Examinada a solicitude de deslindamento formulada polos representantes do monte veciñal en man común (MVMC) O Lombo, pertencente á Comunidade de Montes Veciñais en Man Común (CMVMC) da parroquia de Tabazoa de Hedroso, e o de Campo da Gonza, pertencente á CMVMC de Hedroso, no concello de Viana do Bolo, resultan os seguintes:
Feitos:
Primeiro. O 6.7.2022 a CMVMC de Tabazoa de Hedroso presentou un escrito (Rexel 2022/1773961) en que solicitan a aprobación dun deslindamento coa CMVMC de Hedroso.
Coa solicitude achegou a seguinte documentación:
– Acta de deslindamento.
– Memoria e planos.
– Acta de conciliación levantada no Xulgado de Paz de Viana do Bolo.
– Certificacións de aprobación das dúas comunidades.
Segundo. O informe do Servizo de Montes da Xefatura Territorial de Ourense, de data 31 de xaneiro de 2023, fai constar que a documentación achegada corresponde ao deslindamento parcial do perímetro estremeiro entre o MVMC O Lombo, pertencente á CMVMC de Tabazoa de Hedroso, e o MVMC Campo da Gonza, pertencente á CMVMC de Hedroso, desde o vértice 0 (o situado máis ao L) ata o vértice 30 (o situado máis ao O).
Logo de analizar os vértices e a súa localización, obsérvase que, de conformidade co indicado na propia acta e memoria do deslindamento, o vértice 0 ten a consideración de punto auxiliar coa denominación límite entre Tabazoa de Hedroso e Quintela de Hedroso. Porén, conclúese que o vértice 1, Pedra Pequena ou Pedra das Merendas, onde comezaría realmente o linde entre Tabazoa de Hedroso e Hedroso, debe ser considerado tamén un punto auxiliar na medida en que está situado, segundo a liña intermunicipal vixente do IXN, no T.M. da Veiga, concretamente, sobre terreos do MVMC Campo da Gonza dos veciños de Carracedo, Castromao, Corzos e Pradolongo; pois, se ben é certo que o punto Pedra das Merendas vén identificado coma un marco da liña de termo e punto significativo na descrición dos perímetros, non se pode presupoñer que o vértice 1 sexa realmente ese punto pois non consta a conformidade da CMVMC de Carracedo, Castromao, Corzos e Pradolongo.
En consecuencia, considérase o vértice 2 coma o punto inicial do deslindamento, tendo o vértice 1 a condición de punto auxiliar que permite definir a dirección da liña no tramo inicial a partir da liña intermunicipal.
O citado informe considera que a solicitude se axusta ao establecido no artigo 53 da Lei 7/2012, do 28 de xuño, de montes de Galicia, e proponlle ao Xurado Provincial a súa aprobación, entre os vértices 2 e 30 indicados na acta de conciliación, tendo o punto 1 a consideración de vértice auxiliar que permite definir a dirección da liña no tramo inicial.
Consideracións legais e técnicas:
Primeiro. A presente resolución dítase o abeiro do artigo 53 do Regulamento para a execución da Lei 13/1989, do 10 de outubro, de montes veciñais en man común, aprobado polo Decreto 260/1992, do 4 de setembro, e de conformidade co disposto na Lei 39/2015, do 1 de outubro, do procedemento administrativo común das administracións públicas.
Segundo. O artigo 53 da Lei 7/2012, do 28 de xuño, de montes de Galicia, recolle o procedemento para seguir no deslindamento entre montes veciñais en man común e establece que o Xurado Provincial de Clasificación de Montes Veciñais en Man Común, logo do exame da documentación presentada, dite resolución que será publicada no Diario Oficial de Galicia e notificada ás comunidades interesadas.
De acordo cos feitos e fundamentos de dereito expostos, e tendo en conta o informe favorable do Servizo de Montes do día 31 de xaneiro de 2023, o Xurado Provincial de Clasificación de Montes Veciñais en Man Común acordou, por unanimidade, o día 20 de febreiro de 2024:
Aprobar o acto de conciliación acadado polas xuntas reitoras dos MVMC O Lombo, pertencente á CMVMC de Tabazoa de Hedroso; e do MVMC Campo da Gonza, pertencente á CMVMC de Hedroso, no concello de Viana do Bolo.
Contra esta resolución, que pon fin a vía administrativa, poderase interpoñer recurso potestativo de reposición perante o Xurado Provincial de Clasificación de Montes Veciñais en Man Común de Ourense no prazo dun mes, ou ben directamente recurso contencioso-administrativo perante o Xulgado do Contencioso-Administrativo de Ourense, no prazo de dous meses contados desde o día seguinte ao desta notificación, de acordo co disposto nos artigos 123 e 124 da Lei 39/2015, do 1 de outubro, do procedemento administrativo común das administracións públicas, e nos artigos 8 e 46 da Lei 29/1998, do 13 de xullo, reguladora da xurisdición contencioso-administrativa.
Ourense, 27 de febreiro de 2024
Luis Jorge Álvarez Ferro
Presidente do Xurado Provincial de Clasificación
de Montes Veciñais en Man Común de Ourense