Feitos:
Primeiro. O 22.9.2022, o representante da Comunidade de Montes Veciñais en Man Común (en diante, CMVMC) de Cabeiras presentou no rexistro electrónico da Xunta de Galicia, co número de entrada 2022/2328611, solicitude de deslindamento entre a CMVMC de Cabeiras (Arbo) e a CMVMC de San Cibrán de Ribarteme (As Neves).
Os montes veciñais en man común (en diante, MVMC) afectados por este deslindamento son:
– MVMC de Cabeiras (ID monte: 2444) da CMVMC de Cabeiras.
– MVMC de San Cibrán de Ribarteme (ID monte: 2921) da CMVMC de San Cibrán de Ribarteme.
Segundo. Consta no expediente a seguinte documentación do deslindamento consonte o artigo 53 da Lei 7/2012:
• Acta do apeo do deslindamento do 27.6.2022.
• Acta de conciliación núm. 4/2022 entre as comunidades no Xulgado de Paz de Arbo o 11.10.2022.
• Certificado do secretario da CMVMC de Cabeiras coa conformidade do presidente, do 23.5.2023, da aprobación na asemblea do 17.7.2022.
• Certificado do secretario da CMVMC de San Cibrán de Ribarteme coa conformidade do presidente, do 22.8.2022, da aprobación na asemblea do 14.8.2022.
• Memoria descritiva co plano de deslindamento e cartografía en formato dixital no Datum ETRS89/UTM, zona 29N EPSG: 25829, asinado o 5.9.2022 pola enxeñeira técnica forestal colexiada núm. 6318 do COETF de Galicia. Constan emendas posteriores que corrixen a dita memoria.
• Informe de validación gráfica catastral con CSV: RCM6QVCMHWB6869S, WTBCKDT393YX1T63 (para a comunicación da alteración catastral consonte o artigo 55.3 da Lei 7/2012) que, polo principio de colaboración entre administracións, deberá verificar a Xerencia Territorial do Catastro.
Terceiro. A liña de deslindamento proposta ten unha lonxitude de 1.708 metros e está composta polos seguintes puntos:
Punto 235-x: 553.017,65 y: 4.664.922,51
Punto 234-x: 553.036,07 y: 4.664.827,44
Punto 233-x: 553.092,43 y: 4.664.610,28
Punto 232-x: 553.318,73 y: 4.663.979,19
Punto 230-x: 553.425,72 y: 4.663.681,70
Punto 229-x: 553.226,68 y: 4.663.334,18
Revisada a cartografía das resolucións de clasificación de ambos os MVMC, detéctase que existe estrema entre ambos, coa excepción dun tramo que linda coa CMVMC de Cerdeira. Neste tramo xustifícase a estrema polos expedientes de revisión de esbozo (RE22027) da CMVMC de San Cibrán de Ribarteme, (RE22065) da CMVMC de Cabeiras e (RE22012) da CMVMC Cerdeira. Considérase que non afecta terceiros propietarios.
O punto 229 é coincidente co punto 9 do expediente DC22017 (deslindamento entre a CMVMC de Cabeiras e a CMVMC de Sela), polo que no dito punto converxen a CMVMC de San Cibrán de Ribarteme, a CMVMC de Sela e a CMVMC de Cabeiras.
O punto 235 é o punto en que converxen a CMVMC de Cerdeira, a CMVMC de San Cibrán de Ribarteme e a CMVMC de Cabeiras.
A liña do deslindamento non respecta a liña do Instituto Xeográfico Nacional entre os concellos de Arbo e As Neves.
Nos expedientes de revisión de esbozo RE22065 da CMVMC de Cabeiras e a RE22027 da CMVMC de San Cibrán de Ribarteme xa se recolle o actual deslindamento.
O Servizo de Montes considera que a solicitude se axusta ao establecido no artigo 53, polo que propón a aprobación do deslindamento segundo a liña presentada.
Consideracións legais e técnicas:
Primeira. A presente resolución dítase de conformidade co disposto na Lei 39/2015, do 1 de outubro, do procedemento administrativo común das administracións públicas.
Segunda. O artigo 53 da Lei 7/2012, do 28 de xuño, de montes de Galicia, recolle o procedemento que hai que seguir no deslindamento entre montes veciñais en man común e establece que o Xurado Provincial de Clasificación de Montes Veciñais en Man Común, logo do exame da documentación presentada, ditará resolución, que será publicada no Diario Oficial de Galicia e notificada ás comunidades interesadas.
De acordo cos feitos e consideracións legais e técnicas expostos, o Xurado, por unanimidade dos seus membros,
ACORDA:
Aprobar o deslindamento parcial realizado entre a CMVMC de Cabeiras (Arbo) e a CMVMC de San Cibrán de Ribarteme (As Neves), respecto da súa estrema común, nos termos indicados no feito terceiro.
Contra a presente resolución, que pon fin á vía administrativa, poderase interpoñer recurso de reposición con carácter potestativo perante o Xurado Provincial de Clasificación de Montes Veciñais en Man Común de Pontevedra no prazo dun mes, ou ben interpoñer directamente recurso contencioso-administrativo perante o Xulgado do Contencioso-Administrativo de Pontevedra, no prazo de dous meses contados desde o día seguinte ao da presente notificación, de acordo co disposto nos artigos 123 e 124 da Lei 39/2015, do 1 de outubro, do procedemento administrativo común das administracións públicas, e nos artigos 8 e 46 da Lei 29/1998, do 13 de xullo, reguladora da xurisdición contencioso-administrativa.
Pontevedra, 10 de abril de 2024
Antonio Crespo Iglesias
Presidente do Xurado Provincial de Clasificación
de Montes Veciñais en Man Común de Pontevedra