Examinada a solicitude de deslindamento formulada polos representantes do monte veciñal en man común (MVMC) Aceveda ou Coto Castiñeira, pertencente á Comunidade de Montes Veciñais en Man Común (CMVMC) da parroquia de Castiñeira, e Chaguazoso, pertencente á CMVMC de Chaguazoso, no concello de Vilariño de Conso, resultan os seguintes
Feitos:
Primeiro. O 8 de xullo de 2022, a CMVMC de Castiñeira presentou un escrito (Rexel 2022/1794982) en que solicita a aprobación de deslindamentos entre o MVMC Aceveda ou Coto de Castiñeira e o MVMC de Chaguazoso.
Coa solicitude achegou a seguinte documentación:
– Acta de deslindamento do 19.1.2022.
– Memoria e planos.
– Acta de conciliación redactada no Xulgado de Paz de Vilariño de Conso.
– Certificacións de aprobación das dúas comunidades.
Segundo. O informe do Servizo de Montes da Xefatura Territorial de Ourense, do 14 de xullo de 2022, fai constar que a documentación achegada corresponde ao deslindamento parcial do perímetro estremeiro entre o MVMC Aceveda ou Coto Castiñeira, pertencente á CMVMC de Castiñeira, e o MVMC Chaguazoso, pertencente á CMVMC de Chaguazoso, desde o vértice 1 (o situado máis ao E) ata o vértice (auxiliar) 7 (o situado máis ao O).
Logo de analizar os vértices e a súa localización, conclúese que os puntos que se pretende aprobar son os comprendidos entre o 1 e o 6, xa que o 7 se sitúa presumiblemente en terreos do MVMC Veiga de Conselo, de aí que o dito punto veña definido na memoria como punto auxiliar, é dicir, que teoricamente se terá en conta para definir a dirección da liña de deslindamento a partir do vértice 6. Porén, na práctica non sería necesario telo en conta xa que dende o vértice 4, tal como se describe na correspondente acta, o límite entre os dous montes ata a presa do Cenza o constitúe o propio río Cenza, pasando polo punto nº 5 (…) o punto nº 6 (…). A este respecto, tamén cómpre aclarar que o trazado do río non procede de ningunha base cartográfica oficial, senón da dixitalización sobre ortoimaxe.
O citado informe considera que a solicitude se axusta ao establecido no artigo 53 da Lei 7/2012, do 28 de xuño, de montes de Galicia.
Consideracións legais e técnicas:
Primeira. A presente resolución dítase o abeiro do artigo 53 do Regulamento para a execución da Lei 13/1989, do 10 de outubro, de montes veciñais en man común, aprobado polo Decreto 260/1992, do 4 de setembro, e de conformidade co disposto na Lei 39/2015, do 1 de outubro, do procedemento administrativo común das administracións públicas.
Segunda. O artigo 53 da Lei 7/2012, do 28 de xuño, de montes de Galicia, recolle o procedemento que se debe seguir no deslindamento entre montes veciñais en man común e establece que o Xurado Provincial de Clasificación de Montes Veciñais en Man Común, logo do exame da documentación presentada, ditará resolución que será publicada no Diario Oficial de Galicia e notificada ás comunidades interesadas.
De acordo cos feitos e fundamentos de dereito expostos, e tendo en conta o informe favorable do Servizo de Montes do día 14 de xullo de 2022, o Xurado Provincial de Clasificación de Montes Veciñais en Man Común acordou por unanimidade, o día 20 de febreiro de 2024:
Aprobar o acto de conciliación acadado polas xuntas reitoras dos MVMC Aceveda ou Coto Castiñeira, pertencente á CMVMC de Castiñeira; e do MVMC de Chaguazoso, pertencente á CMVMC de Chaguazoso, no concello de Vilariño de Conso.
Contra esta resolución, que pon fin á vía administrativa, poderase interpoñer recurso potestativo de reposición perante o Xurado Provincial de Clasificación de Montes Veciñais en Man Común de Ourense no prazo dun mes, ou ben directamente recurso contencioso- administrativo perante o Xulgado do Contencioso-Administrativo de Ourense, no prazo de dous meses contados desde o día seguinte ao desta notificación, de acordo co disposto nos artigos 123 e 124 da Lei 39/2015, do 1 de outubro, do procedemento administrativo común das administracións públicas, e nos artigos 8 e 46 da Lei 29/1998, do 13 de xullo, reguladora da xurisdición contencioso-administrativa.
Ourense, 27 de febreiro de 2024
Luis Jorge Álvarez Ferro
Presidente do Xurado Provincial de Clasificación
de Montes Veciñais en Man Común de Ourense