Examinado o expediente de deslinde parcial dos montes de San Xoán de Poio e Rega dos Agros pertecentes ás comunidades veciñais de San Xoán de Poio e Combarro respectivamente, ambas do Concello de Poio (Pontevedra) e tendo en conta os seguintes:

Antecedentes de feito.

1. Que o Xurado Provincial de Montes de Pontevedra en resolucións do 19 de novembro de 1981, declarou como tales os montes de San Xoán de Poio e Rega dos Agros pertencentes ás comunidades veciñais de San Xoán de Poio e Combarro respectivamente.

2. Que malia os esforzos do Servicio de Montes e Industrias Forestais de Pontevedra, as ditas comunidades non chegaron a un acordo sobre os límites dos montes, polo que o servicio propuxo, consonte o disposto no artigo 14.1º da Lei 55/1980, do 11 de novembro, de montes veciñais en man común, o deslindamento parcial deles, proposta que foi aprobada polo conselleiro de Agricultura, Gandería e Montes o 30 de decembro de 1991.

3. O deslindamento foi adxudicado á empresa PG. Galicia e fíxose cumprindo tódalas prescricións legais en canto a publicidade, notificacións e mais requisitos esixidos pola lexislación vixente.

4. As operacións do apeo verificáronse a partir da data anunciada no BOP, do 28 de xullo de 1992, asistindo os representantes da consellería e das comunidades afectadas, rematando o proceso coa proposta de resolución do enxeñeiro operador.

5. Durante o período de vista do expediente presentou unha reclamación Enrique Rial Esperón na súa calidade de presidente da Comunidade Veciñal de Combarro, contra a proposta de resolución do enxeñeiro operador por considerar que este parte dun erro de identificación no terreo do punto coñecido como Pedras Negras no que sitúa o piquete nº 1 e que a comunidade veciñal reclamante entende que se atopa a uns 900 metros no punto no que o enxeñeiro operador establece o piquete 1a e denomina Pao Chantado. A dita reclamación foi remitida o Gabinete Xurídico Territorial de Pontevedra e informada.

6. Con posterioridade foi remitido o escrito de reclamacións presentado pola Comunidade de Combarro, xunto co informe do Gabinete Xurídico Territorial á Comunidade de San Xoán de Poio para que puidera alega-lo que considerase pertinente na súa defensa, o que fixo o seu presidente en escrito de data 4 de agosto de 1995.

7. O expediente foi remitido á Asesoría Xurídica Xeral para o seu informe de acordo co establecido no artigo 125 do Regulamento de montes, sendo emitido o mesmo en data 30 de novembro de 1995,

e nel establécese que tódalas reclamacións que non aporten base documental, de carácter civil ou administrativo na defensa das súas pretensións, non se terán en conta, de acordo co establecido no artigo 122 do Regulamento de montes, sen prexuízo de que as partes comparecidas poidan facer vale-las súas pretensións perante os tribunais civís ou contencioso-administrativos.

8. O xefe do Servicio de Montes e Industrias Forestais de Pontevedra emitiu o seu informe-proposta, no que manifesta que, de acordo co primeiro resultando da resolución clasificatoria do Xurado Provincial de Montes referente ó monte Rega dos Agros, a descrición do monte é a que figura no expediente de investigación previa levado a cabo pola Administración forestal, e que tanto a descrición como o plano, coinciden coa liña do deslindamento que une os piquetes 1a, 2a, 3a e 4a, polo que propón que se aprobe a dita liña de acordo coas actas, levantamento topográfico e plano que figuran no expediente.

Fundamentos de dereito.

I O Servicio de Montes e Industrias Forestais de Pontevedra é competente para verifica-lo deslindamento, cumpridas tódalas prescricións legais en canto a publicidade, notificacións e mais requisitos esixidos pola lexislación vixente, e esta Consellería de Agricultura, Gandería e Montes é competente para dicta-la presente orde de conformidade co establecido no artigo 14 da Lei de montes do 8 de xuño de 1957, en relación co Real decreto 1535/1984 sobre traspaso de funcións e servicios do Estado á Comunidade Autónoma de Galicia en materia de conservación da natureza.

