A Resolución do 15 de marzo de 2024 (publicada no DOG do 27 de marzo) establece o marco das axudas para programas de calidade desenvolvidos por consellos reguladores de denominacións de calidade agroalimentarias e convoca as do exercicio orzamentario de 2024 (procedemento MR302B).
As axudas convocadas consisten en subvencións para actuacións relacionadas coa implantación e desenvolvemento de programas de mellora e control da calidade e da orixe dos produtos agroalimentarios galegos amparados por algunha denominación xeográfica de calidade das reguladas no capítulo II do título III da Lei 1/2024, do 11 de xaneiro, ou acollidos á produción ecolóxica a que se refire o capítulo IV do mesmo título da dita lei. A concesión das subvencións, segundo establecen as bases reguladoras, efectuarase mediante concorrencia competitiva polo sistema de rateo.
De conformidade co previsto no artigo 45 da Lei 39/2015, do 1 de outubro, do procedemento administrativo común das administracións públicas, as resolucións destas subvencións convocadas mediante concorrencia competitiva deben ser obxecto de publicación no Diario Oficial de Galicia, a cal producirá os mesmos efectos da notificación.
Unha vez rematada a fase de instrución das solicitudes recibidas, e tendo en conta as dispoñibilidades orzamentarias, procede resolver a convocatoria.
Por outra parte, de conformidade co establecido no artigo 15 da Lei 9/2007, do 13 de xuño, de subvencións de Galicia, e no artigo 17 da Lei 1/2016, do 18 de xaneiro, de transparencia e bo goberno, os órganos administrativos concedentes publicarán no Diario Oficial de Galicia as subvencións concedidas con expresión da convocatoria, o programa e o crédito orzamentario a que se imputen, o beneficiario, a cantidade concedida e a finalidade ou finalidades da subvención.
Por todo o indicado,
RESOLVO:
Primeiro. Conceder as subvencións convocadas pola Resolución do 15 de marzo de 2024 (publicada no DOG núm. 62, do 27 de marzo) pola que se establecen as bases reguladoras das axudas para programas de calidade desenvolvidos por consellos reguladores de denominacións de calidade agroalimentarias e se convocan para 2024 (código de procedemento MR302B). Estas axudas van con cargo á aplicación orzamentaria 14.A2.713D.781.0, código de proxecto 2011 00765, dos orzamentos xerais da Comunidade Autónoma de Galicia para o ano 2024.
Os beneficiarios e as contías destas axudas relaciónanse no anexo I desta resolución, e para a súa adxudicación tivéronse en conta os requisitos e criterios establecidos no artigo 5 da convocatoria. Os gastos atendibles para cada expediente son os que figuran no anexo II.
Sinálase que para os gastos directamente relacionados coa acreditación se concede un 50 % de axuda sobre o gasto subvencionable e, para o resto de gastos, unha vez aplicado o rateo, aplicouse unha porcentaxe de axuda do 43,345 % (equivalente a un 86,69 % sobre a porcentaxe máxima de subvención, que é do 50 %) do investimento subvencionable.
Estas axudas teñen por finalidade apoiar as actuacións relacionadas coa implantación e desenvolvemento de programas de mellora e control da calidade e da orixe dos produtos agroalimentarios galegos.
Segundo. Informar do seguinte os consellos reguladores beneficiarios que figuran nos anexos desta resolución:
a) As condicións de aplicación a estas axudas son, con carácter xeral, as establecidas na Resolución desta consellería do 15 de marzo de 2024, que as regula e, supletoriamente, as establecidas na normativa autonómica, estatal e comunitaria aplicable. Ademais, estas axudas teñen o carácter de axudas de minimis, polo que deben cumprir o establecido no Regulamento (UE) 2023/2831 da Comisión, do 13 de decembro de 2023, relativo á aplicación dos artigos 107 e 108 do Tratado de Funcionamento da Unión Europea ás axudas de minimis.
b) Para a concesión desta axuda e o establecemento das súas características tívose en conta a información e a documentación incluída coa solicitude de axuda. Calquera modificación que afecte esta información ou documentación achegada poderá dar lugar á modificación desta resolución, coa revogación da axuda, se for o caso.
c) Para proceder ao pagamento da subvención, o beneficiario deberá cumprir as condicións establecidas na Resolución do 15 de marzo de 2024 e, sen superar a data límite de xustificación que se establece na letra f), presentar a seguinte documentación:
– Memoria explicativa do programa desenvolvido e xustificantes dos gastos realizados, acompañados dunha relación numerada de todos eles. No caso dos pagamentos de salarios ao persoal, presentarase copia das nóminas, RLC e RNT (antes TC1 e TC2) e o modelo 111 dos trimestres que correspondan. Presentarase tamén a documentación que acredite o pagamento dos gastos realizados (extractos ou certificacións bancarias debidamente identificados). Na memoria especificaranse cales dos gastos realizados están, de ser o caso, directamente vinculados coa acreditación do consello regulador, conforme o establecido no artigo 5.3 da citada Resolución do 15 de marzo de 2024.
– Declaración do beneficiario sobre calquera outra axuda de minimis (Regulamento (UE) 2023/2831 da Comisión, do 13 de decembro de 2023, relativo á aplicación dos artigos 107 e 108 do Tratado de funcionamento da Unión Europea ás axudas de minimis) solicitada ou recibida nos tres anos previos.
– Declaración do beneficiario sobre outras axudas solicitadas ou concedidas para os mesmos gastos, das distintas administracións públicas ou calquera dos seus organismos, entes ou sociedades.
As declaracións sobre axudas a que se refiren os dous parágrafos anteriores presentaranse conforme o modelo de declaracións do anexo II da citada Resolución do 15 de marzo de 2024 desta axencia.
d) Infórmase, ademais, de que os seus datos persoais serán obxecto das publicacións legalmente establecidas de acordo co artigo 13.4 da Lei 4/2006, do 30 de xuño, de transparencia e boas prácticas da Administración pública galega, e do Decreto 132/2006, do 27 de xullo, polo que se regulan os rexistros públicos creados nos artigos 44 e 45 da Lei 7/2005, do 29 de decembro, de orzamentos xerais da Comunidade Autónoma de Galicia para o ano 2006.
e) Só se admitirán modificacións na execución dos investimentos subvencionables nas condicións sinaladas no artigo 14 da Resolución do 15 de marzo de 2024.
f) A data límite de xustificación será o 16 de setembro de 2024.
As resolucións expresas ou presuntas ditadas en aplicación desta resolución non porán fin á vía administrativa e contra elas poderá interpoñerse recurso de alzada ante a presidencia da Axencia, no prazo dun mes contado a partir do día seguinte ao da notificación da resolución, se esta for expresa, ou en calquera momento a partir do día seguinte a aquel en que se produzan os efectos do silencio administrativo.
Santiago de Compostela, 17 de xuño de 2024
Martín Alemparte Vidal
Director xeral da Axencia Galega da Calidade Alimentaria