Examinada a solicitude de deslindamento formulada polos representantes do monte veciñal en man común (MVMC) Comunal de Nocelo con Baldriz, pertencente á Comunidade de Montes Veciñais en Man Común (CMVMC) de Nocelo da Pena, e o de Coto das Mercedes, pertencente á CMVMC Nocelo da Pena e As Mercedes, nos concellos de Sarreaus e Cualedro, resultan os seguintes:
Feitos:
Primeiro. O 30.9.2022 a CMVMC de Nocelo da Pena presentou un escrito (Rexel 2022/2411607) en que solicitan a aprobación dun deslindamento coa CMVMC de Nocelo da Pena e As Mercedes.
Coa solicitude achegou a seguinte documentación:
– Acta de conciliación levantada no Xulgado de Paz de Cualedro.
Segundo. Logo dun requirimento enviado o 20.4.2023, a mesma comunidade presentou un novo escrito (Rexel 2023/1354578 do 5.5.2023) con que achegou o resto da documentación preceptiva:
– Certificacións dos acordos das respectivas asembleas xerais.
– Acta de deslindamento.
Terceiro. O informe do Servizo de Montes da Xefatura Territorial de Ourense, do 11 de maio de 2023, fai constar que a documentación achegada corresponde ao deslindamento do perímetro estremeiro entre o MVMC Comunal de Nocelo con Baldriz, pertencente á CMVMC de Nocelo da Pena, e o MVMC Coto das Mercedes, pertencente á CMVMC de Nocelo da Pena e As Mercedes, desde o vértice 1 Penedo do Carro Volcado (o situado máis ao O) ata o vértice 7 Alto de Montouto (o situado máis ao L).
O citado informe considera que a solicitude se axusta ao establecido no artigo 53 da Lei 7/2012, do 28 de xuño, de montes de Galicia, polo que propón ao Xurado Provincial a súa aprobación nos tramos formados polos vértices 1 ao 2 e 6 ao 7 indicados na acta de conciliación, tendo os vértices 3 ao 5 a condición de puntos auxiliares que definen a estrema dos terreos comunais coas propiedades particulares (tramo 2-6).
Cuarto. O 8.1.2024 tivo entrada unha solicitude (Rexel 2024/39790) presentada por José Alberto Freitas Chaves, autorizado para iso por Manuel Rodríguez Fernández quen, en representación de 24 veciños do lugar das Mercedes (comuneiros, á súa vez, da CMVMC de Nocelo da Pena e As Mercedes), formula a súa oposición a unha proposta de deslindamento actualmente en trámite entre o MVMC Coto das Mercedes, pertencente á CMVMC de Nocelo da Pena e As Mercedes, e o MVMC Comunal de Nocelo con Baldriz, pertencente á CMVMC de Nocelo da Pena. Coa solicitude, ademais do seu propio escrito, achega unha serie de documentos que avalarían a condición histórica do actual linde do MVMC Coto das Mercedes, o cal quedaría desvirtuado segundo a actual proposta ([…] provoca de facto unha diminución da superficie de Coto das Mercedes de aproximadamente 112 hectáreas).
Consideracións legais e técnicas:
Primeira. A presente resolución dítase ao abeiro do artigo 53 do Regulamento para a execución da Lei 13/1989, do 10 de outubro, de montes veciñais en man común, aprobado polo Decreto 260/1992, do 4 de setembro, e de conformidade co disposto na Lei 39/2015, do 1 de outubro, do procedemento administrativo común das administracións públicas.
Segunda. O artigo 53 da Lei 7/2012, do 28 de xuño, de montes de Galicia, recolle o procedemento que se debe seguir no deslindamento entre montes veciñais en man común e establece que o Xurado Provincial de Clasificación de Montes Veciñais en Man Común, logo do exame da documentación presentada, ditará resolución que será publicada no Diario Oficial de Galicia e notificada ás comunidades interesadas.
O informe do Servizo de Montes da Xefatura Territorial de Ourense do 11 de maio de 2023 fai constar que a documentación achegada corresponde ao deslindamento do perímetro estremeiro entre o MVMC Comunal de Nocelo con Baldriz, pertencente á CMVMC de Nocelo da Pena, e o MVMC Coto das Mercedes, pertencente á CMVMC de Nocelo da Pena e As Mercedes, desde o vértice 1 Penedo do Carro Volcado (o situado máis ao O) ata o vértice 7 Alto de Montouto (o situado máis ao L).
O citado informe considera que a solicitude se axusta ao establecido no artigo 53 da Lei 7/2012, do 28 de xuño, de montes de Galicia.
Nembargantes, posteriormente tivo entrada unha solicitude de oposición á proposta de deslindamento actualmente en trámite por parte de 24 veciños do lugar das Mercedes (comuneiros, á súa vez, da CMVMC de Nocelo da Pena e As Mercedes).
Non obstante, o Xurado Provincial considera que procede desestimar as ditas alegacións, na medida en que a proposta de deslindamento cumpre todos os requisitos establecidos no artigo 53 da Lei 7/2012, do 28 de xuño, de montes de Galicia, polo que resulta conforme a normativa.
De acordo cos feitos e fundamentos de dereito expostos, e tendo en conta o informe favorable do Servizo de Montes do día 11 de maio de 2023, o Xurado Provincial de Clasificación de Montes Veciñais en Man Común acordou por unanimidade o día 14 de maio de 2024:
Aprobar o acto de conciliación acadado polas xuntas reitoras dos MVMC Comunal de Nocelo con Baldriz, pertencente á CMVMC de Nocelo da Pena, e o MVMC Coto das Mercedes, pertencente á CMVMC de Nocelo da Pena e As Mercedes, nos concellos de Sarreaus e Cualedro.
Contra esta resolución, que pon fin a vía administrativa, poderase interpoñer recurso potestativo de reposición perante o Xurado Provincial de Clasificación de Montes Veciñais en Man Común de Ourense no prazo dun mes, ou ben directamente recurso contencioso-administrativo ante o Xulgado do Contencioso-administrativo de Ourense, no prazo de dous meses contados desde o día seguinte ao desta notificación, de acordo co disposto nos artigos 123 e 124 da Lei 39/2015, do 1 de outubro, do procedemento administrativo común das administracións públicas, e nos artigos 8 e 46 da Lei 29/1998, do 13 de xullo, reguladora da xurisdición contencioso-administrativa.
Ourense, 13 de xuño de 2024
José Antonio Armada Pérez
Presidente do Xurado Provincial de Clasificación
de Montes Veciñais en Man Común de Ourense