Por Orde do 5 de abril de 1989 recoñécese a denominación «Producto Galego de Calidade para a Pataca de Galicia».
A actual evolución da producción de pataca na área xeográfica da mencionada denominación, o grao de organización acadado polo sector nas zonas de Bergantiños, Vilalba e A Limia, xunto coa mellora na presentación e comercialización dun producto tan tradicional e básico na economía de Galicia, fan aconsellable un empuxe adicional que conduza á apertura de novas vías de comercialización e a asegurar unha presencia nos mercados nacionais cada vez maior, para a «Pataca de Galicia» con indicativo de calidade.
En consecuencia, por petición do sector interesado, e de conformidade co artigo 30.1º 3º e 4º do Estatuto de autonomía de Galicia, e en uso das competencias que me confire a Lei 1/1983, do 22 de febreiro, reguladora da Xunta de Galicia e do seu presidente,
DISPOÑO:
Artigo 1º
Recoñécese a denominación específica «Pataca de Galicia», para as patacas de consumo producidas e envasadas na Comunidade Autónoma de Galicia na maneira e condicións que determine o seu regulamento particular.
Artigo 2º
Noméase un consello regulador, con carácter provisional, que, por proposta dos sectores interesados queda formado polos membros seguintes:
* Presidente: Julio Gómez Fernández.
* Vocais:
-Polo sector productor:
Luciano Pereira Pombo.
Ramón Pérez Vérez.
Ramiro Geada Otero.
Ángel González Domínguez.
Miguel Fernández Grande.
Manuel Cid Quintas.
-Polo sector envasador:
Manuel Prado Airas.
Fidel Javier Gil Puente.
Manuel Fernández Braña.
José Luís Conde Bugueiros.
José Enríquez Rodríguez.
José Domingo Rivero Salgado.
Artigo 3º
Encoméndaselle ó consello regulador provisional a redacción do regulamento particular da denominación específica «Pataca de Galicia», que elevará á Consellería de Agricultura, Gandería e Montes para a súa aprobación.
Artigo 4º
O consello regulador provisional elaborará os censos de productores e de envasadores de pataca que se atopen interesados en adscribirse a esta denominación, integrando pola súa vez nos novos rexistros ós inscritos ata a actualidade na denominación «Producto Galego de Calidade Pataca de Galicia».
Artigo 5º
A indicación «Denominación Específica Pataca de Galicia» non poderá ser mencionada nas etiquetas, documentación e publicidade destas patacas de consumo ata que o seu regulamento sexa aprobado pola Consellería de Agricultura, Gandería e Montes.
Disposición transitoria
Única.-Durante a fase provisional de funcionamento da denominación específica «Pataca de Galicia», os inscritos nos rexistros do Producto Galego de Calidade Pataca de Galicia poderán seguir utilizando os nomes e símbolos da mencionada denominación nas condicións que sinala o seu regulamento. A súa ordenación substantiva adecuarase ás obrigas das ordes do 5 de abril de 1989, e do 19 de setembro de 1989, da Consellería de Agricultura, Gandería e Montes mentres non sexan substituídas definitivamente, unha vez que se elabore e aprobe o Regulamento da denominación específica «Pataca de Galicia».
Disposición derrogatoria
Única.-Quedan derrogadas cantas normas de igual ou inferior rango se opoñan á presente orde.
Disposicións derradeiras
Primeira.-A presente orde entrará en vigor o día seguinte ó da súa publicación no Diario Oficial de Galicia.
Segunda.-Facúltase o director xeral de Producción Agropecuaria e Industrias Agroalimentarias para dicta-las normas precisas para o desenvolvemento do establecido na presente orde.
Santiago de Compostela, 19 de setembro de 1996.
Tomás Pérez Vidal
Conselleiro de Agricultura, Gandería e Montes
1926