Para os efectos previstos na disposición transitoria décimo terceira da Lei 7/2012, do 28 de xuño, de montes de Galicia, dáselle publicidade ao acordo acadado polo Xurado Provincial de Clasificación de Montes Veciñais en Man Común de Pontevedra, en sesión que tivo lugar o 28 de febreiro de 2024, respecto á revisión do esbozo e elaboración da cartografía actualizada do monte veciñal denominado monte Cotobade e Castrillón da Comunidade de Montes Veciñais en Man Común de Cortellas e Lourido, no concello de Soutomaior (expediente RE22008).
O 1.12.2023, o Servizo de Montes desta xefatura territorial emite o seguinte informe:
«Feitos:
Primeiro. O 2.9.2022 e número 2022/2179324, a Comunidade de Montes Veciñais en Man Común (en diante, CMVMC) de Cortellas e Lourido solicita a revisión do esbozo do monte veciñal Cotobade e Castrillón. A dita solicitude deu lugar á apertura do expediente RE22008. Consta no expediente:
– Memoria técnica da revisión do esbozo do monte Cotobade e Castrillón de agosto de 2022. Asinada pola enxeñeira forestal núm. 908 do COETFG e modificada o 8.5.2023.
– Certificado do secretario coa conformidade do presidente da CMVMC de Cortellas e Lourido do 17.11.2023 da aprobación na Asemblea do 11.9.2022.
– Cartografía en formato dixital.
Segundo a memoria técnica levouse a cabo un levantamento topográfico das parcelas con GPS de precisión centimétrica en que se percorreu todo o perímetro con varios membros da xunta reitora, durante o percorrido detectaron mollóns de todo o perímetro e encravado, a maior parte do perímetro está delimitado por muros que o separan das propiedades privadas. Existe un levantamento topográfico do ano 1886 e deslinde coa CMVMC de Lourido tramitado e aprobado consonte o artigo 53 da Lei 7/2012 de montes de Galicia. A CMVMC de Cortellas e Lourido na memoria asinada polo técnico competente en materia forestal achega documentación suficiente que acredita a proposta da revisión do esbozo.
Segundo. O obxecto da revisión do esbozo é o MVMC denominado monte Cotobade e Castrillón co ID 3153. A superficie inicial clasificada é de 94 ha.
Segundo os datos do Sistema rexistral forestal non consta superficie de xestión pública, constan dúas expropiacións para o gasoduto (0,07 has) e para a instalación dunha antena (3 m2). Asemade, dispón dun instrumento de ordenación inscrito no Rexistro de Montes Ordenados de Galicia co número 3600271.
A superficie total da revisión do esbozo achegada é de 75,00 ha e un perímetro revisado con propietarios particulares de 12.948 m, segundo a proposta de revisión do esbozo achegada e o indicado na memoria técnica queda definido do seguinte xeito:
Monte: Cavada de Estévez.
Superficie: 10,72 ha.
Perímetro: 1.999 m.
Linde sur: predios particulares.
Linde norte: MVMC de Aranza.
Linde leste: predios particulares.
Linde oeste: predios particulares.
Monte: Castrillón.
Superficie: 64,28 ha.
Perímetro: 10.949 m.
Linde sur: predios particulares.
Linde norte: predios particulares.
Linde leste: predios particulares.
Linde oeste: MVMC Chan do Coello e predios particulares.
Terceiro. O 30.11.2022, o Xurado Provincial de MVMC de Pontevedra acorda solicitar ao Servizo de Montes unha proposta coa revisión e elaboración da cartografía actualizada do monte veciñal clasificado a favor da CMVMC de Cortellas e Lourido (Soutomaior), expediente RE22008, coa finalidade de dar cumprimento ao establecido na disposición transitoria décimo terceira da Lei 7/2012, do 28 de xuño, de montes de Galicia.
Consideracións legais e técnicas.
Primeira. A Lei 7/2012, do 28 de xuño, de montes de Galicia (en diante, LMG), na súa disposición transitoria décimo terceira, establece o procedemento de revisión de esbozos de montes veciñais en man común.
1. Os esbozos de montes veciñais integrados nun expediente que, pola súa antigüidade, non reúnan as características de fiabilidade e precisión que exixen as novas técnicas topográficas poderán ser obxecto de revisión total ou parcial, axustándose e completándose con aqueles datos e documentos que se consideren necesarios, en particular os requiridos para a súa inmatriculación no Rexistro da Propiedade.
2. Para estes efectos, o Xurado Provincial de Montes Veciñais en Man Común, de oficio ou por instancia de parte, poderá solicitar á Administración forestal unha proposta coa revisión e elaboración da cartografía actualizada do monte veciñal en man común. Na proposta non poderán incluírse parcelas que figuren inmatriculadas no Rexistro da Propiedade a favor de persoas físicas ou xurídicas distintas á comunidade veciñal de montes.
3. Unha vez aceptada a proposta polo xurado, poñerase en coñecemento da comunidade propietaria e publicarase no Diario Oficial de Galicia para o resto de posibles interesados.
4. Aceptada a revisión, poderase proceder á marcaxe dos montes veciñais, que, en todo caso, se axustará ao plano que resulte da dita revisión. A marcaxe poderá ser realizada de oficio pola propia Administración forestal ou por instancia das comunidades propietarias.
5. Se durante a revisión ou a marcaxe se suscitan cuestións relativas á propiedade, poñerase fin ao procedemento, dentro do perímetro cuestionado, sen máis trámites. Este acordo de finalización e arquivamento parcial do procedemento non será susceptible de impugnación na vía administrativa, sen prexuízo da facultade dos interesados de acudiren á vía xurisdicional civil, por ser esta a competente para dirimir tal controversia.
Segunda. A revisión do esbozo do monte Cotobade e Castrillón proposta polo Servizo de Montes é a presentada pola CMVMC de Cortellas e Lourido e queda definido consonte os datos reflectidos no feito segundo e a documentación achegada».
Vista a proposta de revisión presentada polo Servizo de Montes sobre a adaptación do esbozo do monte veciñal denominado Cotobade e Castrillón e de conformidade co previsto na disposición transitoria décimo terceira da Lei 7/2012, do 28 de xuño, de montes de Galicia, este xurado por unanimidade dos seus membros,
ACORDA:
Aprobar a revisión do esbozo do monte veciñal denominado Cotobade e Castrillón clasificado a prol da CMVMC de Cortellas e Lourido (Soutomaior), segundo a proposta do Servizo de Montes e a planimetría elaborada polo mesmo.
Pontevedra, 19 de abril de 2024
Antonio Crespo Iglesias
Presidente do Xurado Provincial de Clasificación
de Montes Veciñais en Man Común de Pontevedra