Unha vez examinada a solicitude de deslindamento formulada polos representantes do monte veciñal en man común (MVMC) Val do Dorno, Montemiau, Costa dos Marcos, Costa do Muíño Novo e Outeiro de Almorzo, pertencente á Comunidade de Montes Veciñais en Man Común (CMVMC) da Parroquia de Toén, e os do MVMC A Fenteira, pertencente á CMVMC da parroquia de Puga, no concello de Toén, resultan os seguintes:

Feitos:

Primeiro. O 13.6.2023 a CMVMC da Parroquia de Toén presentou un escrito (Rexel 2023/1744760) en que solicitan a aprobación dun deslindamento coa CMVMC da Parroquia de Puga.

Coa solicitude achegouse a seguinte documentación:

– Acta de deslindamento.

– Certificacións de aprobación das respectivas asembleas xerais.

– Planos do deslindamento.

– Acta de conciliación levantada no Xulgado de Paz de Toén.

Segundo. O informe do Servizo de Montes da Xefatura Territorial de Ourense do 3 de xullo de 2023 fai constar que a documentación achegada corresponde ao deslindamento parcial do perímetro estremeiro entre o MVMC Val do Dorno, Montemiau, Costa dos Marcos, Costa do Muíño Novo e Outeiro de Almorzo, pertencente á CMVMC da Parroquia de Toén, e mais o MVMC A Fenteira, pertencente á CMVMC da Parroquia de Puga, desde o vértice 1 (o situado máis ao L) ata o vértice 10 (o situado máis ao S).

Logo de analizar os vértices e a súa localización obsérvase que:

• O punto inicial da liña (vértice 1, marco da Caseta Benigno) coincide co punto final da liña de deslindamento parroquia de Toén-parroquia de Alongos-parroquia de Puga (vértice 12, marco da Caseta Benigno); esta última, recoñece e valida implicitamente a confluencia das tres citadas comunidades (Toén-Puga-Alongos) no punto en cuestión.

• O punto final da liña (vértice 10) coincide co punto final da liña de deslindamento parroquia de Toén-parroquia de Xestosa (vértice 3) e mais co punto inicial da liña parroquia de Xestosa-parroquia de Puga (vértice 1); estas últimas recoñecen e validan implicitamente a confluencia das tres citadas comunidades (Toén-Puga-Xestosa) no punto en cuestión.

• Entre os puntos con pares de coordenadas X: 584.141 - Y: 4.684.974 e X: 584.078 - Y: 4.684.891, situados entre os vértices 3 (Alto Costa dos Marcos 2) e 5 (Vedado das Leiras 1) da conciliación, non hai veciñanza formal entre a parroquia de Toén e mais a de Puga.

O citado informe considera que a solicitude se axusta ao establecido no artigo 53 da Lei 7/2012, do 28 de xuño, de montes de Galicia, polo que lle propón ao Xurado Provincial a súa aprobación nos tramos comprendidos entre os puntos con pares de coordenadas X: 584.823,95 - Y: 4.685.405,29 (vértice 1, marco da Caseta Benigno) e X: 584.141 - Y: 4.684.974; e entre os puntos X: 584.078 - Y: 4.684.891 e X: 583.786 – Y: 4.684.191 (vértice 10).

Consideracións legais e técnicas:

Primeiro. A presente resolución dítase ao abeiro do artigo 53 do Regulamento para a execución da Lei 13/1989, do 10 de outubro, de montes veciñais en man común, aprobado polo Decreto 260/1992, do 4 de setembro, e de conformidade co disposto na Lei 39/2015, do 1 de outubro, do procedemento administrativo común das administracións públicas.

Segundo. O artigo 53 da Lei 7/2012, do 28 de xuño, de montes de Galicia, recolle o procedemento que se deberá seguir no deslindamento entre montes veciñais en man común e establece que o xurado provincial de montes veciñais en man común, logo do exame da documentación presentada, ditará a resolución correspondente, que será publicada no Diario Oficial de Galicia e notificada ás comunidades interesadas.

De acordo cos feitos e fundamentos de dereito expostos, e tendo en conta o informe favorable do Servizo de Montes do día 3 de xullo de 2023, o Xurado Provincial de Montes Veciñais en Man Común acordou por unanimidade o día 14 de maio de 2024:

Aprobar o acto de conciliación acadado polas xuntas reitoras do MVMC Val do Dorno, Montemiau, Costa dos Marcos, Costa do Muíño Novo e Outeiro de Almorzo, pertencente á CMVMC da Parroquia de Toén, e o MVMC A Fenteira, pertencente á CMVMC da Parroquia de Puga, no concello de Toén.

Contra esta resolución, que pon fin á vía administrativa, poderase interpor recurso potestativo de reposición ante o Xurado Provincial de Clasificación de Montes Veciñais en Man Común de Ourense no prazo dun mes, ou ben directamente recurso contencioso-administrativo ante o Xulgado do Contencioso-Administrativo de Ourense no prazo de dous meses, contados desde o día seguinte ao desta notificación, de acordo co disposto nos artigos 123 e 124 da Lei 39/2015, do 1 de outubro, do procedemento administrativo común das administracións públicas, e nos artigos 8 e 46 da Lei 29/1998, do 13 de xullo, reguladora da xurisdición contencioso-administrativa.

Ourense, 29 de maio de 2024

Luis Jorge Álvarez Ferro
Presidente do Xurado Provincial de Clasificación de
Montes Veciñais en Man Común de Ourense