A Lei orgánica 16/1995, do 27 de decembro, transferiu, de acordo co previsto no artigo 150.2º da Constitución, diversas competencias de titularidade estatal á Comunidade Autónoma galega, coa finalidade de que esta complete as competencias que pode exercer, equiparándoa a outas comunidades autónomas.
En aplicación do previsto no artigo 8 da citada lei orgánica, por medio do Real decreto 1642/1996, do 5 de xullo, traspasáronselle a Comunidade Autónoma de Galicia as funcións e servicios da Administración xeral do Estado en materia de mutualidades de previsión social non integradas na Seguridade Social.
Resulta, pois, conveniente asumir de forma expresa tales funcións e servicios, que se relacionan no antedito real decreto, nos termos e condicións acordados pola Comisión Mixta de Transferencias prevista na disposición transitoria cuarta do Estatuto de autonomía para Galicia, e asignárllelos ós órganos correspondentes da Comunidade Autónoma de Galicia.
En virtude do exposto, e en exercicio da potestade de autoorganización prevista no artigo 27.2º do Estatuto de autonomía, por proposta do conselleiro da Presidencia e Administración Pública, logo de deliberación do Consello da Xunta de Galicia na
súa reunión do día trece de setembro de mil novecentos noventa e seis,
DISPOÑO
Artigo 1º.-Asúmense as funcións e servicios traspasados á Comunidade Autónoma de Galicia en virtude do Real decreto 1642/1996, do 5 de xullo, en materia de mutualidades de previsión social non integradas na Seguridade Social, así como os medios orzamentarios a eles adscritos, nos termos e condicións sinalados no acordo adoptado pola Comisión Mixta de Transferencias na súa reunión do 25 de xuño de 1996, publicado como anexo do citado real decreto.
Artigo 2º.-As funcións e servicios asumidos de conformidade co disposto no artigo anterior, así como os créditos orzamentarios a eles adscritos, asígnanse á Consellería de Economía e Facenda.
Disposicións derradeiras
Primeira.-O conselleiro de Economía e Facenda dictará as disposicións que sexan necesarias para o desenvolvemento e execución do presente decreto.
Segunda.-Este decreto entrará en vigor o mesmo día da súa publicación no Diario Oficial de Galicia.
Santiago de Compostela, trece de setembro de mil novecentos noventa e seis.
Manuel Fraga Iribarne
Presidente
Dositeo Rodríguez Rodríguez
Conselleiro da Presidencia e Administración Pública
6564
