Visto o texto do convenio colectivo de ámbito da Comunidade Autónoma da empresa Hijos de Ignacio Tabarés, S.L., que se subscribiu coa data do 6 de setembro de 1996, entre a representación da empresa e dos traballadores, e de conformidade co disposto no artigo 90.2º e 3º do Real decreto lexislativo 1/1995, do 24 de marzo, polo que se aproba o texto refundido da Lei do Estatuto dos traballadores, e no Real decreto 1040/1981, do 22 de maio, sobre rexistro e depósito de convenios colectivos de traballo, esta dirección xeral,
ACORDA:
Primeiro.-Ordena-la inscrición do devandito convenio colectivo no rexistro xeral de convenios desta dirección xeral.
Segundo.-Remiti-lo texto orixinal ó correspondente servicio deste centro directivo.
Terceiro.-Dispoñe-la súa publicación no Diario Oficial de Galicia.
Santiago de Compostela, 29 de outubro de 1996.
Juan Pedrosa Vicente
Director xeral de Relacións Laborais
Convenio colectivo da empresa Hijos de Ignacio Tabarés, S.L.
Artigo 1º.-Partes contratantes.
Subscriben o presente convenio a totalidade dos representantes de persoal e a patronal da compañía Hijos de Ignacio Tabarés, S.L., ámbalas dúas con lexitimidade suficiente para a súa sinatura nos termos do artigo 87 do Estatuto dos traballadores.
Artigo 2º.-Ámbito de aplicación.
Nos seus aspectos territorial, funcional e persoal, o presente convenio afectará á empresa Hijos de Ignacio Tabarés, S.L., e así mesmo ás relacións laborais entre a empresa e os traballadores que nela presten os seus servicios, en calquera dos seus centros de traballo.
Artigo 3º.-Vixencia.
O presente convenio entra en vigor o día 1 de setembro de 1996 con independencia da data do seu rexistro ou publicación no BOP.
Artigo 4º.-Duración.
O presente convenio terá unha duración ata o 31 de decembro de 1997. Prorrogarase automaticamente por un período dun ano se non se denuncia por algunha das partes cunha antelación de polo menos sesenta días á data do seu vencemento.
Artigo 5º.-Compensación e absorción.
As condicións que establece o presente convenio son compensables e absorbibles en cómputo anual conforme a lexislación vixente, respectándose en todo caso as situacións persoais que a xeito de complementos varios viñeran percibindo os traballadores á entrada en vigor do presente convenio, conxelándose a súa contía e concepto e consolidándose na estructura do salario.
Artigo 6º.-Xornada laboral.
Será de corenta horas semanais distribuídas de luns a sábado.
Artigo 7º.-Vacacións.
O persoal afectado polo presente convenio desfrutará un período de vacacións de trinta días naturais. O período de desfrute fixarase de común acordo entre a empresa e os traballadores, conforme dispón a lexislación vixente. Como consecuencia da actividade productiva da empresa, queda establecido que en ningún caso os traballadores poderán desfruta-las vacacións nos meses de xullo, agosto e decembro.
Artigo 8º.-Condicións económicas.
Os salarios do presente convenio son os establecidos na táboa salarial anexa.
Artigo 9º.-Antigüidade.
O persoal abranguido no presente convenio percibirá aumentos periódicos por anos de servicio consistentes no aboamento de cuadrienios na contía de 5% do salario base correspondente á categoría na que estea clasificado.
Artigo 10º.-Gratificacións extraordinarias.
Todo o persoal afectado polo presente convenio percibirá tres pagas extraordinarias consistentes nunha mensualidade de salario base e maila antigüidade. As ditas pagas serán aboadas:
a) Paga de verán. Dentro da segunda quincena de xullo.
b) Paga de Nadal. Dentro dos primeiros vintedous días de decembro.
c) Paga de beneficios. Dentro da segunda quincena de marzo.
Artigo 11º.-Plus de transporte.
Tódolos traballadores recibirán un plus de transporte de 7.800 pesetas mensuais aplicándose a dita cantidade por doce mensualidades.
