Para os efectos previstos na disposición transitoria décimo terceira da Lei 7/2012, do 28 de xuño, de montes de Galicia, dáselle publicidade ao acordo acadado polo Xurado Provincial de Clasificación de Montes Veciñais en Man Común de Pontevedra, en sesión que tivo lugar o 28 de febreiro de 2024, respecto á revisión do esbozo e elaboración da cartografía actualizada dos montes veciñais denominados Santa María de Salceda e As Covas, da Comunidade de Montes Veciñais en Man Común de Santa María de Salceda, no concello de Salceda de Caselas (expediente RE22013).
O 1.12.2023 o Servizo de Montes desta xefatura territorial emite o seguinte informe:
«Feitos:
Primeiro. O 6.9.2022 e número 2022/2208329 a Comunidade de Montes Veciñais en Man Común (en diante, CMVMC) de Santa María de Salceda solicita a revisión do esbozo dos montes Santa María de Salceda (Resolución de clasificación do 15.12.1980) e As Covas (Resolución de clasificación do 20.6.2013). A dita solicitude deu lugar á apertura do expediente RE22013. Consta no expediente:
– Memoria técnica da revisión do esbozo dos montes Fonte Salgueiras e Covas de setembro de 2022. Asinada polo enxeñeiro forestal núm. 883 do COETF de Galicia e modificada o 6.7.2023.
– Certificado do secretario coa conformidade do presidente da CMVMC de Santa María de Salceda do 24.11.23 da aprobación en asemblea do 2.4.2023.
– Cartografía en formato dixital.
– Representación a favor da empresa Asociación Forestal de Galicia.
Segundo a memoria técnica levouse a cabo un levantamento topográfico das parcelas con GPS de precisión centimétrica en que se percorreu todo o perímetro con varios membros da xunta reitora, durante o percorrido detectaron marcos de todo o perímetro e encravados, a maior parte do perímetro está delimitado por muros que o separan das propiedades privadas. Xustifican a necesidade da revisión do esbozo por conter moitas deficiencias respecto á delimitación real do monte.
Estes montes estiveron na súa meirande parte catalogados como de utilidade pública no monte de UP 506, Fonte Salgueira e outros, deslindamento aprobado por Orde ministerial de decembro de 1960. A parcela As Covas no se atopa deslindada administrativamente. O monte Fonte Salgueira e outros atópase amolloado en todo o seu perímetro mentres que na parcela As Covas existen algúns marcos e muros que o delimitan dos predios particulares que o rodean.
Dentro do seu perímetro existen algúns enclavados de propiedade particular.
Nestes últimos anos solucionouse mediante un deslindamento a discrepancia coa CMVMC da Picoña, que derivou da deficiente clasificación destas dúas comunidades de montes. Tamén se chegou a un acordo informal coa CMVMC de Cristiñade (Ponteareas).
Pese estes trámites o esbozo da carpeta-ficha non foi revisado acorde a estas modificacións de lindes polo que se pretende con esta tramitación presentar ante a Administración a delimitación completa actualizada de todo o perímetro en formato dixital tanto destes tramos como do resto do perímetro do monte veciñal.
Segundo. O obxecto da revisión do esbozo son os montes Santa María de Salceda con Resolución de clasificación do 5.12.80 e unha superficie de 130 ha e o monte As Covas, con Resolución de clasificación do 20.6.2013 e unha superficie de 1,27 ha.
Segundo os datos do Sistema Rexistral Forestal regulado no artigo 126 da Lei 7/2012, de montes de Galicia:
– Non consta contrato de xestión coa Consellería do Medio Rural.
– A CMVMC de Santa María de Salceda dispón dun documento de ordenación forestal inscrito no Rexistro de montes ordenados de Galicia co núm. 360139-01 e vixente ata 2031.
– O esbozo presentado da CMVMC de Santa María de Salceda respecta a liña de deslindamento aprobada polo Xurado de MVMC de Pontevedra coa CMVMC da Picoña. Tamén se respecta o linde co instrumento de xestión núm. 360008 da CMVMC de Cristiñade.
– Non constan actos de disposición que modifican o perímetro e superficie do MVMC. Autorizouse a permuta PO-08-PER-20 co solicitante Granxa Pegullal, S.A. pero non se reflexa na cartografía.
