Dentro das actividades programadas para o ano 2024 no Plan de formación aprobado polo Consello Reitor, e conforme as funcións atribuídas pola Lei 1/2007, do 15 de xaneiro, da Academia Galega de Seguridade Pública, anúnciase a convocatoria de catro edicións do Curso básico de auxiliares de policía local, conforme as seguintes bases:
1. Datos da actividade.
Denominación: Curso básico de auxiliares de policía local.
Tipo: curso.
Horas lectivas: 24.
Modalidade: presencial.
Obxectivos: dotar as/os auxiliares de policía local dunha formación teórico-práctica que as/os capacite para o posterior desempeño da súa función como auxiliares temporais dos corpos da Policía Local.
Contidos:
– Intervención policial.
– Tráfico e seguridade viaria.
– Policía administrativa.
– Primeiros auxilios.
– Aplicacións policiais básicas do dereito penal e procesual-penal.
– Relacións coa cidadanía.
– Protocolo e saúdo.
2. Desenvolvemento da convocatoria.
Destinatarios/as:
Persoal seleccionado e proposto polos concellos que poida prestar servizo como auxiliar de policía local de forma temporal, de acordo co previsto nos artigos 46 a 48 do Decreto 15/2023, do 12 de xaneiro, polo que se desenvolve a Lei 4/2007, do 20 de abril, de coordinación de policías locais.
Persoal seleccionado dentro do proceso selectivo unitario que desenvolve a Agasp dentro dos convenios asinados cos concellos.
Persoal integrante da lista de contratación creada ao abeiro dos procesos selectivos unitarios dos anos precedentes e se o curso realizado foi anterior ao ano 2021.
Para estes efectos, como se recolle no artigo 49.2 do citado decreto, non terán a obriga de facer o curso as persoas que o superasen nos últimos 4 anos, é dicir, a partir do ano 2021.
Prazas ofertadas:
60 prazas por edición.
3. Solicitudes de participación.
Prazo de inscrición e presentación:
O prazo de inscrición e presentación das solicitudes de participación comezará o día seguinte ao da publicación desta resolución no DOG.
Os concellos que se encontren nesta situación deberán remitir un escrito asinado polo/a alcalde/esa dirixido á Academia Galega de Seguridade Pública (avda. da Cultura, s/n, 36680 A Estrada; (fax 886 20 61 22) en que figure a listaxe de persoas seleccionadas segundo o artigo 49 do Decreto 15/2023 para efectuar a correspondente reserva de praza para realizar o devandito curso.
A Agasp inscribirá automaticamente o alumnado procedente do proceso selectivo unitario.
Listaxe de solicitudes seleccionadas:
Antes do comezo de cada edición do curso básico, publicarase no sitio web http://agasp.xunta.gal o persoal admitido para realizalo.
4. Desenvolvemento da actividade.
Presentación: as persoas admitidas neste curso deberán presentarse ás 10.00 horas do día que comece o curso.
Lugar: Academia Galega de Seguridade Pública.
Horario lectivo: das 10.00 ás 14.00 h e das 15.30 ás 20.30 h.
Datas:
1ª edición: 27, 28 e 29 de maio de 2024.
2ª edición: 29, 30 e 31 de maio de 2024.
3ª edición: 3, 4 e 5 de xuño de 2024.
4ª edición: 10, 11 e 12 de xuño de 2024 (unicamente se realizará se hai solicitudes).
Certificado de superación do curso:
Ao remate da actividade entregaráselles un certificado de asistencia a aquelas persoas que acrediten a súa participación continuada nela e superen as probas que se determinen, de ser o caso.
5. Modificacións e incidencias.
A Academia Galega de Seguridade Pública poderá modificar o desenvolvemento normal da actividade para adaptala ás necesidades da Administración e ás continxencias que poidan xurdir.
A Estrada, 29 de abril de 2024
Santiago Villanueva Álvarez
Director xeral da Academia Galega de Seguridade Pública