Para os efectos previstos na disposición transitoria décimo terceira da Lei 7/2012, do 28 de xuño, de montes de Galicia, dáse publicidade do acordo acadado polo Xurado Provincial de Clasificación de Montes Veciñais en Man Común de Pontevedra, na sesión que tivo lugar o 28 de febreiro de 2024, respecto á revisión do esbozo e elaboración da cartografía actualizada do monte veciñal denominado Chan do Coello, da Comunidade de Montes Veciñais en Man Común de Lourido, no concello de Soutomaior (expediente RE22009).
O 1.12.2023 o Servizo de Montes desta xefatura territorial emite o seguinte informe:
«Feitos:
Primeiro. O 26.10.2022 e con número 2022/2615474 a Comunidade de Montes Veciñais en Man Común (en diante, CMVMC) de Lourido solicita a revisión do esbozo do monte Chan do Coello. A dita solicitude deu lugar á apertura do expediente RE22009. Consta no expediente:
– A memoria técnica da revisión do esbozo do Monte Chan do Coello, de agosto de 2022, asinada pola enxeñeira forestal número 908, do COETFG, e modificada en decembro de 2023.
– Certificado do secretario coa conformidade do presidente da CMVMC de Lourido do 22.11.23 da aprobación na asemblea do 21.5.2023.
– Cartografía en formato dixital.
Segundo a memoria técnica levouse a cabo un levantamento topográfico das parcelas con GPS de precisión centimétrica en que se percorreu todo o perímetro con varios membros da Xunta Reitora. Durante o percorrido detectaron marcos de todo o perímetro e enclavado; a maior parte do perímetro está delimitado por muros que o separan das propiedades privadas. Xustifican a necesidade da revisión do esbozo ao executar o deslindamento coa CMVMC de Cotobade-Castrillón. O monte Chan do Coello ten un levantamento topográfico feito no ano 1886, onde veñen descritos os seus lindes e un plano que o acompaña. Recentemente acaba de asinar un deslindamento coa CMVMC de Moreira.
Segundo. O obxecto da revisión do esbozo é o MVMC denominado Chan do Coello, co ID 3144. A superficie inicial clasificada é de 40 ha.
Segundo os datos do Sistema rexistral forestal, non consta superficie de xestión pública, consta unha expropiación (PO-03-EXP/04) de 0,58 ha para o ancheamento e mellora do trazado da CP Arcade-Amoedo (Pazos de Borbén) 3ª fase. Así mesmo, non dispón dun instrumento de ordenación e xestión do monte.
A superficie total da revisión do esbozo achegada é de 35,80 ha e dun perímetro revisado con propietarios particulares de 10.700 m, segundo a proposta de revisión do esbozo achegada e o indicado na memoria técnica queda definido do seguinte xeito:
Monte: Chan do Coello.
Superficie: 35,80 ha.
Perímetro: 10.700 m.
Linde norte: monte Landeiro de Sobral e Val.
Linde sur: predios propietarios particulares e MVMC de Moreira.
Linde leste: MVMC de Cotobade-Castrillón e predios de propietarios particulares.
Linde oeste: Manuela Orentina Blanco Lorenzo, Agustín Lorenzo Cabano, José Manuel Albán Blanco, Nicanor Ocampo Fraga, María Bouzón Bugallo e outros predios de propietarios particulares.
Terceiro. O 30.11.2022 o Xurado provincial de MVMC de Pontevedra acorda solicitarlle ao Servizo de Montes unha proposta coa revisión e elaboración da cartografía actualizada do monte veciñal clasificado a favor da CMVMC de Lourido (Soutomaior), expediente RE22009, coa finalidade de dar cumprimento ao establecido na disposición transitoria décimo terceira da Lei 7/2012, do 28 de xuño, de montes de Galicia.
Consideracións legais e técnicas:
Primeira. A Lei 7/2012, do 28 de xuño, de montes de Galicia (en diante, LMG), na súa disposición transitoria décimo terceira, establece o procedemento de revisión de esbozos de montes veciñais en man común.
1. Os esbozos de montes veciñais integrados nun expediente que, pola súa antigüidade, non reúnan as características de fiabilidade e precisión que exixen as novas técnicas topográficas poderán ser obxecto de revisión total ou parcial, e axustaranse e completaranse con aqueles datos e documentos que se consideren necesarios, en particular os requiridos para a súa inmatriculación no Rexistro da Propiedade.
2. Para estes efectos, o Xurado Provincial de Montes Veciñais en man común, de oficio ou por instancia de parte, poderá solicitarlle á Administración forestal unha proposta coa revisión e elaboración da cartografía actualizada do monte veciñal en man común. Na proposta non poderán incluírse parcelas que figuren inmatriculadas no Rexistro da Propiedade a favor de persoas físicas ou xurídicas distintas á comunidade veciñal de montes.
3. Unha vez aceptada a proposta polo Xurado, porase en coñecemento da comunidade propietaria e publicarase no Diario Oficial de Galicia para o resto de posibles interesados e interesadas.
4. Tras ser aceptada a revisión, realizarase a marcaxe dos montes veciñais, que en todo caso se axustará ao plano que resulte da dita revisión. A marcaxe poderá ser realizada de oficio pola propia Administración forestal ou por instancia das comunidades propietarias.
5. Se durante a revisión ou a marcaxe se suscitan cuestións relativas á propiedade, porase fin ao procedemento, dentro do perímetro cuestionado, sen máis trámites. Este acordo de finalización e arquivamento parcial do procedemento non será susceptible de impugnación na vía administrativa, sen prexuízo da facultade dos interesados de acudiren á vía xurisdicional civil, por ser esta a competente para dirimir tal controversia.
Segunda. A revisión do esbozo do monte Chan do Coello proposta polo Servizo de Montes é a presentada pola CMVMC de Lourido e queda definida consonte os datos reflectidos no feito segundo, e a cartografía que consta no expediente».
Vista a proposta de revisión presentada polo Servizo de Montes sobre a adaptación do esbozo do monte veciñal denominado Chan do Coello, e de conformidade co previsto na disposición transitoria décimo terceira da Lei 7/2012, do 28 de xuño, de montes de Galicia, este Xurado, por unanimidade dos seus membros,
ACORDA:
Aprobar a revisión do esbozo do monte veciñal denominado Chan do Coello, clasificado a prol da CMVMC de Lourido (Soutomaior), segundo a proposta do Servizo de Montes e a planimetría elaborada por el.
Pontevedra, 19 de abril de 2024
Antonio Crespo Iglesias
Presidente do Xurado Provincial de Clasificación
de Montes Veciñais en Man Común de Pontevedra