Terceiro. A superficie e perímetro da revisión do esbozo proposto total é de 115,16 ha e 15,50 km e segundo o indicado na memoria técnica queda definido do seguinte xeito:
Monte: Santa María de Salceda ou Fonte Salgueira.
Superficie: 113,95 ha.
Perímetro: 14.855 m.
Linde norte: termo municipal de Ponteareas.
Linde sur: propiedades particulares da parroquia de Santa María de Salceda.
Linde leste: termos municipais de Ponteareas e de Salvaterra de Miño.
Linde oeste: MVMC da Picoña.
Monte: As Covas.
Superficie: 1,21 ha.
Perímetro: 640 m.
Linde norte: MVMC de San Xurxo.
Linde sur: propiedade particular.
Linde leste: propiedade particular e río Caselas.
Linde oeste: propiedade particular.
Cuarto. O 30.11.2022, o Xurado Provincial de MVMC de Pontevedra acorda solicitar ao Servizo de Montes unha proposta coa revisión e elaboración da cartografía actualizada do monte veciñal clasificado a favor da CMVMC de Santa María de Salceda (Salceda de Caselas), expediente RE22013, coa finalidade de dar cumprimento ao establecido na disposición transitoria décimo terceira da Lei 7/2012, do 28 de xuño de 2012, de montes de Galicia.
Consideracións legais e técnicas:
Primeira. A Lei 7/2012, do 28 de xuño, de montes de Galicia (en diante, LMG), na súa disposición transitoria décimo terceira, establece o procedemento de revisión de esbozos de montes veciñais en man común.
1. Os esbozos de montes veciñais integrados nun expediente que, pola súa antigüidade, non reúnan as características de fiabilidade e precisión que exixen as novas técnicas topográficas poderán ser obxecto de revisión total ou parcial, axustándose e completándose con aqueles datos e documentos que se consideren necesarios, en particular os requiridos para a súa inmatriculación no rexistro da propiedade.
2. Para estes efectos, o xurado provincial de montes veciñais en man común, de oficio ou por instancia de parte, poderá solicitar á Administración forestal unha proposta coa revisión e elaboración da cartografía actualizada do monte veciñal en man común. Na proposta non poderán incluírse parcelas que figuren inmatriculadas no rexistro da propiedade a favor de persoas físicas ou xurídicas distintas á comunidade veciñal de montes.
3. Unha vez aceptada a proposta polo xurado, poñerase en coñecemento da comunidade propietaria e publicarase no Diario Oficial de Galicia para o resto de posibles interesados.
4. Aceptada a revisión, poderase proceder á marcaxe dos montes veciñais que, en todo caso, se axustará ao plano que resulte da dita revisión. A marcaxe poderá ser realizada de oficio pola propia Administración forestal ou por instancia das comunidades propietarias.
5. Se durante a revisión ou a marcaxe se suscitan cuestións relativas á propiedade, poñerase fin ao procedemento, dentro do perímetro cuestionado, sen máis trámites. Este acordo de finalización e arquivamento parcial do procedemento non será susceptible de impugnación na vía administrativa, sen prexuízo da facultade dos interesados de acudiren á vía xurisdicional civil, por ser esta a competente para dirimir tal controversia.
Segunda. A revisión do esbozo dos montes Santa María de Salceda e As Covas proposta polo Servizo de Montes é a presentada pola CMVMC de Santa María de Salceda e queda definido consonte os datos reflectidos no feito terceiro, e a documentación achegada».
Vista a proposta de revisión presentada polo Servizo de Montes sobre a adaptación do esbozo dos montes veciñais denominados Santa María de Salceda e As Covas e de conformidade co previsto na disposición transitoria décimo terceira da Lei 7/2012, do 28 de xuño, de montes de Galicia, este xurado por unanimidade dos seus membros,
ACORDA:
Aprobar a revisión do esbozo dos montes veciñais denominados Santa María de Salceda e As Covas clasificado a prol da CMVMC de Santa María de Salceda (Salceda de Caselas), segundo a proposta do Servizo de Montes e a planimetría elaborada por este.
Pontevedra, 22 de abril de 2024
Antonio Crespo Iglesias
Presidente do Xurado Provincial de Clasificación de
Montes Veciñais en Man Común de Pontevedra