Linda ó norte, labradío de Andrés Ciñeira García; ó sur, coa estrada de Boimorto a Muros; ó leste, monte de José Barreiro Santos, Andrés Iglesias Millán e Andrés Ciñeira García; ó oeste, labradío de Andrés Ciñeira García. Sobre este soar construíuse un edificio de 86 m de planta baixa.

O dito ben inmoble atópase inscrito no Rexistro da Propiedade de Arzúa no tomo 556, libro 83 de Touro, folio 74, predio nº 6.146, inscrición 4ª.

11) A favor do Concello de Valga, do dereito de uso do predio denominado Montiño, sito no lugar

de Ponte Valga, parroquia e termo municipal de Valga (Pontevedra), cunha superficie de 105 m, que linda ó norte, estrada; ó sur, camiño vello; ó leste, Luisa Gil Castiñeiras e ó oeste, José Trasande Jamardo. Sobre o dito predio construíuse unha casa composta de planta e soto. A planta mide 87 m e o soto, 42 m; linda á fronte, entrando, estrada de Valga a Raxoi; á dereita, máis terreo da propia cámara; á esquerda, centro de inseminación artificial propiedade do concello de Valga e ó fondo, camiño veciñal.

O dito inmoble atópase inscrito no Rexistro da Propiedade de Caldas de Reis no tomo 611, libro 83 de Valga, folio 163, predio nº 6.046, inscrición 4ª.

12) A favor do Concello de Zas, do dereito de uso do predio Campos, a inculto, de cento oitenta e oito metros cadrados, sita en termos da parroquia e termo municipal de Zas (A Coruña), que linda ó norte e ó leste coa estrada de Santiago a Camariñas; ó sur, camiño de servicio e parcela segregada; e ó oeste, camiño público e parcela segregada. Sobre a dita parcela atópase construído un edificio, composto de semisoto, baixo e piso, sito en termos da parroquia de Zas, que ocupa unha superficie de cento sesenta metros cadrados. Destínase o soto a almacén-celeiro, cunha superficie útil de cento vintetrés metros cadrados, a planta baixa consta de seis locais para oficina, un aseo e un vestíbulo, e o piso alto componse de sala de estar, despacho, aseo e salón de actos. Linda por tódolos seus ventos co predio en que se atopa enclavado.

O dito ben inmoble atópase inscrito no Rexistro da Propiedade de Corcubión no tomo 369, libro 47 do Concello de Zas, folio 160, predio nº 4.826, inscrición 4ª.

Artigo 2º

As cesións de uso relacionadas no artigo anterior quedan sometidas ás seguintes cláusulas:

a) O fin da cesión será a dedicación do inmoble a fins e servicios de interese xeral agrario. .

b) A cesión do uso outórgase por un período de dez anos, contados desde o outorgamento da correspondente escritura pública, prorrogable por períodos sucesivos da mesma duración, se así o acordase expresamente o Consello da Xunta de Galicia, por proposta da Consellería de Economía e Facenda, logo da petición do cesionario en anterioridade ó vencemento do período anterior; queda excluída a tácita reconducción..

c) Se o dereito cedido non se aplicase ó fin sinalado dentro do prazo de dous anos, contado desde o outorgamento da escritura pública, deixase de estalo con posterioridade, ou se incumprisen calquera das outras cláusulas, considerarase resolta a cesión e o dereito reverterá á Administración da Comunidade Autónoma de Galicia, de conformidade co disposto no artigo 87 do regulamento da Lei

3/1985, do 12 de abril, do patrimonio da Comunidade Autónoma galega.

d) Serán de conta do cesionario:

-Os gastos de conservación e mantemento do inmoble do que se cede o uso.

-Os gastos polos servicios con que conte o inmoble que se individualicen mediante aparellos contadores.

-As cotas dos tributos que poidan grava-lo inmoble.

e) As obras de adaptación, reparación e mellora do inmoble, que serán por conta da entidade cesionaria, requirirán a presentación do proxecto e a súa aprobación pola Secretaría Xeral e do Patrimonio da Consellería de Economía e Facenda. En todo caso, as expensas investidas quedarán en beneficio do inmoble e, en ningún caso, poderán ser reembolsados pola Comunidade Autónoma de Galicia, propietaria do inmoble.

f) O cesionario subscribirá unha póliza, da que será beneficiaria a Comunidade Autónoma de Galicia, que cubra os danos do inmoble do que se cede o uso, así como a responsabilidade civil por posibles danos a terceiros.

Artigo 3º

As devanditas cesións de uso formalizaranse mediante escritura pública subscrita pola Secretaría Xeral e do Patrimonio ou funcionario en quen delegue; deberá constar nela o acordo de cesión e a aceptación do cesionario.

Disposición derradeira

A Consellería de Economía e Facenda, a través da Secretaría Xeral e do Patrimonio, realizará os trámites necesarios para a efectividade de canto se dispón no presente decreto.

Santiago de Compostela, vinte de decembro de mil novecentos noventa e seis.

Manuel Fraga Iribarne

Presidente

José Antonio Orza Fernández

Conselleiro de Economía e Facenda

9645