II

As comunidades interesadas aportaron a documentación que consideraron oportuna en defensa dos seus dereitos, que foi debidamente informada polo Gabinete Xurídico Territorial de Pontevedra.

III

As resolucións do Xurado Provincial de Montes son as únicas que outorgan a propiedade ó atoparse en plena vixencia e sen reclamación ningunha por parte das comunidades adxudicatarias, e dado que tales resolucións declaratorias dos montes de San Xoán de Poio e Rega dos Agros establecían unha liña divisoria entrámbolos dous montes, é esa liña a que ten que seguirse no deslindamento, sen que poida ser alterada polo enxeñeiro operador, que ten que resolve-las dúbidas á luz do expediente clasificatorio (expediente de investigación previa levado a cabo pola Administración forestal e cartografía que o acompaña) do Xurado Provincial de Montes, e no que quedan identificados os puntos Pedras Negras e o nacemento do regato Padornelo.

Non podemos esquecer que o expediente de deslindamento é un procedemento administrativo no que as partes comparecidas poden face-las alegacións

que consideren oportunas, pero estas non teñen valor nin eficacia se non aportan probas na defensa das súas pretensións, e que a orde resolutoria do expediente pódese recurrir na Xurisdicción Contencioso-Administrativa, ou se é o caso, perante a Xurisdicción Civil se a controversia se basea en cuestións relativas ó dominio ou á posesión dos montes afectados.

Vistos:

A Lei de montes, do 8 de xuño de 1957 e o regulamento para a súa aplicación do 22 de febreiro de 1962.

A lexislación vixente en materia de montes veciñais en man común.

O Real decreto 1535/1984, do 20 de xuño, de traspaso de funcións e servicio do Estado á Comunidade Autónoma de Galicia en materia de conservación da natureza.

A Lei 30/1992, do 26 de novembro, de réxime xurídico das administracións públicas e do procedemento administrativo común.

O informe-proposta do Servicio de Montes e Industrias Forestais de Pontevedra.

Esta Consellería de Agricultura, Gandería e Montes, a proposta da Dirección Xeral de Montes e Medio Ambiente Natural,

DISPÓN:

Primeiro.-Aproba-lo deslindamento parcial dos montes veciñais en man común de San Xoán de Poio e Rega dos Agros das parroquias de San Xoán de Poio e Combarro respectivamente, de acordo coa liña divisoria entrambos e que é a que une os piquetes:

1a. Situado na devasa límite entre os concellos de Meis e Poio, sobre unha rocha a rentes do chan de forma triangular duns 120 centímetros de altura e uns 70 centímetros de base. Identifícase o lugar co que no plano do expediente clasificatorio se nomea Pedras Negras.

2a. Situado a uns 65 metros ó S.E. do anterior baixando ata o lugar de Retacoba ou Outeiro da Barca, nunhas rochas de 2 metros de altura.

3a. Situado a uns 125 metros ó S.E. do anterior baixando ata o lugar coñecido por Campo da Antoniña sobre unha rocha de 80 x 60 x 30 centímetros xunto ó nacemento do regato Padornelo.

4a. Situado a uns 260 metros baixando cara ó E. pola valgada do regato Padornelo, ata o límite dos predios particulares onde remata a colindancia entre ámbolos montes, sempre de acordo coas actas, rexistro topográfico e plano que figuran no expediente do deslindamento.

Segundo.-Declarar, expresamente, que no referente ás reclamacións de propiedade, a presente resolución esgota a vía administrativa e que queda expedita a xudicial civil.

Terceiro.-Esta orde entrará en vigor o día seguinte ó da súa publicación no Diario Oficial de Galicia e en contra dela só cabe interpoñe-lo recurso contencioso-administrativo perante o Tribunal Superior de Xustiza de Galicia, no prazo de dous meses contados dende o día da súa entrada en vigor.

Santiago de Compostela, 1 de febreiro de 1996.

P.D. (Orde 13-12-1993)

Antonio Luis Rosón Pérez

Secretario xeral da Consellería de Agriculutra, Gandería e Montes

809