Artigo 12º.-Período de proba.
Establécese un período de proba para tódolos traballadores contratados durante a vixencia do presente convenio, que será o seguinte:
-Grupos de tarifa 1 e 2: 6 meses.
-Grupos de tarifa 3 a 8: 3 meses.
-Grupos de tarifa 8 e seguintes: 15 días laborables.
Artigo 13º.-Mobilidade funcional.
A mobilidade funcional no seo da empresa non terá outras limitacións cás esixidas polas titulacións académicas ou profesionais precisas para exerce-la prestación laboral e pola pertenza ó grupo profesional.
Para estes efectos entenderanse como grupos profesionais asimilados os 6, 7 e 8.
Artigo 14º.-Mobilidade xeográfica.
Desprazamento: a empresa poderá desprazar a outros centros de traballo distintos a aquel no que presten os seus servicios durante calquera prazo de tempo, fundamentando o citado desprazamento en razóns técnicas, organizativas, de producción ou ben por contratacións referidas á actividade empresarial.
Traslado: enténdese por traslado o desprazamento a outro centro de traballo que implique un cambio de domicilio. Enténdese que un desprazamento implica cambio de domicilio cando o centro de traballo do novo destino diste máis de sesenta quilómetros do seu centro actual ou do seu domicilio actual.
Artigo 15º.-Contratos de duración determinada.
(Regulados polo artigo 15.1º b) do Estatuto dos traballadores).
De conformidade co establecido no artigo 15.1º b) do Estatuto dos traballadores, debido ás circunstancias do mercado ás que se refire o citado precepto, ámbalas partes acordan que poderán asinarse este tipo de contratos cunha duración mínima de seis meses e máxima de trinta e seis meses. O seu réxime xurídico será equivalente ó do contrato por tempo indefinido no que respecta a goce de beneficios salariais, complementos, etc.
O presente contrato sométese a un réxime específico de extinción con esixencia de preaviso escrito con 15 días polo menos de antelación e sen ningunha indemnización ó rematar cada unha das prórrogas. No suposto de non producirse a extinción ó remate do tempo máximo de duración dos 36 meses, se o traballador seguise prestando servicios na empresa o contrato transformarase en indefinido.
Artigo 16º.-Comisión paritaria.
Establécese unha comisión paritaria para a interpretación, vixilancia e cumprimento do pactado no convenio formada por tres membros, un da parte empresarial e dous dos traballadores.
Artigo 17º.-Disposicións transitorias.
No non previsto no presente convenio observarase o que dispoña a lexislación vixente.
Artigo 18º.-Disposición derradeira.
Acórdase que a comisión paritaria a que alude o artigo 15º quede formada por José Antonio Novoa Álvarez pola empresa e polos traballadores, Fernando Rodríguez Pérez e Manuel Santeiro Torres.
ANEXO
Táboa salarial
Categoría profesional Salario base mensual
-Grupo 1 Director xerente 103.000 ptas.
-Grupo 2 Xefe de administración 96.400 ptas. Xefe de compras 96.400 ptas. Xefe de vendas 96.400 ptas. Supervisor 96.400 ptas.
-Grupo 3 Xefe de almacén 84.600 ptas. Encargado de establecemento 84.600 ptas.
-Grupo 4 Viaxante 80.600 ptas. Oficial administrativo 80.600 ptas. Analista 80.600 ptas.
-Grupo 5 Chofer 78.000 ptas.
-Grupo 6 Auxiliar administrativo 74.000 ptas. Auxiliar ordenador 74.000 ptas. Auxiliar contabilidade 74.000 ptas. Mozo especialista 74.000 ptas.
-Grupo 7 Dependente 74.000 ptas. Mozo supermercado 74.000 ptas. Auxiliar caixa-repoñedor 74.000 ptas. Auxiliar caixa-dependente 74.000 ptas. Mozo auxiliar chofer 74.000 ptas.
-Grupo 8 Telefonista 71.400 ptas. Mozo reparto 71.400 ptas. Mozo repoñedor 71.400 ptas. Persoal de limpeza 71.400 ptas.
8896