Conforme o establecido no artigo 70 do Real decreto lexislativo 5/2015, do 30 de outubro, polo que se aproba o texto refundido da Lei do Estatuto básico do empregado público; no artigo 48 da Lei 2/2015, do 29 de abril, do emprego público de Galicia; no artigo 20 da Lei 31/2022, do 23 de decembro, de orzamentos xerais do Estado para o ano 2023, así como nos estatutos da Universidade de Santiago de Compostela (USC), aprobados polo Decreto 14/2014, do 30 de xaneiro, e logo de aprobación polo Consello de Goberno, na sesión que tivo lugar o 23 de febreiro de 2024, da planificación de prazas de persoal docente e investigador para o curso 2024/25, co informe favorable do Consello Social da Universidade do 15 de marzo de 2024, e da aprobación por parte do Consello de Goberno, na sesión que tivo lugar o 23 de febreiro de 2024, tras a negociación e o acordo na Mesa Xeral do Persoal Docente e Investigador (PDI) do 8 de febreiro de 2024 da oferta de emprego público de PDI derivada desta planificación, e unha vez obtida a autorización da Consellería de Facenda e Administración Publica da Xunta de Galicia o 24 de maio de 2024, tal e como se determina no artigo 36.un da Lei 9/2023, do 28 de decembro, de orzamentos xerais da Comunidade Autónoma de Galicia para o ano 2024,

RESOLVO:

Primeiro. Publicar a oferta de emprego público (OEP) do persoal docente e investigador da Universidade de Santiago de Compostela para o ano 2024, que consiste en 161 prazas de profesorado con vinculación permanente. Da totalidade destas prazas, 119 (70 de profesorado permanente laboral, 48 de profesorado titular e 1 de catedrático/a de universidade) corresponden ao sistema de quenda libre. Delas resérvanse 19 prazas (11 de profesorado permanente laboral e 8 de profesorado titular de universidade) para dar cumprimento á obriga, recollida no artigo 71.1 da Lei orgánica 2/2023, do 22 de marzo, do sistema universitario, de destinar, como mínimo, un 15 % do total de prazas que se ofrecen para a incorporación de persoal investigador doutor que obtivese o certificado I3 ou R3. Na OEP inclúense, ademais, 42 prazas de catedrático/a de universidade para a quenda de promoción interna.

Segundo. Esta OEP inclúe as necesidades de recursos humanos de carácter permanente no ámbito docente e investigador, con asignación orzamentaria, que non poden ser cubertas cos efectivos de persoal existentes, segundo se detalla no anexo, dentro do contexto global de restrición orzamentaria que afecta todas as administracións públicas.

Terceiro. A planificación dos recursos humanos na USC oriéntase á atención das funcións prioritarias, á correcta dimensión do volume de efectivos e a potenciar a estabilización do seu persoal docente e investigador.

Cuarto. O artigo 59 do texto refundido da Lei do Estatuto básico do empregado público, aprobado polo Real decreto lexislativo 5/2015, do 30 de outubro, e no artigo 48 da Lei 2/2015, do 29 de abril, do emprego público de Galicia, prevé a reserva dunha cota non inferior ao sete por cento das vacantes ofertadas para seren cubertas por persoas con discapacidade, considerando como tales as definidas no número 2 do artigo 4 do texto refundido da Lei xeral de dereitos das persoas con discapacidade e da súa inclusión social, aprobado polo Real decreto lexislativo 1/2013, do 29 de novembro, sempre que superen os procesos selectivos e acrediten a súa discapacidade, así como a compatibilidade no desempeño das súas funcións. Para dar cumprimento ao establecido nas ditas disposicións legais, esta reserva realizarase nas convocatorias que se publiquen en execución da oferta aprobada.

Quinto. As convocatorias dos concursos derivados desta oferta publicaranse no Diario Oficial de Galicia e, de ser o caso, no Boletín Oficial del Estado, para garantir a súa publicidade, e executaranse dentro do prazo máximo establecido no artigo 70 do Estatuto básico do empregado público.

Sexto. Coa finalidade de lles dar unha maior difusión ás convocatorias de concursos relacionados con esta oferta de emprego, así como aos actos que deriven destes, na páxina web do Servizo de Planificación de PDI da USC (https://www.usc.gal/gl/institucional/goberno/area/xestionpersoal/PDI), dentro da sección de convocatorias de prazas, poderase consultar a documentación correspondente.

Santiago de Compostela, 28 de maio de 2024

O reitor da Universidade de Santiago de Compostela
P.D. (Resolución do 21 de abril de 2022; DOG do 26 de abril)
Ernesto González Seoane
Vicerreitor de Profesorado

ANEXO

Oferta de prazas de persoal docente e investigador para o ano 2024

1. Sistema de acceso libre.

1.1. Persoal docente e investigador contratado.

Categoría	Número de prazas
Profesorado permanente laboral	70 (*)
(*) Once destas prazas resérvanse para a estabilización de persoal investigador con certificado I3/R3.

1.2. Persoal docente e investigador de corpos docentes universitarios.

Corpo docente	Número de prazas
Profesorado titular de universidade	48 (*)
Catedrático/a de universidade	1
(*) Oito destas prazas resérvanse para a estabilización de persoal investigador con certificado I3/R3.

2. Sistema de acceso por promoción interna.

Corpo docente	Número de prazas
Catedrático/a de universidade	42