O artigo 39.5º da Lei orgánica 1/1990, do 3 de outubro, de ordenación xeral do sistema educativo, establece que poderán cursarse en escolas específicas estudios de música ou de danza. Así mesmo, a Orde do 11 de marzo de 1993 (DOG do 22 de abril de 1993) regula as condicións de creación e funcionamento destas escolas na Comunidade Autónoma de Galicia.
Pola súa parte o Decreto 232/1994, do 14 de xullo, no seu artigo 1, establece que lle corresponde á Consellería de Educación e Ordenación Universitaria as competencias de planificación, regulación e administración do ensino en toda a súa extensión.
Presentada unha solicitude de inclusión no rexistro de escolas de música e danza, por Manuel Suárez Luaces, dunha escola de música, os servicios competentes da Consellería de Educación e Ordenación Universitaria comprobaron a efectividade do cumprimento dos requisitos esixidos na Orde do 11 de marzo de 1993. Na súa virtude,
DISPOÑO:
Primeiro.-A escola, da que os datos se mencionan a continuación, queda incluída no rexistro de escolas de música e danza.
Denominación específica: Escola de Música Breogán.
Titular: Manuel Suárez Luaces.
Domicilio: r/ Luis. A. Mestre, nº 14.
Localidade: O Grove.
Provincia: Pontevedra.
Segundo.-A escola de música citada queda sometida ó réxime de escolas de música e danza, segundo se establece na Orde do 11 de marzo de 1993 (DOG do 22 de abril de 1993), e á inspección académica correspondente.
Disposicións derradeiras
Primeira.-Facúltase o director xeral de Ordenación Educativa e Centros para dicta-las disposicións necesarias no desenvolvemento desta orde.
Segunda.-A presente orde entrará en vigor o día seguinte ó da súa publicación no Diario Oficial de Galicia
Santiago de Compostela, 13 de maio de 1996.
Juan Piñeiro Permuy
Conselleiro de Educación e Ordenación Universitaria
9604061